தற்போதைய செய்திகள்

பில்லூர் 3-வது குடிநீர் திட்ட பணிக்கு அடிக்கல்-எதிர்க்கட்சி கொறடா எஸ்.பி.வேலுமணி பூமிபூஜை

கோவை

கோவை மாநகராட்சியில் புதிதாக இணைக்கப்பட்டு விரிவாக்கப்பட்ட பகுதிகளுக்கு பவானி ஆற்றை நீராதாரமாக கொண்ட பில்லூர் மூன்றாவது குடிநீர் திட்டத்தின் மூலம் குடிநீர் அபிவிருத்தி திட்ட பணிகளை முன்னாள் அமைச்சரும், எதிர்க்கட்சி கொறடாவுமான எஸ்.பி.வேலுமணி எம்.எல்.ஏ பூமிபூஜை செய்து தொடங்கி வைத்தார்.

கோவை மாநகராட்சி பகுதிகளுக்கு சிறுவாணி மற்றும் பில்லூர் நீராதாரங்கள் வாயிலாக இருபெரும் கூட்டு குடிநீர் திட்டம் மூலமாக குடிநீர் வழங்கப்பட்டு வருகிறது.

ஆழியார் ஆற்றினை ஆதாரமாக கொண்டு குனியமுத்தூர்-குறிச்சி கூட்டு குடிநீர் திட்டமும், பவானி ஆற்றினை ஆதாரமாக கொண்டு கவுண்டம்பாளையம்-வடவள்ளி கூட்டுக்குடிநீர் திட்டங்கள் வாயிலாக குடிநீர் வழங்கப்பட்டு வருகிறது. மேலும் கோவை மாநகராட்சிக்கு நாளொன்றுக்கு உச்சபட்சமாக 318 மில்லியன் லிட்டர் குடிநீர் கூடுதலாகத் தேவைப்படுகிறது.

இதையடுத்து முன்னாள் அமைச்சரும், எதிர்க்கட்சி கொறடாவுமான எஸ்.பி.வேலுமணி எம்.எல்.ஏ முயற்சியால் கோவை மாநகராட்சியில் புதிதாக இணைக்கப்பட்ட பகுதிகளின் வளர்ச்சியை கருத்தில் கொண்டு கூடுதல் குடிநீர் தேவையை பூர்த்தி செய்யும் வகையில் கடந்த 2018-ம் ஆண்டு கழக ஆட்சியில் பவானி ஆற்றின் நீராதாரமாக கொண்டு கூட்டு குடிநீர் அபிவிருத்தி திட்டம் உத்தேசிக்கப்பட்டு 32.79 லட்சம் மக்கள் பயன்பெறும் வகையில் ஆணை வழங்கப்பட்டது.

இதையடுத்து கோவை மாநகராட்சி பகுதிகளில் புதிதாக இணைக்கப்பட்ட பகுதிகள் பயன்பெறும் வகையில் பவானி ஆற்றினை நீராதாரமாக கொண்ட பில்லூர் மூன்றாவது கூட்டு குடிநீர் திட்டம் மூலம் குடிநீர் வழங்க
கோவை மாவட்டம் மேட்டுப்பாளையம் சமயபுரம் அருகே பவானி ஆற்றில் செயல்படுத்த உள்ள குடிநீர் திட்ட பணிகளை கழக அமைப்புச் செயலாளரும், கோவை புறநகர் தெற்கு மாவட்ட செயலாளரும், முன்னாள் அமைச்சரும், எதிர்க்கட்சி கொறடாவுமான எஸ்.பி.வேலுமணி எம்.எல்.ஏ. அடிக்கல் நாட்டி பூமிபூஜை செய்து பணிகளை துவக்கி வைத்தார்.

இந்நிகழ்ச்சியில் கோவை புறநகர் வடக்கு மாவட்ட செயலாளர் பி.ஆர்.ஜி.அருண்குமார் எம்.எல்.ஏ, மாநகர் மாவட்ட செயலாளர் அம்மன் கே.அர்ச்சுணன் எம்.எல்.ஏ, கழக அமைப்பு செயலாளரும், மேட்டுப்பாளையம் தொகுதி சட்டமன்ற உறுப்பினருமான ஏ.கே.செல்வராஜ், மாநகர் மாவட்ட இளைஞரணி செயலாளர் கே.ஆர்.ஜெயராம் எம்.எல்.ஏ, முன்னாள் எம்.எல்.ஏ ஓகே.சின்ராஜ் உட்பட கழக நிர்வாகிகள் பலர் கலந்து கொண்டனர்.

இந்த திட்டத்தால் கோவை மாவட்டத்தில் 50 ஆண்டுகளுக்கு குடிநீர் தட்டுபாடு இருக்காது என்ற அளவிற்கு தொலைநோக்கு பார்வையுடன் செயல்படுத்தப்பட்ட இந்த திட்டம் செயல்படுத்தப்பட்டுள்ளது. கோவை மாவட்டத்தில் பல்வேறு திட்டங்களை கொண்டு வந்த முன்னாள் அமைச்சரும், எதிர்கட்சி கொறடாவுமான எஸ்.பி.வேலுமணிக்கு கோவை மாவட்ட மக்கள் பாராட்டுக்கள் தெரிவித்து வருகின்றனர்.