தற்போதைய செய்திகள்

மின்கட்டணத்தையும், முதலமைச்சரையும் பற்றி பேசுவதற்கு எந்த அருகதையும் இல்லை – செந்தில்பாலாஜிக்கு, அமைச்சர் பி.தங்கமணி மரண அடி

சென்னை

அரசியல் பிழைப்புத்தேடி பல கட்சிகளுக்கு பயணம் செய்து அலையும் பச்சோந்திக்கு மின்கட்டணத்தையும், முதலமைச்சரையும் பற்றி பேசுவதற்கு எந்த அருகதையும் இல்லை என்று செந்தில்பாலாஜிக்கு, அமைச்சர் பி.தங்கமணி மரண அடி கொடுத்துள்ளார்.

மின்கட்டணம் குறித்து உண்மைக்கு மாறான அறிக்கை வெளியிட்ட செந்தில் பாலாஜிக்கு மின்சாரத்துறை அமைச்சர் பி.தங்கமணியின் பதில் அறிக்கை வருமாறு:-

உலகத்தில் மனித குலத்திற்கே அச்சம் விளைவிக்கின்ற கொள்ளை நோய் கொரோனாவிலிருந்து தமிழக மக்களை காத்திட இரவு பகல் பாராது ஒட்டுமொத்த அரசும் ஓயாது உழைத்து வரும் வேளையில், தன் அரசியல் இருப்பை காட்டவும், தமிழக அரசின் மீதான வெறுப்பை கக்கவும், வடநாட்டு வாத்தியார் எழுதித்தருகிற அறிக்கைகளை நாளொன்றும் விடுத்து வருகிற தி.மு.க தலைவர் ஸ்டாலின், செய்யாறில் சசிகலா என்கிற இளம்பெண்ணை திமுகவின் இளைஞர் அணி பிரமுகர் பலாத்கார கொலை செய்ததை மக்களின் கவனத்திலிருந்து மடைமாற்றம் செய்ய, மின்சாரத்தின் பெயரில் அறிக்கை ஒன்றை வெளியிட, திட்டமிட்டு அதனை தன் பெயரில் வெளியிட வெட்கப்பட்டுக் கொண்டு, தங்கள் ஆட்சி காலத்தில் 18 மணி நேரம் அறிவிக்கப்பட்ட, அறிவிக்கப்படாத மின்வெட்டை நினைவு கூறும் விதத்தில், இருட்டை அடையாளப்படுத்தும் விதமாக அமாவாசை செந்தில் பாலாஜி பெயரில் வெளியிட்டிருக்கிறார்.

அவரும் தான் இருந்த இடத்தை பிடித்தால் புகுந்த இடத்தில் பிழைத்துக் கொள்ளலாம் என்னும் நப்பாசையோடு உண்மைக்கு மாறான செய்திகளோடு தரந்தாழ்ந்த விதத்தில் அவ்வறிக்கையை வெளியிட்டிருக்கிறார். உலகின் வல்லரசான அமெரிக்கா தொடங்கி, இங்கிலாந்து, இத்தாலி, ஸ்பெயின், பிரான்ஸ் உள்ளிட்ட ஐரோப்பிய நாடுகளே ஆச்சரியப்படும் விதத்தில் கொள்ளை நோய் கொரோனாவை அறிவியல் மருத்துவத்தோடு, அனுபவ மருத்துவத்தையும் கொண்டு உலக சுகாதார நிறுவனம், இந்திய மருத்துவ கவுன்சில் உள்ளிட்ட அமைப்புகள் எல்லாம் பாராட்டும் வகையில், கொரோனா தாக்குதலை கட்டுக்குள் கொண்டுவர எளிமைச் சாமானியர் எடப்பாடியாரின் அரசு அரும்பாடுபட்டு வருகிறது.

இந்தியாவிலேயே எந்த மாநிலத்திலும் இல்லாத அளவிற்கு கொரோனா பரிசோதனை கூடங்களை அமைத்து, அதிகமான கொரோனா பரிசோதனைகளை மேற்கொண்டு நோய் தொற்றிலிருந்து குணமாவோரின் எண்ணிக்கையை பன்மடங்காய் பெருக்கி இறப்பு சதவிகிதத்தை கட்டுக்குள் இருத்தி, தமிழக அரசு மேற்கொண்டு வரும் முனைப்பான நடவடிக்கைகளை நாடே, உளமாற பாராட்டுவதை பொறுக்க முடியாமல் அவதூறுகளையும், உண்மைக்கு மாறான புரளிகளையும், அமைதியை குலைக்கும் குந்தக நோக்குடைய குயுக்திகளையும் அறிக்கைகள் என்னும் பெயரில் திமுக நடத்துகிற அருவெறுப்பு அரசியலின் வரிசையில் இப்போது மின்கட்டணத்தை கூடுதலாக வசூலிப்பதாக செந்தில் பாலாஜியை வைத்து திமுக வெளியிட்டிருக்கும் அறிக்கை உண்மைக்கு மாறானது, பித்தலாட்டத்தின் மொத்தமானது.

