சிறப்பு செய்திகள்

பெண்களின் பாதுகாப்புக்கு அம்மா அரசு முன்னுரிமை – துணை முதலமைச்சர் ஓ.பன்னீர்செல்வம் உறுதி

சென்னை

பெண்களின் பாதுகாப்புக்கு அம்மா அரசு முன்னுரிமை அளித்து வருவதாக துணை முதலமைச்சர் ஓ.பன்னீர்செல்வம் தெரிவித்தார்.

சென்னையில் நடைபெற்ற பெண்களுக்கு எதிரான வன்முறைகளை களைவதற்கான பன்னாட்டு தின கருத்தரங்குத் தொடரின் நிறைவு நாள் நிகழ்ச்சியில் துணை முதலமைச்சர் ஓ.பன்னீர்செல்வம் சிறப்புரையாற்றியதாவது:-

பெண்களுக்கு எதிரான வன்முறைகளைக் களைவதற்கான பன்னாட்டு தின நிகழ்வாக, பெண்களுக்கெதிரான குற்றங்களை களையவும், அதனால் ஏற்படுகின்ற சிக்கல்கள் மற்றும் சவால்களை எதிர்கொண்டு வெற்றி காணவும், வழிவகைகளை உருவாக்கும் வகையிலான, கருத்தரங்குத் தொடரின் நிறைவு நாள் அமர்வில் கலந்து கொள்வதில் நான் உளமார மகிழ்கின்றேன்.

மகளிர் சமுதாயத்திற்கு அமைதியான, மன நிறைவான, முன்னேற்றமான வாழ்க்கையை வழங்குவதை நோக்கமாகக் கொண்டு நடத்தப்படும் இக்கருத்தரங்கிற்கு தலைமையேற்று நடத்துகின்ற நல்வாய்ப்பை எனக்களித்த அனைத்து நல் உள்ளங்களுக்கும் எனது வணக்கத்தையும், நன்றியையும் முதலில் தெரிவித்துக்கொள்கிறேன்.

தூய நிலவெனப் பிள்ளைகளைக் கொஞ்சி தமது தோளிலும், மார்பிலும் அவர்களைச் சுமந்து, அன்பினைப் பொழிந்து, ஆற்றலைக் கொடுத்து, தாய்மையிலே மனம் கனிந்திடும் தாய்க்குலத்தை, தனிச்சிறப்புடன் கொண்டாடியவர், மக்கள் திலகம் புரட்சித்தலைவர் எம்.ஜி.ஆர். தாயன்பின் தனி வடிவாய், உருமாறி, நிமிர்ந்த நன்னடையும் நேர் கொண்ட பார்வையுமாய், ஆண்களுக்கு சரிநிகர் சமானம் பெண்கள் என வாழ வழி வகுத்தவர், இதயதெய்வம் புரட்சித்தலைவி அம்மா அவர்கள்!

மகளிருக்கு மதிப்பளித்து, மரியாதை தந்து, அவர்தம் முன்னேற்றத்திற்கு, மக்கள் திலகம் எம்.ஜி.ஆர் அவர்களும்,
அம்மா அவர்களும் ஆற்றிய அரும்பணி போல், இங்கு மட்டுமல்ல, வேறு எந்த மாநில முதலமைச்சரும்
இதுவரை செயல்பட்டதில்லை என்று பெருமையோடு தெரிவித்துக்கொள்கிறேன்.

பெண்களின் முன்னேற்றமே சமுதாய முன்னேற்றத்திற்கு வழி வகுக்கும் என்பதை உணர்ந்து, இதயதெய்வம் புரட்சித்தலைவி அம்மா அவர்கள், பெண்களின் வளர்ச்சிக்கும், நல்வாழ்விற்கும் எண்ணிலா முன்னேற்ற திட்டங்களைத் தீட்டி செயல்படுத்தியதின் பயனாக, தமிழகம் கடந்த 10 வருடங்களாக பெண்களுக்கு பாதுகாப்பான மாநிலமாகவும்,
மற்ற மாநிலங்களுக்கு ஒரு முன்னுதாரணமாகவும் திகழ்ந்து வருகின்றது என்பதைச் சுட்டிக் காட்டுவதில், நான் பெருமகிழ்ச்சி அடைகின்றேன்.

“பெண்ணுக்கு ஞானத்தை வைத்தான்
புவிபேணி வளர்த்திடும் ஈசன்”

என்று பெண்ணின் பெருமையைப் புகழ்ந்து பாடிய மகாகவி பாரதி.,

“மண்ணுக்குள்ளே சில மூடர் – நல்ல
மாதர் அறிவைக் கெடுத்தார்”
என்று யதார்த்த நிலையை எடுத்துக் காட்டினார்.

மகாகவி பாரதி கூறியதைப் போல, மிதமிஞ்சிய ஆணாதிக்க மூட சிந்தனைகளாலும், பெண்களை அடிமை நிலையிலேயே வைத்திருக்கவேண்டும் என்று நினைக்கின்ற பழமை வாதிகளின் குறுகிய எண்ணங்களாலும் தான் நாட்டிலே பெண்களுக்கு எதிராக வன்முறைகளும், குற்றங்களும் உருவாகின்றன.

