தற்போதைய செய்திகள்

நகர்ப்புற உள்ளாட்சி தேர்தலில் முறைகேடு செய்ய தி.மு.க. சதி- முன்னாள் அமைச்சர் செல்லூர் கே.ராஜூ குற்றச்சாட்டு

மதுரை

நகர்ப்புற உள்ளாட்சித் தேர்தலில் முறைகேடுகளில் ஈடுபட தி.மு.க. சதி செய்வதாக முன்னாள் அமைச்சர் செல்லூர் கே.ராஜூ குற்றம் சாட்டியுள்ளார்.

நகர்ப்புற உள்ளாட்சி தேர்தலை முன்னிட்டு மதுரை மாநகர் மாவட்ட கழகம் சார்பில் மத்திய 4-ம் பகுதியிலுள்ள 52-வது வார்டில் தேர்தல் அலுவலகம் திறப்பு விழா டி.எம்.கோர்ட் அருகே நடைபெற்றது.

விழாவுக்கு பகுதி கழக செயலாளரும், மாவட்ட இளைஞர் மற்றும் இளம்பெண்கள் பாசறை செயலாளருமான அரவிந்தன் தலைமை தாங்கினார். வட்ட கழக செயலாளர் சாயி என்ற உலகநாதன் முன்னிலை வகித்தார்.

மாவட்ட கழக செயலாளரும், முன்னாள் அமைச்சருமான செல்லூர் கே.ராஜூ தேர்தல் அலுவலகத்தை திறந்து வைத்தார். நிகழ்ச்சியில் அவர் பேசியதாவது:-

நடைபெற்று முடிந்த சட்டமன்ற தேர்தலில் 43 தொகுதிகளில் வெறும் 2 லட்சம் வாக்கு வித்தியாசத்தில் நாம் வெற்றியை நழுவ விட்டோம். தி.மு.க. பெற்றது வெற்றி அல்ல. 505 பொய்யான தேர்தல் வாக்குறுதிகளை கொடுத்து மக்களை ஏமாற்றி பெற்ற வெற்றி. தி.மு.க. ஆட்சிக்கு வந்து 8 மாதங்கள் ஆகியும் தமிழகத்திற்கு எந்த வளர்ச்சி திட்டங்களையும் செய்யவில்லை.

பொங்கல் பரிசு ரூ.1300 கோடி செலவில் கொடுக்கப்பட்டது. அதில் ரூ.500 கோடி அளவில் ஊழல் செய்துள்ளனர். குறிப்பாக பொங்கல் பரிசாக ஆயிரம் ரூபாய் கொடுத்தால் கூடுதலாக ரூ.750 கோடி தான் செலவாகும், ஆனால் அதை கொடுக்க தி.மு.க.வுக்கு மனமில்லை.

நகர்ப்புற உள்ளாட்சி தேர்தல் பிப்ரவரி 19-ந்தேதி நடைபெற இருக்கிறது. இத்தேர்தல் நடைபெறாமல் தடுக்க எப்படியாவது முட்டுக்கட்டை போட தி.மு.க. நினைக்கிறது. மேலும் இத்தேர்தலில் பல்வேறு முறைகேடுகளை தி.மு.க.வினர் செய்ய முயற்சிப்பார்கள். நாம் விழிப்புடன் இருந்து அதை தடுக்க வேண்டும்.

மதுரை மாநகராட்சியில் 100 வார்டுகள் உள்ளன. நாம் அனைவரும் வீடு வீடாக சென்று தி.மு.க.வின் 8 மாத கால அவல ஆட்சியையும், பத்தாண்டுகளில் மதுரை வளர்ச்சிக்காக நாம் செய்த சாதனைகளையும் மக்களுக்கு எடுத்து கூறி மதுரையில் 100 சதவீதம் கழகத்தை வெற்றி பெற செய்து அதை கழக ஒருங்கிணைப்பாளர்கள் கரங்களில் சமர்ப்பிப்போம்.

இவ்வாறு மாவட்ட கழக செயலாளரும், முன்னாள் அமைச்சருமான செல்லூர் கே.ராஜூ பேசினார்.

இந்நிகழ்ச்சியில் வட்ட கழக செயலாளர் அறிவழகன், மாவட்ட இளைஞர் மற்றும் இளம்பெண்கள் பாசறை இணை செயலாளர் செந்தில்குமார், மாவட்ட கழக துணை செயலாளர் ராஜா, அனைத்துலக எம்.ஜி.ஆர். மன்ற துணை செயலாளர் எம்.எஸ்.பாண்டியன், கழக மாணவர் அணி இணை செயலாளர் குமார், பொதுக்குழு உறுப்பினர் சக்தி மோகன் உள்பட பலர் கலந்து கொண்டனர்.