சிறப்பு செய்திகள்

“உடலுறுப்பு மாற்று அறுவை சிகிச்சையில் தமிழகம் முதலிடம்” – முதலமைச்சர் பெருமிதம்

சென்னை

சவீதா மருத்துவ மற்றும் தொழில்நுட்ப அறிவியல் நிறுவனத்தின் 15-வது பட்டமளிப்பு விழாவில் (இணைய வழி) முதலமைச்சர் எடப்பாடி கே.பழனிசாமி பேசியதாவது:-

கல்லூரி வாழ்க்கையில் ஒரு பட்டாம்பூச்சியைப் போல உலா வந்த உங்களுக்கு, இன்று முதல், இந்த உலகத்திற்கான உங்கள் பங்களிப்பை அளிக்க வேண்டிய நேரம் தொடங்கி விட்டது. அர்ப்பணிப்பு மற்றும் பொதுமக்கள் சேவைக்கான முழுமையான உணர்வுகளையும், சிறந்த தொழில் திறமைகளையும் கொண்ட மருத்துவர்களை உருவாக்குவதற்கு முன்னுரிமை அளிக்கப்பட வேண்டும் என்றார் அம்மா அவர்கள்.

அதனடிப்படையில், மாணவர்கள் பெற்ற கல்வியை சமூக நலனுக்குப் பயன்படுத்தவும், சமூகத்தின் அறிவுசார்ந்த நிலையை உயர்த்தவும் பல்கலைக்கழகங்கள் தான் உறுதுணையாக உள்ளன. இந்த நோக்கங்களின் அடிப்படையில்தான் சவீதா நிகர்நிலைப் பல்கலைக்கழகம், மாணவர்களுக்கு சிறந்த கல்வி அளித்து சிறந்த மருத்துவர்களாகவும் சிறந்த பொறியாளர்களாகவும், பிற துறை வல்லுநர்களாகவும் உங்களை உருவாக்கி வருகிறது.

இந்நிறுவனம் முதன்முதலில் 1988ம் ஆண்டு தமிழ்நாட்டில் ஒரு முன்மாதிரி பல் மருத்துவக் கல்லூரியை தொடங்கியது. இன்று 15 உறுப்புக் கல்லூரிகளை தன்னகத்தே கொண்டு, 10 ஆயிரத்துக்கும் மேற்பட்ட மாணாக்கர்கள் பல்வேறு துறைகளில் பயிலும் ஒரு நிகர்நிலைப் பல்கலைக்கழகமாக வளர்ந்திருப்பது இந்நிறுவனத்தின் கல்வித் திறனைப் பறைசாற்றுவதாக அமைந்துள்ளது.

இந்தப் பட்டமளிப்பு விழாவில் பட்டம் பெறும் அனைத்து மாணவர்களுக்கும் எனது பாராட்டுதல்களையும், வாழ்த்துகளையும் தெரிவித்துக் கொள்கிறேன். இத்தகைய சாதனைகளை அடைய உங்களுக்கெல்லாம் உறுதுணையாக இருக்கும் சவீதா நிகர்நிலை பல்கலைக்கழகத்தின் நிறுவனர் வீரையன் மற்றும் ஆசிரியப் பெருமக்களுக்கும் மற்றப் பணியாளர்களுக்கும் பெற்றோர்களுக்கும் எனது பாராட்டுதல்களை உரித்தாக்குகின்றேன்.

மனித சமுதாயம் நோயற்ற வாழ்வு வாழ வேண்டும் என்ற உயரிய நோக்கத்துடன், சவீதா மருத்துவக்கல்லூரி மருத்துவமனை சுமார் 60 லட்சத்திற்கும் மேற்பட்ட நகர்ப்புற மற்றும் கிராமப்புற மக்களுக்கு உயர்தர மருத்துவ சிகிச்சை அளித்துள்ளது என்பதை அறிந்து நான் மகிழ்ச்சி அடைகிறேன்.

உலகை அச்சுறுத்தும் கொரோனா தொற்று நோயை விரட்ட இந்த நிறுவனம் தமிழ்நாடு அரசுக்கு தனது முழு ஒத்துழைப்பை வழங்கி வருவது மகிழ்ச்சிக்குரியது. மேலும், இந்த நிறுவனம் இந்தியாவிலுள்ள பல்கலைக்கழகங்களின் தரவரிசையில் முதல் 50 இடங்களில் ஒன்றாக இடம்பெற்றிருப்பது என்பதும் பெருமைக்குரியது.

நலமான மாநிலமே, வளமான மாநிலம்”” என்ற நோக்கத்தின் அடிப்படையில் ஏழை எளிய மக்களுக்கு அவர்கள் வாழும் பகுதிகளுக்கு அருகிலேயே தரம் வாய்ந்த மருத்துவ வசதி கிடைக்க வழிவகை செய்தல், தொழில்நுட்ப வளர்ச்சியினை பயன்படுத்தி உயர்தர மருத்துவ வசதிகள் அளித்தல் போன்ற பல முன்னோடி திட்டங்களை அம்மா அவர்களின் வழியில், தமிழ்நாடு அரசு செயல்படுத்தி வருகிறது. அவற்றில் ஒரு சிலவற்றை மாணவச் செல்வங்களுக்கு தெரிவிப்பதில் மகிழ்ச்சியடைகிறேன்.

