சிறப்பு செய்திகள்

தேனியில் முஸ்லீம் மகளிர் உதவும் சங்க உறுப்பினர்களுக்கு ரூ.30 லட்சம் நிதியுதவி – துணை முதலமைச்சர் வழங்கினார்

தேனி

ேதனியில் முஸ்லீம் மகளிர் உதவும் சங்க உறுப்பினர்களுக்கு ரூ.30 லட்சம் நிதியுதவியை துணை முதலமைச்சர் ஓ.பன்னீர்செல்வம் வழங்கினார்.

தமிழக அரசு சிறுபான்மையினர் மக்களின் கல்வி, சமூகம், மற்றும் பொருளாதார நிலைகளை, பெரும்பான்மையினருக்கு நிகராக மேம்பாடு செய்திடும் நோக்கத்திலும், அவர்களின் வாழ்க்கைத்தரத்தை உயர்த்திட வேண்டும் என்பதனை கருத்தில் கொண்டும், கல்வி கடன் மற்றும் தொழில் கடன் போன்ற பல்வேறு திட்டங்களை பிற்படுத்தப்பட்டோர் மற்றும் சிறுபான்மையினர் நலத்துறை மூலம் செயல்படுத்தி வருகிறது.

தமிழ்நாட்டில் வாழும் கிறிஸ்துவ, இஸ்லாமிய, சீக்கிய, புத்த, பார்சி மற்றும் ஜெயின் சமூகங்களை சார்ந்த மக்களுக்கு தமிழ்நாடு சிறுபான்மையினர் பொருளாதார மேம்பாட்டுக்கழகத்தின் (டாம்கோ) சார்பில் பல்வேறு கடன் உதவிகளும் வழங்கப்பட்டு வருகிறது.

தமிழ்நாட்டிலுள்ள இஸ்லாமிய மதத்தை சார்ந்த வயது முதிர்ந்த ஆதரவற்ற, கணவரால் கைவிடப்பட்ட முஸ்லீம் மகளிர் நலனுக்காக மாவட்ட ஆட்சியர் தலைமையில் அனைத்து மாவட்டங்களிலும் மாவட்ட முஸ்லீம் உதவும் சங்கம் அமைக்கப்பட்டு, செயல்பட்டு வருகிறது. இச்சங்கங்கள் திரட்டும் நன்கொடை நிதி ஆதாரத்திற்கு இணையாக ஒவ்வொரு சங்கத்திற்கும் அதிக பட்சம் ரூ.20 லட்சம் வரை தமிழக அரசால் இணை மானியம் வழங்கப்பட்டு வருகிறது.

குறிப்பாக, தமிழக அரசு முஸ்லீம் சுய உதவி குழுவினர்களுக்கு சிறு தொழில் தொடங்கிடவும், பல்வேறு நலத்திட்ட உதவிகள் வழங்கிடவும் 1:1-ஆக இருந்த நிதியுதவினை தற்சமயம் 1:2 பங்காக உயர்த்தி வழங்கி வருகிறது. உலமாக்கள் மற்றும் பணியாளர்கள் சமூகம், பொருளாதாரம் மற்றும் கல்வி ஆகிய நிலைகளில் முன்னேற்றம் அடைவதற்கென உலமாக்கள் மற்றும் பணியாளர்கள் நல வாரியம் அமைக்கப்பட்டு, செயல்படுத்தப்பட்டு வருகிறது. இவ்வாரியத்தில் பணியாளர்கள் உறுப்பினராக சேர்க்கப்பட்டு நலத்திட்ட உதவிகள் வழங்கப்பட்டு வருகிறது.

மேலும், 2019-20-ம் ஆண்டில் தேனி மாவட்ட முஸ்லீம் மகளிர் உதவும் சங்கம் மூலம் ரூ.10,00,000 (ரூபாய் பத்து லட்சம் மட்டும்) நன்கொடை தொகை வசூல் செய்து அதற்கு இணை மானியம் கோரி அனுப்பப்பட்ட முன்மொழிவினை ஏற்று ரூ.20,00,000 (ரூபாய் இருபது லட்சம் மட்டும்) இணை மானியம் ஒதுக்கீடு செய்து ஆணையிடப்பட்டது.

அதனடிப்படையில் தேனி மாவட்ட முஸ்லீம் மகளிர் உதவும் சங்கத்தின் மூலம் பின் தங்கிய நிலையில் உள்ள 400 முஸ்லீம் மகளிர்களை தேர்வு செய்து சிறு தொழில் செய்ய தலா ரூ.7,500 வீதம் ரூ.30 லட்சம் நிதி உதவி வழங்கப்படுகிறது. இந்த சங்கத்தின் மூலம் 2011-ம் ஆண்டு முதல் 2020-ம் ஆண்டு வரை 3921 முஸ்லீம் பெண்களுக்கு சிறுதொழில் தொடங்கி பயன்பெறுவதற்கு ஏதுவாக ரூபாய் 2.28 கோடி வழங்கப்பட்டுள்ளது. மேற்கண்ட திட்டத்தின் கீழ் மாவட்ட முஸ்லீம் மகளிர் உதவும் சங்க உறுப்பினர்களுக்கு நிதியுதவிக்கான காசோலையை துணை முதலமைச்சர் ஓ.பன்னீரெ்சல்வம் நேற்று மாவட்ட ஆட்சியர் ம.பல்லவி பல்தேவ் முன்னிலையில் வழங்கி தொடங்கி வைத்தார்.

இவ்விழாவில், கம்பம் தொகுதி சட்டமன்ற உறுப்பினர் எஸ்.டி.கே.ஜக்கையன், மாவட்ட காவல் கண்காணிப்பாளர் இ.சாய் சரண் தேஜஸ்வி, மாவட்ட வருவாய் அலுவலர் க.ரமேஷ், கூட்டுறவு சங்கங்களின் இணைப்பதிவாளர் எம்.ஏகாம்பரம், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் இரா.நிறைமதி, மாவட்ட வழங்கல் அலுவலர் இ.கார்த்திகாயினி, மாவட்ட முஸ்லீம் மகளிர் உதவும் சங்க கௌரவ செயலாளர் பொன்ராஜ் கொந்தாலம் உட்பட பலர் கலந்து கொண்டனர்.