தற்போதைய செய்திகள்

திருவாரூருக்கு முதலமைச்சர் வருகை – முன்னேற்பாடுகள் குறித்து அமைச்சர் ஆர்.காமராஜ் ஆய்வு

திருவாரூர்

மாவட்ட வளர்ச்சித்திட்ட பணிகள் மற்றும் கொரோனா நோய் தடுப்பு பணிகள் குறித்து ஆய்வு மேற்கொள்ள முதலமைச்சர் திருவாரூர் வருகை தர உள்ளதையொட்டி அதற்கான முன்னேற்பாடு பணிகள் குறித்து உணவுத்துறை அமைச்சர் ஆர்.காமராஜ் ஆய்வு மேற்கொண்டார். இந்த ஆய்வின் போது மாவட்ட ஆட்சித்தலைவர் த.ஆனந்த், தஞ்சை சரக காவல் துணைத்தலைவர் ரூபேஷ்குமார்மீனா ஆகியோர் உடனிருந்தனர்.

பின்னர் அமைச்சர் ஆர்.காமராஜ் தெரிவிக்கையில், முதலமைச்சர் தமிழ்நாடு முழுவதும் அனைத்து மாவட்டங்களுக்கும் சென்று மாவட்ட வளர்ச்சித்திட்ட பணிகள் மற்றும் கொரோனா நோய் தடுப்பு பணிகள் குறித்து ஆய்வு மேற்கொண்டு வருகிறார். அந்த வகையில், திருவாரூர் மாவட்டத்திற்கு பல்வேறு திட்டங்களை வழங்கிய தமிழக முதல்வர் நாளை (இன்று) திருவாரூர் மாவட்ட ஆட்சியரகத்தில் வளர்ச்சித்திட்ட பணிகள் மற்றும் கொரோனா நோய் தடுப்பு பணிகள் குறித்து ஆய்வு மேற்கொள்ள உள்ளார் என்றார்.

அதனைதொடர்ந்து, மாவட்ட ஆட்சியரகத்தில் முதலமைச்சர் வருகையையொட்டி நடைபெறும் முன்னேற்பாடு பணிகளை பார்வையிட்டு அமைச்சர் ஆய்வு மேற்கொண்டார். இவ்ஆய்வின் போது மாவட்ட காவல் கண்காணிப்பாளர் எம்.துரை, மாவட்ட வருவாய் அலுவலர் செ.பொன்னம்மாள், உதவி செயற்பொறியாளர் (கட்டிடம்) சிங்காரவேலு மற்றும் அரசு அலுவலர்கள் கலந்து கொண்டனர்.