கடந்த ஆண்டில் தமிழ்நாட்டில் குழந்தை இறப்பு விகிதம் 17-ல் இருந்து 16 ஆகவும், பேறுகாலத்தில் தாய்மார்களின் இறப்பு விகிதத்தைப் பொறுத்தவரையில் 2030-ல் அடைய வேண்டிய நீடித்த நிலையான இலக்குகளை, நாம் எடுத்த பல்வேறு முனைப்பான நடவடிக்கைகளால் இப்போதே அடைந்து விட்டதும் ஒரு சரித்திர சாதனையாகும்.

டாக்டர் முத்துலட்சுமி மகப்பேறு உதவி திட்டத்தின் கீழ் தகுதி வாய்ந்த கர்ப்பிணித் தாய்மார்களுக்கு இரண்டு பேறுகாலம் வரை 18,000 ரூபாய் நிதி உதவியாக வழங்கப்படுகிறது. இந்தியாவிலேயே அதிக அளவாக தமிழ்நாட்டில் மட்டுமே .99.9 சதவீதம் பிரசவங்கள் மருத்துவமனையில் நடைபெறுவது, இந்த திட்டத்தின் வெற்றியை காட்டுகிறது.

முதலமைச்சரின் விரிவான மருத்துவ காப்பீட்டுத் திட்டம், வளர் இளம் பெண்களுக்கான சுகாதாரத் திட்டம், பிரசவ உடனாளர் திட்டம், அம்மா குழந்தை நல பரிசுப் பெட்டகம், அம்மா ஆரோக்கிய திட்டம், அம்மா முழு உடல் பரிசோதனைத் திட்டம், அம்மா மகப்பேறு சஞ்சீவித் திட்டம், அம்மா மருந்தகம் போன்ற பல முன்னோடி திட்டங்களைத் தமிழ்நாடு அரசு செயல்படுத்தி வருகிறது.

உடல் உறுப்பு மாற்று அறுவை சிகிச்சையில் தமிழ்நாடு 5 வருடங்களாக தொடர்ந்து தேசிய அளவில் மிகச் சிறந்த மாநில விருதை பெற்று வருகிறது. உடல் உறுப்பு தானத்தில் சிறந்த மருத்துவமனைக்கான விருது, சென்னை அரசு பொது மருத்துவமனைக்கு வழங்கப்பட்டுள்ளது.

மூளைச்சாவு அடைந்தவரிடம் இருந்த கைகளை தானமாக பெற்று, திண்டுக்கல்லைச் சார்ந்த நாராயணசாமி என்பவருக்கு பொருத்தி நாட்டிலேயே முதல் முறையாக கைகள் மாற்று அறுவை சிகிச்சை சென்னை ஸ்டான்லி அரசு மருத்துவமனையில் செய்யப்பட்டது. அம்மாவின் ஆட்சியில், 254 புதிய ஆரம்ப சுகாதார நிலையங்கள் தோற்றுவிக்கப்பட்டுள்ளன. இது தவிர, 165 ஆரம்ப சுகாதார நிலையங்கள், 30 படுக்கை வசதி, ஸ்கேன் போன்ற வசதிகளுடன் நிலை உயர்த்தப்பட்டுள்ளன.

மருத்துவப் பணியாளர் தேர்வு வாரியம் மூலம் 12,823 மருத்துவர்கள், 14,588 செவிலியர்கள் உட்பட 32,660 பணியாளர்கள் தேர்வு செய்யப்பட்டு பணி நியமனம் செய்யப்பட்டுள்ளனர். தமிழ்நாடு அரசு, அரசு மருத்துவமனைகளில் புற்று நோய்க்கு உயரிய சிகிச்சை அளிக்கும் வகையில் 190 கோடி ரூபாய் மதிப்பீட்டில் அரசு மருத்துவமனைகளில் Linear Accelerator என்ற உயர் தொழில் நுட்பக் கருவி நிறுவப்பட்டு வருகிறது.

சென்னை அடையாறு, புற்றுநோய் மையத்தை 120 கோடி ரூபாய் மதிப்பீட்டில் மாநில அளவில் புற்றுநோய்க்கு சிகிச்சை அளிக்கும் ஒப்புயர்வு மையமாக தரம் உயர்த்தும் பணி, நிறைவடையும் தருவாயில் உள்ளது. காஞ்சிபுரம், காரப்பேட்டை அரசு அறிஞர் அண்ணா நினைவு புற்றுநோய் மருத்துவமனையில் 120 கோடி ரூபாய் மதிப்பீட்டில் மேன்மைமிகு மையம் ஏற்படுத்தும் பணி தொடங்கப்பட்டுள்ளது.

இவ்வாறு முதலமைச்சர் எடப்பாடி கே.பழனிசாமி பேசினார்.