தற்போதைய செய்திகள்

முதலமைச்சரின் சீரிய நடவடிக்கையால் மதுரை மாவட்டத்தில் நோய்தொற்று 2.5 சதவிகிதமாக குறைந்துள்ளது – அமைச்சர் ஆர்.பி.உதயகுமார் பெருமிதம்

மதுரை

முதலமைச்சரின் சீரிய நடவடிக்கையால் மதுரை மாவட்டத்தில் 20 சதவீதமாக இருந்த நோய்தொற்று தற்பொழுது 2.5 சதவிகிதமாக குறைந்துள்ளது என்று அமைச்சர் ஆர்.பி.உதயகுமார் பெருமிதத்துடன் தெரிவித்துள்ளார்.

மதுரை மாவட்டத்தில் உள்ள மாவட்ட ஆட்சியர் அலுவலகத்தில் பயனாளிகளுக்கு 1 கோடியே 72 லட்சம் மதிப்பில் வீட்டுமனை பட்டா , முதியோர் உதவித்தொகை உள்ளிட்ட பல்வேறு அரசின் நலத்திட்டங்களை வருவாய் பேரிடர் மேலாண்மை மற்றும் தகவல் தொழில் நுட்பவியல் துறை அமைச்சர் ஆர்.பி.உதயகுமார் வழங்கினார்.
இந்நிகழ்ச்சியில் மாவட்ட ஆட்சித்தலைவர் வினய், மாநகராட்சி ஆணையாளர் விசாகன், மாவட்ட வருவாய் அலுவலர் செல்வராஜ் ஆகியோர் பங்கேற்றனர். முன்னதாக அம்மா கிச்சனில் உள்ள உணவு கூடங்களை அமைச்சர் ஆர்.பி.உதயகுமார் ஆய்வு செய்தார்.

பின்னர் அமைச்சர் ஆர்.பி.உதயகுமார் செய்தியாளர்களிடம் கூறியதாவது;-

உலக வரலாற்றில் காணாத வகையில் கொரோனா தொற்று எவரும் யூகிக்காத வகையில் ஒரு அச்சுறுத்தலை உருவாக்கியுள்ளது. இந்த நோயை எதிர்கொண்டு மக்களை காக்கும் பல்வேறு நடவடிக்கையில் வல்லரசு நாடுகள் பலவும் தத்தளித்துக் கொண்டிருக்கின்றன. ஆனால் நமது இந்திய தேசத்தின் அன்னை தமிழகத்தில் நமது முதலமைச்சர் தீவிர நடவடிக்கை எடுத்து நோய் பரவலை கட்டுப்படுத்தியதோடு மட்டுமல்லாது இந்த நோய் பரவலின் ஆரம்ப நிலையை கண்டறிந்து அதற்கேற்றவாறு மருத்துவ சிகிச்சை அளித்து இந்த நோயை கட்டுப்படுத்துவதில் நமது முதலமைச்சர் முன்மாதிரியாக திகழ்கிறார்.

அதிலும் குறிப்பாக மதுரை மாவட்டத்தில் முதலமைச்சரின் அறிவுரைகளை கடைபிடித்து தொடர் நடவடிக்கை மேற்கொள்ளப்பட்டுள்ளது கடந்த 15 நாட்கள் வரை ஊரகப்பகுதியில் 1,770 காய்ச்சல் முகாம் நடத்தப்பட்டன. 57,547 நபர்கள் இந்த முகாமில் பரிசோதனை செய்து கொண்டனர். அதேபோல் மாநகராட்சி பகுதியில் 1,908 காய்ச்சல் முகாம் நடத்தப்பட்டன. 80,782 நபர்கள் இந்த முகாமில் பரிசோதனை செய்து கொண்டனர். ஆக மொத்தம் 3,678 காய்ச்சல் முகாம்கள் நடத்தப்பட்டதில் 1,38,850 மக்கள் தங்களை பரிசோதனை செய்து கொண்டனர். அதேபோல் முகாமில் 18,850 நபர்களுக்கு சாம்பிள் டெஸ்ட் எடுக்கப்பட்டுள்ளது.

கடந்த ஒரு மாதத்திற்கு முன்பு முதலமைச்சர் மதுரையில் ஆய்வு கூட்டம் நடப்பதற்கு முன்பு மிகவும் சவாலாக இருந்தது, முதலமைச்சர் வழங்கிய அறிவுரையால் தற்போது ஆரம்ப நிலை கண்டறியப்பட்டதால் மதுரை மாவட்டத்தில் படிப்படியாக இந்த நோய்த்தொற்று குறைந்துள்ளது.

