சென்னை

அம்மாவின் ஆட்சி தொடர அனைவரும் கடுமையாக உழைக்க வேண்டும் – விருகை வி.என்.ரவி எம்.எல்.ஏ. வேண்டுகோள்

சென்னை

2021 சட்டமன்ற தேர்தலில் கழகமே வெற்றிபெற்று அம்மாவின் ஆட்சி தொடர அனைவரும் கடுமையாக உழைக்க வேண்டும் என்று தென்சென்னை தெற்குமாவட்ட கழக செயலாளர் வி.என்.ரவி எம்.எல்.ஏ வேண்டுகோள் விடுத்துள்ளார்.

தென்சென்னை தெற்கு மாவட்ட கழகம் சார்பில் இளைஞர் பாசறை மற்றும் இளம்பெண்கள் பாசறையில் தென் சென்னை தெற்கு மாவட்டத்திற்குட்பட்ட விருகம்பாக்கம், சைதாப்பேட்டை, மைலாப்பூர் மற்றும் வேளச்சேரி ஆகிய நான்கு பகுதிகளிலும் பாகம் வாரியாக உறுப்பினர்கள் சேர்க்கை பற்றி ஆலோசனை கூட்டம் நடைபெற்றது.

இந்த ஆலோசனை கூட்டத்திற்க்கு தலைமை தாங்கிய தென்சென்னை தெற்கு மாவட்ட கழக செயலாளர் விருகை வி.என்.ரவி எம்.எல்.ஏ பேசியதாவது:-

நமது இதயதெய்வம் அம்மா அவர்களின் மறைவுக்கு பிறகு அவர்களின் நல்வழியில் நமது முதல்வர் மற்றும் துணை முதல்வர் ஆகியோர் மிகசிறப்பான ஆட்சியை நம் தமிழகத்தில் நடத்தி வருகிறார்கள். மிக சிறப்பு என்று சொல்வதை விட நம்பர் 1 என்று சொல்லும் அளவில் எல்லா துறையிலும் முதலிடம் அல்லது அதை நோக்கி செல்லும் வகையில் நம் அம்மாவின் ஆட்சி அனைவரும் பாராட்டும் வகையில் செயல்பட்டுக் கொண்டு இருக்கின்றது.

யாரும் குறை கூறாத அளவில் நம் ஆட்சி செயல்படுகிறது. எதிர்க்கட்சியினர் அரசியல் காரணங்களுக்காக குறை கூறுகின்றனர். அதில் உண்மை இல்லை என்பது அவர்களுக்கே தெரியும். ஏதாவது ஒரு எதிர்ப்பை பதிவு செய்தால் தான் அரசியல் தளத்தில் நிற்க முடியும், இல்லை என்றால் மக்கள் மறந்து விடுவார்கள் என்று, ”நானும் உள்ளேன் ஐயா” என்கிற அளவில் தினமும் ஒரு அறிக்கை விட்டு கொண்டு இருக்கிறார்கள் என்பதை பொதுமக்களும், அரசியல் நோக்கர்களும் நன்கு அறிவார்கள்.

இந்த கொரோனா காலத்தில் இந்தியாவிலேயே மிக மிக சிறப்பாக செயல்பட்ட அரசு நம் அம்மாவின் அரசு என்பதை அனைவரும் அறிவீர்கள். இந்த இக்கட்டான நெருக்கடி நேரத்திலும் முதலீட்டாளர்கள் தாங்கள் தொழில் தொடங்க தேர்ந்தெடுத்த மாநிலம் நம் மாநிலம். அதற்கு நம் அம்மா அவர்களின் நல்லாட்சியே காரணம்.

ஆகவே 2021-ல் வருகின்ற சட்டமன்ற பொது தேர்தலிலும் நம் அம்மாவின் நல்லாட்சியே தொடர வேண்டும். இதற்கு நாம் அனைவரும் மிக கடுமையாக உழைக்க வேண்டும். முதல்வர், துணை முதல்வர் ஆகியோர் ஓய்வின்றி உழைத்து நம் மாநிலத்தை எல்லாவற்றிலும் முதன்மையாக்கி கொண்டு இருக்கிறார்கள்.