இதுமட்டுமின்றி நாளொன்றுக்கு சுமார் 6 லட்சம் பேருக்கு அம்மா உணவகங்கள் மூலம் மூன்று வேளையும் சுவையான உணவு வழங்கி நோய் பிணி காலத்தில் பசிப்பிணி இல்லாத நிலையை உருவாக்கி தமிழகத்தை கொரோனா தொற்றிலிருந்து மீட்டெடுக்க போராடி வருவதும், பாசத்தாய் வழியிலான பரிவுடைய கழக ஆட்சி தான்.

மேலும், ஊரடங்கு காலத்தில் மக்கள் அனைவரும் அவரவர் வீடுகளிலேயே இருப்பதற்கு ஏதுவான நிலையை உருவாக்கியது, மின்தடை என்கிற சொல்லுக்கே அவசியமில்லா காலத்தை உருவாக்கிய கழக அரசு என்பதோடு, மின்கட்டணத்தை செலுத்துவதற்கான நெடிய அவகாசத்தை வழங்கியதும் கனிவுடைய கழக ஆட்சி தான். இதுவே திமுக ஆட்சியாக இருந்தால், அன்று அவர்கள் உருவாக்கி வைத்திருந்த தொடர் மின்வெட்டு சூழல், ஊரடங்கு என்பதையே இன்று கேலி பொருளாக்கியிருக்கும்.

ஆனால், மிகைமின் உற்பத்தி செய்கிற அளவிற்கு தமிழகத்தை மேன்மைமிக்க நிலையில் உயர்த்திக்காட்டியிருக்கும் அம்மா வழியிலான எடப்பாடியாரின் அரசு, இப்படி மின்கட்டணம் மட்டுமில்லாது, கூட்டுறவு வங்கிகளில், நிதி நிறுவனங்களில் பொதுமக்கள் பெற்ற கடன்களுக்கான மாதாந்திர கடன் தவணைகளையும் அவற்றை செலுத்துவதற்கான கால அவகாசத்தை உருவாக்கி கொடுத்து இடர் மிகுந்த இக்காலத்தை கடக்கவும், இன்னலுறும் மக்களுக்கு உதவிடவும் பேருதவி செய்து, பெரும் துணையாக நிற்கிறது என்பதை தமிழக மக்கள் நன்கு அறிவார்கள்.

ஊரடங்கு முழுமையாக கடைபிடிக்கப்பட்ட காலத்தில் குடும்ப அங்கத்தினர்கள் அனைவருமே வீடுகளில் இருந்ததாலும், அதனால் அவர்கள் பயன்படுத்தும் மின் அளவு கூடுதலாக இருக்கும் என்பது இயல்பு. மேலும், கொரோனா காலத்தில் வீடுகள், மற்றும் அலுவலகங்களுக்கு சென்று பயன்படுத்தப்பட்ட மின்சார அளவை கணக்கெடுப்பதில் உள்ள நடைமுறை சிரமங்களை கருத்தில் கொண்டு முதல் மாதத்தில் எடுக்கப்பட்ட மின் உபயோக அளவையே அடுத்தடுத்த மாதங்களுக்கு கணக்கிட்டு மின்கட்டணம் வசூலிக்கப் படுகிறது. இதனை கூடுதலாக வசூலிக்கிறார்கள் என்கிற உணர்வையும், அவப்பழியையும் அரசு மீது சுமத்த திமுக தொடர்ந்து திட்டமிட்டு, விஷம பிரச்சாரம் செய்து வருகிறது.

ஏதோ ஒருவருக்கு கூடுதல் கட்டணம் வந்துவிட்டதாக அறிக்கையில் குறிப்பிட்டிருக்கும் செந்தில் பாலாஜிக்கு மட்டுமல்ல, கூடுதல் கட்டணம் வந்திருப்பதாக குறிப்பிடப்படும் நபருக்கும் தெரியும், அதற்காக முறையீடு செய்து தனக்கான நியாயத்தை பெறுவதற்கான வழிமுறைகள் மின்சார வாரியத்தில் நுகர்வோர் குறைதீர்ப்பில் இருக்கிறது என்பதோடு, தவறிழைக்கப்பட்டிருந்தால் அதற்கான சட்ட முறையீடும் மின் பயனீட்டாளர்களுக்கு உண்டு என்பது அனைவருக்கும் தெரியும்.