மதுரை மாவட்டத்தில் இதுவரை பாதிக்கப்பட்டவர்கள் 13,290 நபர்கள். இதில் 12,300 நபர்கள் குணமடைந்து இல்லம் திரும்பியுள்ளனர். தற்போது அரசு இராஜாஜி மருத்துவமனை, காமராஜர் பல்கலைக்கழகம், தியாகராஜர் பொறியியல் கல்லூரி, வேளாண்மை கல்லூரி, தோப்பூர் அரசு மருத்துவமனை, காமராஜர் உறுப்புக்கல்லூரி, இஎஸ்ஐ மருத்துவமனை ரயில்வே மருத்துவமனை, தகவல் தொழில்நுட்ப பூங்கா ஆகிய இடங்களில் இருக்கும் படுக்கைகள் எல்லாம் தற்போது காலியாக உள்ளன என்பது நமக்கு மிகவும் ஆறுதலான செய்தியாக உள்ளது.

அதேபோல் உயிரிழப்பும் மதுரையில் குறைவு தான். வருகின்ற காலங்களில் இந்த தொற்று நோய் இல்லாத மதுரையாக உருவாக்குவது தான் எங்கள் லட்சியம். நிச்சயம் இந்த தொற்று நோய் இல்லாத மதுரை விரைவில் உருவாகும்.அதேபோல் மதுரையில் பரிசோதனை சாம்பிள் 3,500 எடுக்கப்பட்டு வருகிறது. சில மாதங்களுக்கு முன் மதுரையில் 5 சதவீதமாக இந்த நோய் தொற்று இருந்தது. அதன்பின் சில தளர்வுகளால் வேகமாக 20 சதவீதமாக உயர்ந்தது. மக்கள் அச்சப்பட தேவையில்லை என்று முதலமைச்சர் பல்வேறு அறிவுரைகளை மக்களுக்கும், மாவட்ட நிர்வாகத்துக்கும் வழங்கினார். முதலமைச்சரின் அறிவுரைகளை 100 சதவீதம் பின்பற்றியதால் இன்றைக்கு இந்த நோய்த்தொற்று மதுரை மாவட்டத்தில் 2.5 சதவீதமாக குறைந்துள்ளது. 37 மாவட்டத்தில் இந்த நோய் பரவலை எடுத்து கொண்டால் மதுரை மாவட்டத்தில் மிகவும் குறைந்துள்ளது.

அதுமட்டுமல்லாது தொடர்ந்து இரவு, பகல் பாராது கண்காணித்து முக கவசம் மற்றும் சமூக இடைவெளி கடைபிடித்தல் போன்ற விழிப்புணர்வு பிரச்சாரங்கள் செய்தல், அதேபோல் நோய் எதிர்ப்பு சக்தி மிக்க ஹோமியோபதி, சித்த மருத்துவம், அலோபதி, கபசுரக் குடிநீர் உள்ளிட்ட பல்வேறு நோய் தடுப்பு மருந்துகளை மக்களுக்கு வழங்கி பல்வேறு நோய் தடுப்பு பணியில் மதுரை மாவட்ட நிர்வாகம் சிறப்பாக மேற்கொண்டது.

அதிலும் மக்கள் நெருக்கமாக இருக்கும் இடங்களில் தனி கவனம் செலுத்தியும், அதேபோல் தென்மாவட்டங்களுக்கு காய்கறி வழங்கி வரும் பரவை மார்க்கெட் தோப்பூரில் உள்ள துணைகோள் நகரத்தில் இடமாற்றம் செய்யப்பட்டது. முதலமைச்சரின் வழிகாட்டுதல் படி இதுபோன்று நடவடிக்கை மேற்கொண்டதால் இன்று விலைவாசி எல்லாம் கட்டுக்குள் உள்ளது.

அதுமட்டுமல்லாது தொழிலதிபர்கள், விவசாயிகள், மகளிர் சிறு குழுக்கள் ஆகியோர் கொடுக்கும் கோரிக்கை எல்லாம் பரிசீலனை செய்யப்பட்டு மக்கள் கோரிக்கை எல்லாம் களத்தில் சென்று உரிய முறையில் நடவடிக்கை எடுக்கப்பட்டு வருகிறது. அதுமட்டுமல்லாது முதலமைச்சரின் அறிவுரைப்படி மக்கள் நலத் திட்டங்களான வீட்டுமனைப்பட்டா, நிவாரண உதவிகள், நலத்திட்ட உதவிகள், முதியோர் உதவித்தொகை, உழவர் பாதுகாப்பு திட்டத்தின் கல்விஉதவித் தொகை, விபத்து நிவாரண உதவி, அதேபோல் 100 நாள் வேலைவாய்ப்புத் திட்டம் என்று அனைத்து மக்கள் நலன் சார்ந்த திட்டங்கள் தங்குதடையின்றி மக்களுக்கு வழங்கப்பட்டு வருகிறது.