இந்த சாதனைகளை எல்லாம் நாம் ஒவ்வொரு வாக்காளரிடமும் கொண்டு போய் சேர்க்க வேண்டும். அந்த வகையில் நமது மாவட்ட தகவல் தொழில் நுட்பப் பிரிவில் நன்கு படித்த திறமை வாய்ந்தவர்களை திறனாய்வு தேர்வின் மூலம் ஒவ்வொருவரிடமும் நேர்காணல் செய்து தேர்ந்தெடுத்துள்ளோம். அவர்கள் தங்கள் பணியை சிறப்பாக செய்து கொண்டு இருக்கிறார்கள். இன்னும் சிறப்பாக செய்ய கழக ஒருங்கிணைப்பாளர் மற்றும் இணை ஒருங்கிணைப்பாளர் சார்பில் அன்புடன் வேண்டி கேட்டுக்கொள்கிறேன்.

அந்த வகையில் கழக ஒருங்கிணைப்பாளர் மற்றும் இணை ஒருங்கிணைப்பாளர் ஆகியோரின் சீரிய வழிகாட்டுதலின் படி ஒவ்வொரு பாகத்திலும் கழக இளைஞர் பாசறை மற்றும் இளம்பெண்கள் பாசறையை நாம் உருவாக்க வேண்டும். அதாவது ஒரு பாகத்தில் 25 பேர் கொண்ட இளைஞர் பாசறை மற்றும் இளம்பெண்கள் பாசறையை உருவாக்க வேண்டும்.அதில் 16 ஆண்கள் 9 பெண்கள் இருக்கும் வகையில் உருவாக்க வேண்டும். இதில் நிர்வாகிகளாக 9 பேர் இருக்க வேண்டும். 6 பேர் செயற்குழு உறுப்பினர்களாக இருக்க வேண்டும்.

நிர்வாகிகள் 9 பேரில் 7 பேர் ஆண்களாக இருக்க வேண்டும். 2 பேர் பெண்களாக இருக்க வேண்டும். செயற்குழுவில் உள்ளவர்கள் 4 பேர் ஆண்களாகவும், 2 பேர் பெண்களாகவும் இருக்க வேண்டும். நிர்வாகிகள் கீழ்க்கண்ட வகையில் இருக்க வேண்டும். அதாவது ஒரு தலைவர், இரண்டு துணைத்தலைவர், ஒரு செயலாளர், இரண்டு இணை செயலாளர்கள்(ஆண் ஒன்று, பெண் ஒன்று), இரண்டு துணை செயலாளர்கள் (ஆண் ஒன்று,பெண் ஒன்று) மற்றும் ஒரு பொருளாளர்.

இந்த பணிக்கு மிக சிறப்பாக செயல்படுபவர்களை நீங்கள் தேர்ந்தெடுத்து 10 நாட்களுக்குள் தர வேண்டும். தேர்தலின் போது இவர்களின் பணி மிக முக்கியமானது என்பது உங்களுக்கு தெரியும். அதற்கேற்றாற் போல் நீங்கள் சரியான நபர்களை தேர்ந்தெடுத்து மூன்றாவது முறையும் கழகமே ஆட்சி கட்டிலில் அமர வேண்டும் என்பதற்கேற்ப அனைவரும் இப்போதே தேர்தல் பணிகளை ஆரம்பிக்க வேண்டும் என்று கேட்டுக்கொள்கிறேன். நாளை நமதே, நல்லாட்சியும் நமதே.

இவ்வாறு விருகை வி.என்.ரவி எம்.எல்.ஏ. பேசினார்.

இந்த ஆலோசனை கூட்டத்தில் தென்சென்னை தெற்கு மாவட்ட கழக அவைத்தலைவர் ஆர்.ராஜேந்திரபாபு, இணை செயலாளர் ஏ.நூர்ஜஹான், பொருளாளர் கோ.சுவாமிநாதன், ஆர்.தேவகி, பகுதி செயலாளர்கள் டி.ஜெயச்சந்திரன், எம்.ஏ.மூர்த்தி, பிற அணி மாவட்ட செயலாளர்கள் எஸ்.விஜயபாஸ்கர், அபுபக்கர், பிடிசி எஸ்.செல்வம், கே.டி.தேவேந்திரன், ஏ.சோமசங்கரன், வி.எம்.சி. கோபி, கே.எஸ்.மனோகரன் வாண்டையார் மற்றும் ஏராளமான கழக நிர்வாகிகள் கலந்து கொண்டனர்.