தற்போதைய செய்திகள்

வரும் உள்ளாட்சி தேர்தலில் தி.மு.க. தோல்வி அடையும்- தூசி கே.மோகன் உறுதி

திருவண்ணாமலை

சட்டமன்ற தேர்தலில் தி.மு.க. பெற்ற வெற்றி தற்காலிகமானது தான். வரும் உள்ளாட்சித் தேர்தலில் அக்கட்சி தோல்வி அடையும் என்று திருவண்ணாமலை வடக்கு மாவட்ட கழக செயலாளர் தூசி கே.மோகன் கூறினார்.

திருவண்ணாமலை மாவட்டம் பெரணமல்லூர் ஒன்றியத்தில் இளைஞர் மற்றும் இளம்பெண்கள் பாசறையின் புதிய உறுப்பினர்களுக்கு அடையாள அட்டைகள் வழங்கும் நிகழ்ச்சி நடைபெற்றது.

பெரணமல்லூர் ஒன்றிய செயலாளர் செல்வராஜ் வரவேற்றார். இந்நிகழ்ச்சியில் முன்னாள் சட்டமன்ற உறுப்பினரும், திருவண்ணாமலை வடக்கு மாவட்ட கழக செயலாளருமான தூசி கே.மோகன் சிறப்பு விருந்தினராக பங்கேற்று பெரணமல்லூர் ஒன்றியத்தில் உள்ள 1819 புதிய உறுப்பினர்களுக்கு அடையாள அட்டைகளை வழங்கினார். இந்நிகழ்ச்சியில் அவர் பேசியதாவது:-

விரைவில் வர இருக்கின்ற உள்ளாட்சித்தேர்தலில் கழகம் வெற்றி பெற அனைவரும் சிறப்பாக பணியாற்ற வேண்டும். கடந்த சட்டமன்ற தேர்தலில் தி.மு.க.வின் வெற்றி தற்காலிகமானது தான். 1.5 சதவீத வாக்கு வித்தியாசத்தில் திமுக ஆட்சியை பிடித்துள்ளது. இது பெரிய வித்தியாசம் இல்லை.

எனவே கழக அரசு பலம் வாய்ந்த அரசாக செயல்பட்டது என்பதற்கு இதுவே ஒரு உதாரணம். கழகத்தை பொறுத்தவரை அதில் உறுப்பினராக இருப்பதே தொண்டர்களுக்கு பெருமைதான்.

கழக அரசின் அனைத்து திட்டங்களும் மக்களை சென்றடைந்துள்ளது. ஆகையால் வருகிற உள்ளாட்சித் தேர்தலில் சிறப்பாக பணியாற்றி கழகம் அமோக வெற்றி பெறும். தி.மு.க. தோல்வி அடையும்.

இவ்வாறு திருவண்ணாமலை வடக்கு மாவட்ட கழக செயலாளர் தூசி கே.மோகன் பேசினார்.