சிறப்பு செய்திகள்

ஆட்சி அதிகாரத்தில் தி.மு.க.வினர் தலையீடு-கழக ஒருங்கிணைப்பாளர் கண்டனம்

சென்னை, ஜூலை 16-

கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் வெளியிட்டுள்ள அறிக்கையில் கூறியிருப்பதாவது:-

ஆட்சி அதிகாரத்தில் கட்சியினரின் தலையீடு இருக்கக்கூடாது என்று வலியுறுத்தியவர் பேரறிஞர் அண்ணா. ஆனால், இன்று எல்லா மட்டத்திலும் தி.மு.க.வினரின் தலையீடு தலைவிரித்து ஆடுகிறது.

சில நாட்களுக்கு முன்பு தி.மு.க.வினர் சென்னை அடையாறில் உள்ள மாநகராட்சி அலுவலகத்திற்கு சென்று, தாங்கள் சொல்லும் நபர்களை களப்பணியாளர்களாக நியமிக்க வேண்டும் என்று அதிகாரிகளை மிரட்டியதை நான் எனது அறிக்கையின் வாயிலாக சுட்டிக்காட்டியவுடன், அதுபோல் நடைபெறாது என்ற உறுதிமொழியினை தமிழ்நாடு முதலமைச்சர் சென்னை மாநகராட்சி ஆணையர் வாயிலாக அளித்தார்.

இதனையடுத்து, இந்த பிரச்சினைக்கு முற்றுப்புள்ளி வைக்கப்பட்டாலும், தடுப்பூசி முகாம்களிலும், நியாயவிலை கடைகளில் டோக்கன் விநியோகிப்பதிலும், தி.மு.க.வினரின் தலையீடு தொடர்ந்து இருந்து வந்த நிலையில், தற்போது முதலமைச்சரின் வசமிருக்கும் காவல் துறைக்கும் சென்றிருக்கிறது.

திருச்சி மாவட்டம், மணப்பாறை அருகே முத்தபுடையான்பட்டியில் மணல் கடத்துவதாக காவல்துறைக்கு தகவல் வந்ததையடுத்து தனிப்படை அங்கு விரைந்து சென்று சோதனை நடத்தியதாகவும், அப்போது மணல் அள்ளிக்கொண்டிருந்த ஒரு ஜே.சி.பி. மற்றும் இரண்டு டிப்பர் லாரிகளை காவல் துறையினர் பறிமுதல் செய்ததாகவும், அவற்றின் ஓட்டுநர்களை காவல் நிலையத்திற்கு அழைத்து சென்று விசாரித்ததாகவும், விசாரணையின் போது, அந்த வாகனங்கள் மணப்பாறை கிழக்கு ஒன்றிய தி.மு.க. பொறுப்பாளர் ஆரோக்கியசாமிக்கு சொந்தமானவை என்று தெரிய வந்ததாகவும், அவர் கொடுத்த அழுத்தம் காரணமாக மூன்று ஓட்டுநர்களை காவல் துறையினர் விடுவித்ததாகவும், பறிமுதல் செய்யப்பட்ட வாகனங்களை அவர்கள் எடுத்து சென்று விட்டதாகவும், இதனைத்தொடர்ந்து மூன்று ஓட்டுநர்களையும், பறிமுதல் செய்யப்பட்ட வாகனங்களையும் காவல்துறையிடம் மீண்டும் ஒப்படைப்பது தொடர்பாக மணப்பாறை காவல்துறை துணை கண்காணிப்பாளர், தி.மு.க. ஒன்றிய பொறுப்பாளர் ஆரோக்கியசாமி வீட்டிற்கு சென்று நான்கு மணி நேரம் பேசியதாகவும், ஸ்ரீரங்கம் தொகுதி தி.மு.க. சட்டமன்ற உறுப்பினர் பழனியாண்டியும் இருதரப்பினரிடையே பேச்சு வார்த்தை நடத்தியதாகவும், கடைசியாக இரண்டு பழைய வாகனங்களை ஒப்படைக்க சம்மதித்ததாகவும், ஓட்டுநர்களை கடைசி வரை ஒப்படைக்கவில்லை என்றும் பத்திரிகைகளில் செய்திகள் வந்துள்ளன.

இதேபோன்று, புதுக்கோட்டை மாவட்டம், காரையூர் அருகே கீழத்தானியம் பகுதி கிராம நிர்வாக அலுவலர், கிராம உதவியாளர் ஆகியோர் மணல் கடத்தி வந்த லாரியை பிடிக்க முயற்சித்தபோது, லாரி ஏற்றி அவர்களை கொல்ல முயன்றதாகவும், அதிர்ஷ்டவசமாக அவர்கள் தப்பிவிட்டதாகவும், இருப்பினும், லாரியிலிருந்து மூவர் இறங்கி வந்து
அவர்களை தாக்கியதாகவும், இந்த மூவரில் ஒருவர் மட்டும் கைது செய்யப்பட்டுள்ளதாகவும், இருவர் தலைமறைவாகி விட்டதாகவும் இன்று (நேற்று) பத்திரிகைகளில் செய்தி வந்துள்ளது. இதுபோன்ற மணல் கடத்தல் சம்பவங்கள் ஆங்காங்கே நடைபெற்று வருவதாகவும் தகவல்கள் வருகின்றன.

சட்டம்-ஒழுங்கை காக்கும் பணியில் ஈடுபட்டிருக்கும் காவல்துறையினரை மிரட்டுவதும், வருவாய்த்துறை அதிகாரிகளை கொலை செய்ய முயற்சிப்பதும் கடும் கண்டனத்திற்குரியது. இந்த நிலை நீடித்தால் தமிழ்நாட்டில் சட்டம்-ஒழுங்கு சீரழிந்து, பொது அமைதிக்கு குந்தகம் ஏற்படும் வாய்ப்பு உருவாகும்.

எனவே முதலமைச்சர் இதில் உடனடியாக தலையிட்டு, காவல்துறையினரை மிரட்டிய திருச்சி மாவட்டம், மணப்பாறை கிழக்கு ஒன்றிய தி.மு.க. பொறுப்பாளர் ஆரோக்கியசாமி மீதும், புதுக்கோட்டை மாவட்டத்தில் வருவாய்த்துறை அதிகாரிகளை கொல்ல முயற்சித்தவர்கள் மீதும் சட்டப்படி வழக்குப்பதிவு செய்து அவர்களுக்கு உரிய தண்டனை பெற்றுத்தர நடவடிக்கை எடுக்குமாறும், இதுபோன்ற மணல் கடத்தல் சம்பவங்கள் மற்றும் காவல்துறை அதிகாரிகளை மிரட்டும் சம்பவங்கள் இனி நடைபெறாமல் பார்த்துக் கொள்ளுமாறும் கேட்டுக்கொள்கிறேன்.

இவ்வாறு கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் தெரிவித்துள்ளார்.