தற்போதைய செய்திகள்

செண்பகத்தோப்பு அணையை சீரமைக்க ரூ.34 கோடி ஒதுக்கீடு செய்த முதல்வருக்கு என்றும் ஆதரவாக இருப்போம் – வி.பன்னீர்செல்வம் எம்.எல்.ஏ. பேச்சு

திருவண்ணாமலை

விவசாயிகளின் நலனுக்காக செண்பகத்தோப்பு அணையை சீரமைக்க 34 கோடி ரூபாய் ஒதுக்கீடு செய்த முதல்வருக்கு என்றும் ஆதரவாக இருப்போம் என்று போளுர் ஒன்றியத்தில் நடைபெற்ற நிகழ்ச்சியில் வி.பன்னீர்செல்வம் எம்.எல்.ஏ. பேசினார்.

திருவண்ணாமலை மாவட்டம் கலசப்பாக்கம் சட்டமன்ற தொகுதியில் உள்ள 495 கிளை கழகங்களுக்கும் தலா 5000 ரூபாய் நிதியுதவி வழங்கும் திட்டம் துவங்கப்பட்டு தொடர்ந்து கிளை கழகங்களுக்கு வி.பன்னீர்செல்வம் எம்.எல்.ஏ. நிதியுதவியை வழங்கி வருகிறார். கலசப்பாக்கம் தொகுதியில் உள்ள போளூர் ஒன்றியத்தில் 68 கிளைகள் உள்ளன. மேற்கண்ட கிளைகளுக்கு ரேணுகாபுரம் கிராமத்தில் தலா 5000 ரூபாய் வழங்கும் நிகழ்ச்சி நடைபெற்றது. இந்நிகழ்ச்சிக்கு வி.பன்னீர்செல்வம் எம்எல்ஏ தலைமை தாங்கி 68 கிளை கழகங்களுக்கும் தலா 5000 ரூபாய் வீதம் 3 லட்சத்து 40 ஆயிரம் ரூபாய் நிதியை தனது சொந்த பணத்தில் இருந்து வழங்கினார்.

பின்னர் வி.பன்னீர்செல்வம் எம்.எல்.ஏ. பேசியதாவது:-

முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் சிறப்பான ஆட்சி செய்து வருகின்றனர். மக்களின் பிரச்சனைகளை கண்டறிந்து உடனுக்குடன் செயல்படுத்தி வருகின்றனர். குறிப்பாக கொரோனா வைரஸ் பரவாமல் இருக்க பல்வேறு நடவடிக்கை எடுக்கப்பட்டு தமிழக மக்களை காப்பாற்றியுள்ளனர்.

கலசப்பாக்கம் தொகுதியில் உள்ள போளூர் ஒன்றியத்தை சேர்ந்த 68 கிளை கழகங்களும் தங்கள் பகுதி பிரச்சனைகள் எதுவாக இருந்தாலும் உடனுக்குடன் என்னிடம் தெரிவித்தால் தீர்க்கப்படும், நம் பகுதியில் உள்ள செண்பகத்தோப்பு அணையை சீரமைக்க தமிழக முதல்வர் 34 கோடி ரூபாய் நிதி ஒதுக்கீடு செய்து அப்பணி நடந்து வருகிறது. விரைவில் அணையில் தண்ணீர் தேக்கப்பட்டு விவசாயிகள் பலனடைய உள்ளனர்.

இந்த அணை திட்டம் கிடப்பில் போடப்பட்டிருந்தது என்று முதல்வரின் கவனத்திற்கு எடுத்து சென்றேன். விவசாயிகள் பிரச்சனை என்றவுடன் உடனடியாக தீர்வு செய்தார். ஆகையால் நாம் என்றும் முதல்வருக்கு ஆதரவாக இருக்க வேண்டும். படவேடு பகுதியில் 2 மாதத்தில் ஆரம்ப சுகாதாரம் அமைக்கப்பட்டு அதற்கு 108 ஆம்புலன்ஸ் சேவையும் விரைவில் செயல்படுத்தப்படும், கல்பட்டு மக்களின் நீண்டநாள் கோரிக்கையான கல்பட்டு ஊராட்சியினை இரண்டாக பிரிக்க வேண்டும் என்பது. அப்பணி நடைபெற்று வருகிறது.

இரும்புலி, கல்பட்டு என இரண்டாக பிரித்து அதற்கான அரசாணை விரைவில் வரும். இப்பகுதியில் பல பள்ளிகள் தரம் உயர்த்தப்பட்டும். புதிய பள்ளி கட்டடங்கள் கட்டப்பட்டும் வருகிறது. படவேடு ரேணுகாம்பாள் ஆலயத்திற்கு அன்னதானக்கூடம் புதியதாக கட்டப்பட்டு வருகிறது. மேலும் ஆலயத்திற்கு சுற்றுச்சுவர் கட்ட இந்து சமய அறநிலையத்துறை சார்பில் 1.5 கோடி ரூபாய் நிதி ஒதுக்கீடு செய்யப்பட்டுள்ளது. மேலும் கழக ஆட்சியில் எண்ணற்ற பணிகள் இப்பகுதிக்கு செய்யப்பட்டுள்ளது.

மேலும் தலைமையின் ஆணைக்கிணங்க இளைஞர் இளம்பெண்கள் பாசறை சார்பில் பூத் கமிட்டி அமைக்க வேண்டும் அதில் 25 பேர் உறுப்பினர்களாக சேர்க்கப்படுவார்கள். அதில் 15 பேர் நிர்வாகிகள், 10 பேர் உறுப்பினர்கள் ஆவர். 25 பேரில் 5 பெண்களை சேர்க்க வேண்டும். மேலும் இளைஞரணி, தகவல் தொழில் நுட்ப பிரிவு, அம்மா பேரவை ஆகிய அமைப்புகளுக்கு உறுப்பினர்கள் சேர்த்தல் வேண்டும். நாம் என்றும் கழக அரசு தொடர உறுதுணையாக இருப்போம்

இவ்வாறு வி.பன்னீர்செல்வம் எம்.எல்.ஏ. பேசினார்.

இந்நிகழ்ச்சியில் கல்குப்பம் ஊராட்சி மன்ற தலைவர் நளினிசுதாகர் கழகத்தில் இணைந்தார். மேலும் அப்பகுதியை சேர்ந்த 70 பேர் கழக தகவல் தொழில் நுட்ப பிரிவில் உறுப்பினர்களாக சேர்ந்தனர். நிகழ்ச்சியில் முன்னாள் எம்எல்ஏ நளினிமனோகரன், பொதுக்குழு உறுப்பினர் பொய்யாமொழி, படவேடு தலைவர் சீனிவாசன், குப்பம் தலைவர் அனிதாமுரளி, கழகத்தினர் அன்பழகன், ரகு, லோகநாதன், சின்னபையன், தனசேகர், உள்ளிட்ட ஏராளமானோர் கலந்து கொண்னர்.