தற்போதைய செய்திகள்

மேலநீலிதநல்லூர் தேவர் கல்லூரியை சட்டப்படி மீட்க உரிய நடவடிக்கை – அமைச்சர் கே.டி.ராஜேந்திரபாலாஜி பேட்டி

சங்கரன்கோவில்

தமிழக முதல்வர் மூலம் கேரளா குடும்பத்தினரிடமிருந்து பசும்பொன் முத்துராமலிங்கதேவர் கல்லூரியை மீட்க நடவடிக்கை எடுக்கப்படும் என்று சங்கரன்கோவிலில் அமைச்சர் கே.டி.ராஜேந்திரபாலாஜி தெரிவித்தார்.

சங்கரன்கோவில் அருகே மேலநீலிதநல்லூரில் பசும்பொன் முத்துராமலிங்கத் தேவர் கல்லூரி இயங்கி வருகின்றது. இந்த கல்லூரியை கேரளாவைச் சேர்ந்த ரமாதேவி என்பவர் நிர்வாகம் செய்து வருகிறார். தேவர் சமுதாயத்திற்காகவும் அந்தப் பகுதியைச் சேர்ந்த மக்களின் நலன்கருதி துவங்கப்பட்ட இந்த கல்லூரியை தனிநபர் ஆதிக்கத்தில் இருந்து மீட்க பல்வேறு அமைப்புகள் தொடர்ந்து போராடி வருகின்றது.

முன்னாள் மாணவர்கள் சங்கம், சட்டக்கல்லூரி மாணவர்கள் சங்கம், பல்வேறு தேவர் சமுதாய அமைப்புகள் மற்றும் அந்த பகுதி மக்கள் கல்லூரியை மீட்க தொடர்ந்து போராடி வருகின்றனர். இந்த நிலையில் கல்லூரியை மீட்டுக் கொடுக்க வலியுறுத்தி கல்லூரியில் 13 அமைப்புகள் இணைந்து நேற்று முன்தினம் போராட்டத்தில் ஈடுபட்டனர்.

இதனையறிந்த பால்வளத்துறை அமைச்சர் கே.டி.ராஜேந்திரபாலாஜி, ஆதிதிராவிடர் நலத்துறை அமைச்சர் வி.எம்.ராஜலட்சுமி ஆகியோர் பேச்சுவார்த்தை நடத்த போராட்டக் குழுவினருக்கு அழைப்பு விடுத்தனர். அதனைத் தொடர்ந்து சங்கரன்கோவில் பயணிகள் விடுதியில் போராட்டக் குழுவினருடன் அமைச்சர்கள் பேச்சுவார்த்தை நடத்தினர்.

அதனைத்தொடர்ந்து அமைச்சர் கே.டி.ராஜேந்திரபாலாஜி செய்தியாளர்களிடம் கூறியதாவது:-

தேவர் சமுதாய மக்களின் வளர்ச்சிக்காகவும் பல்வேறு சமுதாய மக்களின் நலனுக்காகவும் இந்த தேவர் கல்லூரி நிறுவப்பட்டது. ஆனால் இந்த கல்லூரி இன்றைக்கு தேவர் காலேஜ் என்பது மாறி நாயகர் என்ற நிலைமை உருவாகியுள்ளது. இந்தப் பகுதியில் உள்ள மாணவர்கள் மட்டுமல்ல அந்த கல்லூரியில் படித்த முன்னாள் மாணவர்கள் மற்றும் பல்வேறு சமுதாய அமைப்பினர் தனிநபர் ஆதிக்கத்திலிருந்து கல்லூரியை மீட்க போராட்டம் நடத்தி வருகின்றனர்.

பொன்னையா தேவரின் இரண்டாவது மனைவியான ரமாதேவி என்பவர் கேரளாவைச் சேர்ந்தவர் இந்த கல்லூரி நிர்வாகத்தை தற்போது கவனித்து வருகின்றார். இந்த கல்லூரி பிரச்சினை குறித்து அனைத்து விவரங்களும் முதல்வருக்கு நன்றாக தெரியும். கல்லூரியின் பிரச்சினை குறித்து அனைத்து ஆவணங்களுடன் என்னை வந்து சந்திக்குமாறு முதல்வர் என்னிடம் கூறினார். தற்போது 15 அமைப்புகள் சேர்ந்து கல்லூரி மீட்கக்கோரி அந்த கல்லூரி முன்பு போராட்டம் நடத்தி வருகின்றனர். அந்த போராட்டத்தை முடிவுக்கு கொண்டு வரும் வகையில் போராட்டத்தில் கலந்து கொண்ட முக்கிய நிர்வாகிகளிடம் நாங்கள் பேச்சுவார்த்தை நடத்தினோம்

கல்லூரி மீட்பு குழு நிர்வாகிகள், நாங்கள் மற்றும் அரசு அதிகாரிகள் முன்னிலையில் பேச்சுவார்த்தை நடைபெற்றது. சட்ட விதிகளுக்குட்பட்டு கல்லூரியை மீட்டு கல்லூரி மீட்புக் குழுவினர்களிடம் ஒப்படைப்பது தான் எங்களுடைய நோக்கமாக இருக்கும். பேச்சுவார்த்தை விவரங்களை அனைத்தும் சென்னை சென்று தமிழக முதல்வரிடம் எடுத்துக் கூறுவோம். கல்லூரி மீட்பு குழு நிர்வாகிகள் தமிழக முதல்வரை சந்திக்கவும் ஏற்பாடு செய்யப்பட்டுள்ளது.

எடுத்தேன் கவிழ்த்தேன் என்று அரசினால் முடிவெடுக்க முடியாது. எதிர் தரப்பைச் சேர்ந்தவர்கள் நீதிமன்றத்துக்கு செல்லவும் வாய்ப்புள்ளது. பிரச்சனை குறித்து கல்லூரி நிர்வாகத்திடம் பலமுறை பேச்சுவார்த்தை அழைத்தும் அவர்கள் வரவில்லை என்று பதிவாளர் தரப்பில் பதியப்பட்டுள்ளது. மூன்று முறை கல்லூரி நிர்வாகத்திடம் அழைப்பு விடுத்தும் அவர் பேச்சுவார்த்தைக்கு வரவில்லை. சட்டப்படி கல்லூரியை மீட்க உரிய நடவடிக்கை எடுக்கப்படும்.

தமிழக முதல்வர் எடப்பாடியாரின் நடவடிக்கைகள் அனைத்துமே பொதுமக்களுக்கு நன்மை தரக்கூடிய எந்த பிரச்சனையானாலும் காலதாமதமின்றி உடனடியாக நிறைவேற்றும் வகையில் பணியில் ஈடுபடுவார். அந்த வகையில் இந்த தேவர் கல்லூரி மீட்பு பிரச்சினையிலும் தமிழக முதல்வர் விரைவாக முடிவெடுப்பார்.

இவ்வாறு அமைச்சர் கே.டி.ராஜேந்திரபாலாஜி கூறினார்.