தற்போதைய செய்திகள்

திமுக கற்பூரம்போல் கரைந்து வருகிறது – அமைச்சர் டி.ஜெயக்குமார் பேட்டி

சென்னை

மூத்த தலைவர்களை ஒருங்கிணைக்க முடியாத திமுக கற்பூரம்போல் கரைந்து வருகிறது என்று அமைச்சர் டி.ஜெயக்குமார் தெரிவித்தார்.

சென்னை ராயபுரத்தில் கொரோனா வைரஸ் தடுப்பு பணிகளில் ஒன்றான விழிப்புணர்வு நாடகத்தை அமைச்சர் டி.ஜெயக்குமார் தொடங்கிவைத்தார். தொடர்ந்து செய்தியாளர்களுக்குப் பேட்டி அளித்தார்.

கொரோனா வைரஸை கட்டுப்படுத்த அனைவரும் ஒன்று சேர்ந்து ஒத்துழைப்பது அவசியம் . வாக்காளர்களைக் கவரும் வகையிலேயே திமுக என்றும் செயல்பட்டு வருகிறது. இன்று திமுகவில் உள்ள மூத்த நிர்வாகிகளை ஒன்றிணைக்க தெரியாமல் அக்கட்சியின் தலைவர் இருந்து வருகிறார். திமுக என்ற கட்சி கற்பூரம் போல் கரைந்து வருகிறது.

பிறந்த நாள் காணும் தேமுதிக தலைவர் விஜயகாந்த், நல்ல உடல் ஆரோக்கியத்துடன், பல்லாண்டு காலம் வாழ்ந்து மக்கள் பணியாற்ற வேண்டும்.என்றார்.தொடர்ந்து செய்தியாளர்கள் தேமுதிக தெரிவித்த கருத்து குறித்து கேள்வி எழுப்பினர்.இதற்கு அமைச்சர் டி.ஜெயக்குமார் நாடாளுமன்றத் தேர்தலில் அதிமுகவுடன் தேமுதிக அமைத்த கூட்டணி தொடர்கிறது என்பதை அவர் ஒப்புக்கொள்கிறார். சட்டப்பேரவைத் தேர்தல் நடைபெறுவதற்கு இன்னும் காலம் இருக்கிறது.

அவர்களின் கட்சியின் கருத்தை அவர் கூறியிருக்கிறார். இதனைக் கூட்டணியில் பிளவு ஏற்படுத்தும் விஷயமாக எடுத்துக்கொள்ள முடியாது. ஒவ்வொரு கட்சிக்கும் ஒவ்வொரு கொள்கை, லட்சியம் உண்டு. அதனை அவர்கள் வெளிப்படுத்துவார்கள். எல்லோரையும் அரவணைத்துச் செல்லும் சூழ்நிலையில்தான் அதிமுக இருக்கின்றது. தேர்தலின்போதுதான் கூட்டணி குறித்துச் சொல்ல முடியும். இப்போது கூட்டணியில் பிரச்சினை இல்லை.

அதிமுக மாபெரும் இயக்கம். ஒற்றுமையுடன் மீண்டும் அதிமுக ஆட்சி அமைய உழைப்போம். புரட்சி தலைவர் எம்.ஜி.ஆர்,புரட்சி தலைவி அம்மா காலத்தில் இருந்த பலத்துடன் அதிமுக தற்போதும் இருக்கிறது. ஒவ்வொருவரும் ஒரு கருத்தைச் சொல்லலாம். அந்தக் கருத்தைச் சொல்வதாலேயே நாங்கள் பலவீனமடைந்துவிட்டதாகக் கருத முடியாது. எங்களின் தலைமையில்தான் கூட்டணி அமையும். சின்ன சின்னப் பிரச்சினை இருந்தாலும் தேர்தல் சமயத்தில் அவை சரியாகிவிடும்.இவ்வாறு அமைச்சர் டி.ஜெயக்குமார் தெரிவித்தார்.