தற்போதைய செய்திகள்

புலம் பெயர்ந்த இளைஞர்கள் புதிய தொழில் துவங்க ரூ.1 லட்சம் கடன் உதவி – அமைச்சர் சி.வி.சண்முகம் வழங்கினார்

விழுப்புரம்

விழுப்புரம் மாவட்ட ஆட்சியர் அலுவலக கூட்டரங்கில் ஊரக வளர்ச்சி மற்றும் ஊராட்சித்துறை சார்பில் தமிழ்நாடு ஊரகப் புத்தாக்கத் திட்டத்தின் கீழ் கிராம வறுமை ஒழிப்பு சங்கத்தின் மூலம் நீண்ட கால கடனுதவியாக புலம் பெயர்ந்த இளைஞர்களுக்கு புதிய தொழில் துவங்க ரூ.1 லட்சத்திற்கான காசோலையினை சட்டம், நீதிமன்றங்கள், சிறைச்சாலைகள் மற்றும் கனிமவளத்துறை அமைச்சர் சி.வி.சண்முகம் வழங்கினார்.

விழுப்புரம் மாவட்டத்தில் தமிழ்நாடு ஊரக புத்தாக்கதிட்டத்தின் மூலம் காணை, கோலியனூர், முகையூர், திருவெண்ணெய்நல்லூர், வல்லம் மற்றும் விக்கிரவாண்டி ஆகிய வட்டாரங்களைச் சேர்ந்த 322 ஊராட்சிகளில் செயல்படுத்தப்பட்டு வருகிறது. இந்த ஆறு வட்டாரங்களில் கொரோனா காலத்தில் ஏற்பட்ட முழு முடக்கத்தால் புலம் பெயர்ந்து மீண்டும் சொந்த ஊர் திரும்பி வந்த திறன் பெற்ற இளைஞர்களுக்கு தொழில் துடங்குவதற்காக கிராம வறுமை ஒழிப்பு சங்கங்கள் மூலம் தலா ரூ.1 லட்சம் நீண்டகால கடனாக வழங்கப்படுகிறது.

விழுப்புரம் மாவட்டத்திற்கு 267 பயனாளிகளுக்கு நிதி ஒதுக்கீடு செய்யப்பட்டுள்ளது. தற்போது 25 நபர்கள் தேர்வு செய்யப்பட்டு நேற்று 15 பயனாளிகளுக்கு தலா ரூ.1 லட்சத்திற்கான காசோலையை அமைச்சர் சி.வி.சண்முகம் வழங்கினார்.

இந்நிகழ்வினில் மாவட்ட ஆட்சித்தலைவர் ஆ.அண்ணாதுரை, மாவட்ட காவல் கண்காணிப்பாளர் எஸ்.ராதாகிருஷ்ணன், கூடுதல் ஆட்சியர் (வருவாய்) ஸ்ரேயா.பி.சிங், திண்டிவனம் சார் ஆட்சியர் டாக்டர் எஸ்.அனு, மாவட்ட ஊரக வளர்ச்சி முகமை திட்ட இயக்குநர் வெ.மகேந்திரன், ஊரக வளர்ச்சி புத்தாக்க திட்டத்தின் மாவட்ட செயல் அலுவலர் வசந்தகுமார், இளம் வல்லுநர் அருண்குமார் திறன் மற்றும் வேலை வாய்ப்பு செயல் அலுவலர் முத்துகுமார், ராஜசேகர், கௌஸ் மற்றும் துறை சார்ந்த அலுவலர்கள் கலந்து கொண்டனர்.