ராமநாதபுரம்

2021 தேர்தல் வெற்றிக்கு இளைஞர், இளம்பெண்கள் பாசறை துணை நிற்கும் – எம்.ஏ.முனியசாமி நம்பிக்கை

ராமநாதபுரம்

அம்மாவால் கட்டிக்காக்கப்பட்ட கழகத்திற்கு அம்மாவால் உருவாக்கப்பட்ட இளைஞர் மற்றும் இளம்பெண்கள் பாசறை எதிர்வரும் 2021 தேர்தலின் வெற்றிக்கு துணை நிற்கும் என்று ராமநாதபுரம் மாவட்ட கழக செயலாளர் எம்.ஏ.முனியசாமி நம்பிக்கை தெரிவித்துள்ளார்.

கழக ஒருங்கிணைப்பாளரும், துணை முதல்வருமான ஓ.பன்னீர் செல்வம், கழக இணை ஒருங்கிணைப்பாளரும், முதல்வருமான எடப்பாடி கே.பழனிசாமி ஆகியோரின் ஆணைக்கிணங்க கழக இளைஞர் மற்றும் இளம்பெண்கள் பாசறையின் சார்பில் ராமநாதபுரம் மாவட்டத்தில் உள்ள நான்கு சட்டமன்ற தொகுதிகளுக்குட்பட்ட பூத் வாரியாக நிர்வாகிகளை தேர்வு செய்வதற்கான ஆய்வுக்கூட்டம் பரமக்குடியில் உள்ள கீர்த்தி மகாலில் நடைபெற்றது.இக்கூட்டத்திற்கு மாவட்ட கழக செயலாளர் எம்.ஏ.முனியசாமி தலைமை வகித்தார்.

கழக சிறுபான்மை பிரிவு செயலாளர் அ.அன்வர்ராஜா,கழக மகளிரணி இணைச்செயலாளர் கீர்த்திகா முனியசாமி முன்னாள் நாடாளுமன்ற உறுப்பினர் எம்.எஸ்.நிறைகுளத்தான் ஆகியோர் முன்னிலை வகித்தனர்.இளைஞர் மற்றும் இளம்பெண்கள் பாசறையின் மாவட்ட செயலாளர் பொறியாளர் பால்பாண்டியன் அனைவரையும் வரவேற்று பேசினார்.

இக்கூட்டத்தில் மாவட்ட அம்மா பேரவை செயலாளர் சேது பாலசிங்கம்,மாவட்ட சிறுபான்மை பிரிவு செயலாளர் தர்வேஸ் உட்பட ஒன்றிய கழக நிர்வாகிகள்,நகர் கழக நிர்வாகிகள், சார்பு அணி நிர்வாகிகள் இளைஞர் மற்றும் இளம்பெண்கள் பாசறையை சேர்ந்த நிர்வாகிகள் என பலர் சமுக இடைவெளியை கடைபிடித்து கலந்து கொண்டனர்.

இக்கூட்டத்தில் மாவட்ட கழக செயலாளர் எம்.ஏ.முனியசாமி பேசியதாவது:-

இதயதெய்வம் புரட்சித்தலைவி அம்மா அவர்களின் தெய்வீக ஆசியால் இந்த இளைஞர் மற்றும் இளம்பெண்கள் பாசறை கடந்த 2011 சட்டமன்ற தேர்தலில் கழகத்தின் வெற்றிக்காக அயராது பாடுபட்டது. கழகத்தின் காவல் தெய்வம் இதயதெய்வம் அம்மா அவர்கள் கழகத்திற்கு புது ரத்தம் பாய்ச்ச வேண்டும், புத்திளமை காண வேண்டும் என்ற எண்ணத்தில் தமது சிந்தனையில் உதித்த “கழக இளைஞர் பாசறை மற்றும் இளம் பெண்கள் பாசறையை கடந்த 2008ம் ஆண்டு தொடங்கினார்.

இந்தப் பாசறையில் இளம் வீரர்களும், வீராங்கனைகளும் நமது உரிமைப் போர்ப்படையின் ஈட்டிமுனைகளாக விளங்கி வருகின்றனர். நாளைய கழகத்திற்கு நாற்றங்காலாகவும் இந்தப் பாசறை திகழ்ந்து வருகிறது. நாடு, மொழி, இனம், இந்த மூன்றையும் உயர்த்தும் எண்ணத்தை இளம் நெஞ்சங்களில் பதிக்கும் முற்போக்குக் களமான இந்தப் பாசறையில் தமது தலைமையினால் ஈர்க்கப்பட்டு இலட்சோப இலட்சம் இளம் வீரர்களும், வீராங்கனைகளும் புதிய உத்வேகத்துடனும்,மாறாத உறுதியுடனும், லட்சிய நோக்கத்துடனும், விசுவாசத்துடனும் கழகப் பணிகளை ஆற்றி வந்துள்ளனர்.

இதற்கு மேலும் வலு சேர்க்கும் விதமாக நமது முதல்வரும், துணை முதல்வரும் இந்த இளைஞர் மற்றும் இளம்பெண்கள் பாசறையில் ராமநாதபுரம் மாவட்டத்தில் உள்ள நான்கு சட்டமன்றத் தொகுதிகளுக்குட்பட்ட பகுதிகளில் முப்பது வயதுக்குட்பட்ட இளைஞர்கள் மற்றும் இளம்பெண்களை கழகத்தில் இணைக்க அறிவுறுத்தியுள்ளனர். அதனடிப்படையில் கிராம பகுதிகளில் உள்ள இளைஞர்களை நமது கழகத்தில் அதிக அளவில் சேர்க்க வேண்டும்.

தகவல் தொழில் நுட்ப பிரிவு இளைஞர்களை போல இளைஞர் பாசறை நிர்வாகிகளும் எதிர்வரும் சட்டமன்ற தேர்தலின் வெற்றிக்கு பாடுபட வேண்டும். அம்மாவால் கட்டிக்காக்கப்பட்ட இந்த இயக்கத்திற்கு அம்மாவால் உருவாக்கப்பட்ட இளைஞர் மற்றும் இளம்பெண்கள் பாசறை துணை நிற்கும். நமது இயக்கத்திற்கு இளைஞர்கள் மற்றும் இளம்பெண்கள் பெரிதும் உறுதுணையாக இருப்பார்கள் என நம்புகிறோம். இலை ஆட்சி தொடர இளைஞர்கள் கழகத்தில் ஒன்றிணைய வேண்டும்.

இவ்வாறு அவர் பேசினார்.