தற்போதைய செய்திகள்

தூத்துக்குடி மாநகராட்சி பகுதியில் மழைநீர் அகற்றும் பணி தீவிரம் – அமைச்சர் கடம்பூர் செ.ராஜூ- எஸ்.பி.சண்முகநாதன் எம்.எல்.ஏ ஆய்வு

தூத்துக்குடி

தூத்துக்குடி மாநகர பகுதிகளில் தேங்கியுள்ள மழைநீரை அகற்றும் பணிகளை வடக்கு மாவட்ட கழக செயலாளரும், அமைச்சருமான கடம்பூர் செ.ராஜூ, தெற்கு மாவட்ட கழக செயலாளர் எஸ்.பி.சண்முகநாதன் எம்.எல்.ஏ ஆகியோர் ஆய்வு மேற்கொண்டனர்.

தூத்துக்குடி மாநகரில் பெய்த கனமழை காரணமாக தேங்கியுள்ள மழைநீரை மாநகராட்சியின் மூலம் மோட்டார் இன்ஜின் வைத்து அகற்றும் பணி நடைபெற்று வருகிறது. இப்பணிகளை மாவட்ட ஆட்சித்தலைவர் டாக்டர் செந்தில்ராஜ், கூடுதல் ஆட்சியர் விஷ்ணுசந்திரன், மாநகராட்சி ஆணையர் வி.ப.ஜெயசீலன், தூத்துக்குடி கோட்டாட்சியர் சிம்ரன்ஜீத் சிங் கலோன் ஆகியோருடன் சென்று வடக்கு மாவட்ட கழக செயலாளரும், செய்தி மற்றும் விளம்பரத்துறை அமைச்சருமான கடம்பூர் செ.ராஜூ, தெற்கு மாவட்ட கழக செயலாளரும், ஸ்ரீவைகுண்டம் தொகுதி சட்டமன்ற உறுப்பினருமான எஸ்.பி.சண்முகநாதன் எம்.எல்.ஏ ஆகியோர் ஆய்வு செய்தனர்.

பின்னர் தூத்துக்குடி பி.என்.டி.காலனி, பிரைண்ட் நகர், குறிஞ்சி நகர் உட்பட பல்வேறு இடங்களில் அமைச்சர் கடம்பூர் செ.ராஜூ, எஸ்.பி.சண்முகநாதன் எம்.எல்.ஏ ஆகியோர் பார்வையிட்டு மழைநீரை உடனடியாக அகற்றிட அதிகாரிகளுக்கு தகுந்த ஆலோசனைகள் கூறியதுடன், தற்போது மழைநீரால் பாதிக்கப்பட்டுள்ள பகுதிகளில் இனிவரும் காலங்களில் பெருமழை வந்தாலும் தண்ணீர் தேங்காதவாறு தார் சாலைகளை தரமானதாக அமைத்திட நடவடிக்கை எடுக்க வேண்டும் என்று அதிகாரிகளை கேட்டுக்கொண்டனர்.