தென்மேற்கு பருவ மழையால் ஏற்படும் டெங்கு போன்ற காய்ச்சல் தடுக்க முழு கவனம் மேற்கொள்ளப்பட்டு வருகிறது அதேபோல் அக்டோபர், நவம்பர், டிசம்பர் மாதங்களில் வடகிழக்குப் பருவமழை காரணமாக முன் எச்சரிக்கை விடுக்கப்பட்டு வருகிறது. குறிப்பாக நீர் தேங்கும் பகுதிகள் கண்டறியப்பட்டு அதற்கான முன் எச்சரிக்கை நடவடிக்கை எடுக்கப்பட்டு வருகிறது. வெள்ளம் வரும் முன், வெள்ளம் சூழும்போதும், வெள்ளம் வடிந்த பின் என மூன்று நிலைகளிலும் கண்காணிப்பு நிலையங்கள் உருவாக்கப்பட்டு கண்காணிக்கப்பட்டு வருகிறது.

இன்றைக்கு நமது முதலமைச்சர் இந்தியாவில் எந்த மாநிலத்திலும் இல்லாத வகையில் மாவட்டம் தோறும் மாவட்ட ஆட்சியர் அலுவலகத்தில் இந்த நோய் தடுப்பு ஆய்வு மற்றும் நலத்திட்ட உதவிகள், முடிவற்ற பணிகளை திறந்து வைத்தும், புதிய பணிகளுக்கான திட்டங்களையும் துவக்கி வைக்கிறார். இந்தியாவில் எந்த முதலமைச்சரும் இதுபோன்ற மாவட்ட ஆட்சி அலுவலர் சென்று ஆய்வு கூட்டம் நடத்தியது இல்லை. ஒவ்வொரு நாளும் இந்த நோய் அச்சத்தைப் பற்றி எண்ணாமல் மாவட்டந்தோறும் ஆய்வுக் கூட்டம் நடத்தி வருகிறார். நாளை கூட கடலூர், நாகை, திருவாரூர் செல்கிறார்.

ஆய்வு கூட்டங்களில் மகளிர் சுய உதவிக்குழுக்களுக்கு கொரோனா சிறப்புக் கடன் வழங்குகிறார். தொழில் முதலீட்டாளர்களுக்கு தொழில் தொடங்க நிலம் மற்றும் அரசின் சார்பில் மானியம் ஆகியவற்றை வழங்குகிறார். விவசாயிகள் உற்பத்தி பொருட்களை சந்தைப்படுத்த பல்வேறு சலுகைகளை வழங்குகிறார். தொடர்ந்து தீர்க்கதரிசன முடிவுகளை எடுத்து தமிழக அரசியல் வரலாற்றில் முதலமைச்சர் ஒரு வியூகம் அமைத்து வருகிறார். இதற்கெல்லாம் நமது துணை முதலமைச்சர் ஊக்கமும் ஆக்கமும் அளித்து அவருக்கு உறுதுணையாக திகழ்ந்து வருகிறார்.

கோட்டையில் எந்த கோப்புகளும் நிலுவையில் இல்லை. கடைக்கோடியில் இருக்கும் மக்களுக்கு திட்டங்கள் சென்றிருக்கின்றது. அதுமட்டுமல்லாது இந்தியாவிலேயே தமிழகத்தில் 29 மாவட்டங்களிலும் அதிக தூரம் பயணம் செய்த ஒரே முதலமைச்சர் என்றால் நமது முதலமைச்சர் தான். இந்த நோய்க்கு இன்னும் மருந்து கண்டுபிடிக்க முடியவில்லை ஆனால் மருந்தே இல்லாத நோய்க்கு இந்தியாவிலேயே அதிகமானோர் குணமடைந்து உள்ளதும் நமது தமிழத்தில் தான். அதேபோல் இறப்பு சதவிகித்திலும் தமிழகத்தில் தான் குறைவு.

குறிப்பாக மதுரையில் கழக அம்மா பேரவை சார்பில் முதலமைச்சர், துணை முதலமைச்சர் ஆகியோரின் ஆணைக்கிணங்க அம்மா கிச்சன் தொடர்ந்து 54 நாட்களாக கொரோனா தொற்று நோய் உள்ளவர்களுக்கு உணவே மருந்து என்பது போல் ஆரோக்கியமான முறையில் மருத்துவர் ஆலோசனைப்படி அறுசுவை உணவு வழங்கப்பட்டு வருகிறது. இதற்கு தொடர்ந்து ஆக்கமும் ஊக்கமும் அளித்து வரும் அனைவருக்கும் எனது நன்றியினை தெரிவித்துக் கொள்கிறேன்.

இவ்வாறு அமைச்சர் ஆர்.பி.உதயகுமார் கூறினார்.