தற்போதைய செய்திகள்

7 தொகுதிகளிலும் வெற்றிக்கனியை கழகத்தின் தலைமையிடம் ஒப்படைப்போம் – அமைச்சர் கே.டி.ராஜேந்திரபாலாஜி சூளுரை

விருதுநகர்

வரும் சட்டமன்ற தேர்தலில் விருதுநகர் மாவட்டத்தில் 7 சட்டமன்ற தொகுதிகளிலும் கழகத்தை இமாலய வெற்றிபெறச் செய்து வெற்றிக்கனியை தலைமையிடம் ஒப்படைப்போம் என்று பால்வளத்துறை அமைச்சர் கே.டி.ராஜேந்திரபாலாஜி சூளுரைத்தார்.

முதலமைச்சர், துணை முதலமைச்சர் ஆகியோரின் ஆணைக்கிணங்க விருதுநகர் மாவட்ட கழகம் சார்பில் புதிய உறுப்பினர் சேர்க்கை முகாம் குறித்தும் இளைஞர் மற்றும் இளம்பெண்கள் பாசறை, தகவல் தொழில்நுட்ப வார்டு, ஊராட்சி செயலாளர்கள் நிர்வாகிகள் நியமனம் குறித்தும் ஆலோசனைக்கூட்டம் ராஜபாளையத்தில் நடைபெற்றது. ராஜபாளையம் நகர, ஒன்றிய நிர்வாகிகள் கலந்து கொண்ட இந்த கூட்டத்தில் விருதுநகர் மாவட்ட கழக பொறுப்பாளரும், பால்வளத்துறை அமைச்சருமான கே.டி.ராஜேந்திரபாலாஜி கலந்து கொண்டு ஆலோசனை வழங்கினார்.

அப்போது அவர் பேசியதாவது;- 

புரட்சித்தலைவி அம்மா அவர்களின் அருளாசியுடன் தொடர்ந்து 10 ஆண்டுகளாக மக்கள் போற்றும் நல்லாட்சி தமிழகத்தில் நடைபெற்று வருகிறது. குறிப்பாக இந்த நான்காண்டு காலத்தில் அம்மாவின் வழியில் எண்ணற்ற பல திட்டங்களை இன்றைக்கு இளைய சமுதாயத்திற்கு முதலமைச்சர் வழங்கி வருகிறார். அவருக்கு உறுதுணையாக துணை முதலமைச்சர் இருந்து வருகிறார்.

வருகின்ற சட்டமன்றத்தேர்தலில் மக்கள் நமக்கு வாக்களிக்க தயாராக உள்ளனர். இங்கு புதிதாக கழகத்தில் உறுப்பினராக இணையவிருக்கும் இளைஞர் மற்றும் இளம்பெண்களுக்கு அம்மாவின் அரசு வழங்கி வரும் சாதனைகளை மக்களிடம் எடுத்துக் கூற வேண்டும். அதிலும் சிறப்பாக சொல்ல வேண்டுமென்றால் இந்த ஐந்து மாதங்களாக தமிழகத்தில் தொழில் முதலீட்டை பெருக்கி இளைஞர்களுக்கு வேலை உருவாக்கிய ஒரே மாநிலம் தமிழகம் தான்.

இந்த நான்கு மாத காலத்தில் வல்லரசு நாடுகளே பொருளாதார சூழ்நிலையில் சுருண்டு கிடக்கும் பொழுது அமெரிக்கா ஜெர்மனி ஆஸ்திரேலியா போன்ற 17 நாடுகளில் இருந்து தமிழகத்திற்கு 30,664 கோடி ரூபாய் தொழில் முதலீட்டை கொண்டுவந்துள்ள இதன்மூலம் 60 ஆயிரத்துக்கும் மேற்பட்ட இளைஞர்களுக்கு வேலைவாய்ப்பை உருவாக்கிக் கொடுத்துள்ளார் முதலமைச்சர்.

இன்றைக்கு எதிர்க்கட்சிகள் அம்மாவுடைய அரசு செய்த சாதனைகளை திசை திருப்ப பல்வேறு பொய் பிரச்சாரங்களை செய்து வருகிறார்கள். இந்த பொய் பிரச்சாரத்தை நம்முடைய இளைஞர்களாகிய நீங்கள் முறியடித்து வருகின்ற 2021-ம் சட்டமன்றத் தேர்தல் விருதுநகர் மாவட்டத்தில் 7 சட்ட மன்ற தொகுதியிலும் கழகத்தை இமாலய வெற்றி பெற செய்வோம்.

வெற்றிக்கனியை தமிழக முதலமைச்சர், துணைமுதலமைச்சரின் ஆகியோரின் கரங்களில் சமர்ப்பிப்போம். அதற்கு அயராது பணியாற்றி வெற்றி பெறுவோம். கழகத்தை எதிர்த்து நிற்கும் அனைத்து எதிர்கட்சிகளும் டெபாசிட் இழக்க வேண்டும்.

இவ்வாறு அமைச்சர் கே.டி.ராஜேந்திரபாலாஜி பேசினார்.