அரிசியில் இருக்கிற ஒரு கல்லை வைத்துக்கொண்டு ஒட்டுமொத்த அரிசியையும் கல் என்று சித்தரிக்கப் பார்ப்பது திமுகவின் கடைந்தெடுத்த அரசியல் மோசடியாகும். அது மட்டுமல்லாமல், மின்துறை அமைச்சர் எந்த பதுங்கு குழியில் ஒளிந்திருக்கிறார் என்று தன் அறிக்கையில் நாகரீகமின்றி செந்தில் பாலாஜி செய்திருக்கும் பதிவுக்கு பதில் வேண்டுமானால், கொரோனா காலம் தொடங்கி இன்று வரை எத்தனை ஆய்வு கூட்டங்களை நான் நடத்தி இருக்கிறேன் என்பதையும், எவ்வளவு நிவாரணம் வழங்கும் நிகழ்ச்சிகளில் கலந்து கொண்டு ஏழை மக்களுக்கு உதவிக்கரம் நீட்டியிருக்கிறேன் என்பதையும், அது தொடர்பான செய்திகள் வெளிவந்த நாளிதழ்களையும் வாங்கி படித்து பார்த்து திருவாளர் அமாவாசை தெரிந்து கொள்ளலாம்.

விவசாயத்திற்கு பயன்படுத்தும் மின் கட்டணத்தை குறைக்க வேண்டுமென போராட்டம் நடத்திய விவசாய பெருங்குடி மக்களை, குருவி சுடுவதை போல சுட்டு வீழ்த்தியது அன்றைய தி.மு.க. ஆட்சி. இப்படி கொடுங்கோல் ஆட்சி நடத்திய தி.மு.க வின் வரலாறு தெரியாதா? அடிக்கடி நிறம் மாறும் பச்சோந்தி செந்தில் பாலாஜி மின்கட்டணத்தைப் பற்றி பேசுவது யாரை திருப்திப்படுத்த இவ்வாறு அறிக்கை வெளியிடுகிறார் என்பது அனைவரும் அறிந்ததே.

கொரோனா பரவலை தடுக்க தினமும் உரிய திட்டங்களை தீட்டி, பல்வேறு ஆலோசனைக் கூட்டங்களை நடத்தியும், பல மாவட்டங்களுக்கு சென்று ஆய்வுக் கூட்டங்கள் நடத்தியும், கொரோனா தடுப்புப் பணியில் தன்னை முழுமையாக ஈடுபடுத்தி பணியாற்றிவரும், சாமானிய விவசாய குடும்பத்தில் பிறந்த முதலமைச்சரை பார்த்து, ராஜ வாழ்க்கை வாழ்கின்றார் என்று வஞ்சக குணம் படைத்த செந்தில் பாலாஜி சொல்வது வேடிக்கையாக உள்ளது.

வீட்டை விட்டு வெளியே வராத தி.மு.க தலைவர் மு.க.ஸ்டாலினை புகழ்ந்து பாடி, தான் தி.மு.க. கட்சியில் தான் இருக்கிறேன் என்று வெளிக்காட்டிக் கொள்ளும் விதமாகவே செந்தில் பாலாஜி இந்த அறிக்கையை வெளியிட்டுள்ளார். போக்குவரத்துத்துறை அமைச்சராக இருந்தபோது, பணி வழங்குவதாக கூறி பலரிடம் பணம் பெற்றதற்காக வழக்கு பதிவு செய்யப்பட்டு, அதற்காக நீதிமன்ற முன் ஜாமீன் பெற்றிருக்கும் செந்தில் பாலாஜி, முதலமைச்சரைப் பற்றி பேச எந்த அருகதையும் கிடையாது.

மதிமுக.வில் தொடங்கி இன்றைய திமுக வரை பல கட்சிகளுக்கும் பயணம் செய்து அரசியல் பிழைப்பு தேடி அலையும், பச்சோந்தி செந்தில் பாலாஜிக்கு அரசியல் வாழ்வையும், அமைச்சர் பதவியையும் பிச்சையிட்டது அண்ணா திமுக.
அதற்காக நன்றி உள்ளவர் போல தீச்சட்டி தூக்கியதும், திமுகவை சட்டமன்றத்தில் தூற்றியதும், அம்மாவுக்காக அங்கப்பிரதட்சணம் செய்கிறேன் என்று உருண்டு புரண்டு நடித்ததை எல்லாம் உலகம் அறியும்.

எனவே, நா கூசாமல், நன்றி உணர்வு கடுகளவும் இல்லாமல், அண்ணா திமுகவையும், அம்மா அமைத்து தந்த அரசையும் வதந்திகள் பரப்பி வசைபாடுவது தரங்கெட்ட செந்தில் பாலாஜியின் குணங்கெட்ட நடத்தையையே காட்டுகிறது. நாங்கள் மக்களுக்காக உழைக்கிறோம், மக்கள் அமைத்து தந்த அரசின் மாண்பு காத்திட பாடுபடுகிறோம். திமுகவை போல ஓசி பிரியாணி, ஓசி தேங்காய், கடப்பா கல் என தொடங்கி, கற்பழிப்பு, கொலை வரை அரங்கேற்றி தொண்டூழியம் என்றும் பெயரிலே மக்களுக்கு தொல்லை தருகிற இயக்கம் அண்ணா திமுக அல்ல. இதனை அங்கே அகதியாய் போய் சேர்ந்திருக்கும் திருவாளர் அமாவாசை உணர்ந்து கொள்வது உத்தமம்.

இவ்வாறு அமைச்சர் பி.தங்கமணி தெரிவித்துள்ளார்.