தற்போதைய செய்திகள்

கொரோனா தொற்றால் பாதிக்கப்பட்ட 4,154 கர்ப்பிணிகள், 37,436 குழந்தைகள் பூரணநலம் – அமைச்சர் டாக்டர் சி.விஜயபாஸ்கர் தகவல்

சென்னை

சவாலான சூழ்நிலையில் தொய்வின்றி சிகிச்சை அளிக்கப்பட்டதால் கொரோனா தொற்றால் பாதிக்கப்பட்ட 4154 கர்ப்பிணிகள், 37,436 குழந்ைதகள் குணமடைந்துள்ளனர் என்று அமைச்சர் டாக்டர் சி.விஜயபாஸ்கர் தெரிவித்துள்ளார்.

இதுகுறித்து மக்கள் நல்வாழ்வு மற்றும் குடும்ப நலத்துறை அமைச்சர் டாக்டர் சி.விஜயபாஸ்கர் விடுத்துள்ள செய்திக்குறிப்பு வருமாறு:-

அம்மாவின் அரசு, முதலமைச்சர் தலைமையில், கொரோனா தொற்று காலத்திலும் தமிழ்நாடு அரசு கொரோனா தொற்று அல்லாத பிற நோயாளிகளுக்கும் தங்கு தடையின்றி சிறப்பான முறையில் சிகிச்சைகளை அளித்து வருகிறது.
தமிழகம் முழுவதும் அரசு மருத்துவமனைகள் மற்றும் மருத்துவக் கல்லூரி மருத்துவமனைகளில் மார்ச் 2020 முதல் இதுவரை 20,550 நபர்களுக்கு டயாலிசிஸ் செய்யப்பட்டுள்ளது. இதில் 1,077 நபர்கள் கொரோனா தொற்றால் பாதிக்கப்பட்டவர்கள் என்பது குறிப்பிடதக்கது. மேலும் 1,347 நபர்களுக்கு ஆஞ்சியோகிராம் மற்றும் 439 நபர்களுக்கு ஆஞ்சியோபிளாஸ்டி மேற்கொள்ளப்பட்டுள்ளது.

இச்சவாலான சூழ்நிலையில் கொரோனா தொற்றால் பாதிக்கப்பட்ட 4,154 கர்ப்பிணி தாய்மார்களும் 37,436 குழந்தைகளும் உரிய சிகிச்சை பெற்று குணமடைந்துள்ளனர். 805 இரத்த தான முகாம்கள் நடத்தப்பட்டு 88,280 அலகு இரத்தம் பெறப்பட்டுள்ளது. இந்த சிறப்பு சிகிச்சைகள் மற்றும் மருத்துவ சேவைகள் தொய்வில்லாமல் நடைபெற்றதன் காரணத்தினால், கொரோனா தொற்று காலத்தில் பல விலைமதிப்பில்லாத உயிர்கள் காப்பாற்றப்பட்டுள்ளது.

கொரோனா தொற்றினால் தனியார் மருத்துவமனைகளை நோயாளிகள் அணுக இயலாத நிலையில் கூடுதல் சேவைகளையும் அரசு மருத்துவமனைகள் திறம்பட எதிர்கொண்டு அர்பபணிப்பு உணர்வுடன் அரசு மருத்துவமனைகளில் உயரிய சேவைகள் வழங்கப்பட்டு பல உயிர்கள் காப்பாற்றப்பட்டுள்ளன. அம்மாவின் அரசு, முதலமைச்சர் தலைமையில் மேற்கொள்ளப்பட்டு வரும் மக்கள் நலன் காக்கும் பணிகள் பல்வேறு தரப்பினர்களின் தொடர் பாராட்டுக்களை பெற்று வருகிறது.

இவ்வாறு அமைச்சர் டாக்டர் சி.விஜயபாஸ்கர் தெரிவித்துள்ளார்.