பெண்களது திறமைக்கு உரிய இடமளித்து அவர்களை உயர்த்திவிட்டால், தாங்கள் கீழ் நிலைக்கு தள்ளப்பட்டு விடுவோமோ, என்று குறுக்கு புத்தி மேலோங்கும் போது, பெண்களுக்கு எதிரான குற்றங்களும், வன்முறைகளும் பெருகிட காரணமாக அது அமைந்து விடுகின்றது. பெண்கள் சமுதாயத்திற்கு எதிரான இந்த அநியாயத்தை தட்டிக் கேட்க வேண்டியதும், அதைச் சீர்ப்படுத்தி பெண்களுக்கு, நீதி பெற்றுத் தர வேண்டியதும் நாகரிக உலகின் கடமை ஆகும்.

ஐக்கிய நாடுகள் சபையின் பொதுச் செயலாளர், பெண்களுக்கெதிரான வன்முறைகளைக் களைந்து அவற்றை முற்றிலும் ஒழித்திடத் தேவையான கொள்கைப் பரப்புதலை அதிகரிப்பதில் உலக நாடுகள் கவனம் செலுத்த வேண்டும் என்று அறைகூவல் விடுத்துள்ளார். ஐக்கிய நாடுகள் சபையின் நீடித்த, நிலையான வளர்ச்சி இலக்குகள், பெண்கள் மற்றும் பெண் குழந்தைகளுக்கு எதிராக நடைபெறும் வன்முறையை ஒழித்து அவர்களது நல்வாழ்வை உறுதிப்படுத்த, வலியுறுத்துகிறது.

இதன் அடிப்படையில், மகளிர் ஐக்கிய நாடுகள் அமைப்பானது, பாலின பாகுபாடு சார்ந்த வன்முறைகளை களைவதற்காக அவசர கால நடவடிக்கைகள், நிதி ஒதுக்கம், பெண்களுக்கு இழைக்கப்படும் வன்முறைகளை எதிர்கொள்ளல், அவை நிகழாது தடுத்தல் மற்றும் வன்முறை குறித்த தகவல் சேகரித்தல் ஆகியவற்றை உள்ளடக்கி, புது உலகம் படைத்திடும் நோக்கத்துடன்,

கொரோனா பெருந்தொற்று காரணமாக தற்போது ஏற்பட்டுள்ள பொருளாதார பின்னடைவைச் சீரமைத்து, பாலின சமத்துவத்தை எய்துவதற்குரிய வழிமுறைகள் மற்றும் கொள்கைகளை வகுத்திட, பெண்களுக்கு எதிரான வன்முறைகளை முற்றிலுமாக ஒழிப்புக்கான பன்னாட்டு தினம் கொண்டாடவும், ஆக்கப்பூர்வமான கருத்தரங்குகள் நடத்திடவும், அதன் வழி நடந்திடவும் திட்டமிட்டுத் தந்தது.

இதனைத் தொடர்ந்து, திட்டம் மற்றும் வளர்ச்சித் துறையின் சார்பில், முக்கிய துறைகளான உள்துறை, சமூக நலன், தமிழ்நாடு மகளிர் மேம்பாட்டு நிறுவனம் மற்றும் ஐக்கிய நாடுகள் மகளிர் அமைப்பின் இந்திய பிரிவு ஆகியவற்றுடன் இணைந்து, ஆறு நாட்களுக்கு மிகச்சிறப்பாக கருத்தரங்குத் தொடர் ஏற்பாடு செய்து, நிறைவாக இன்றைய நிகழ்ச்சியை நடத்தி வருவது மிகவும் பாராட்டுக்குரியதாகும்.

இதயதெய்வம் புரட்சித்தலைவி அம்மா அவர்கள், பெண்களுக்கான முன்னேற்றத்தினை விரைவுபடுத்திடும் வகையில் திட்டச் செயலாக்கத்தில் வியக்கத்தக்க பல புரட்சிகர மாற்றங்களைக் கொண்டு வந்தார். தாய்மார்களுடைய மகப்பேறு நிதியுதவியை அம்மா அவர்கள் கடந்த காலங்களில் ரூ.6000 என்று இருந்த நிலையை மாற்றி ரூ.12000 ஆகவும், மீண்டும் அதை ரூ.18000 ஆகவும், தங்களுடைய பொற்கால ஆட்சியில் கொண்டு வந்தார்.

அந்த தாய்மார்கள் பெண் குழந்தையை பெற்றெடுத்தால், அது மிகபெரிய சுமை என்று கருதிய சில மாவட்டங்களில் இருந்த கொடுமைகளை அம்மா அவர்கள் தடுத்து நிறுத்திட வேண்டுமென்று அம்மா அவர்கள் தொட்டில் குழந்தை திட்டத்தை 1996-97ல் முதன்முதலாக முதலமைச்சராக பொறுப்பேற்றபோது கொண்டு வந்தார்.

அந்த திட்டத்தின் பலனாக, சமூக நலத்துறை செயலாளர் சொன்னது போல், 5000க்கும் மேற்பட்ட குழந்தைகள் தொட்டிலில் கிடத்தப்பட்டு, அவர்கள் அரசின் மூலமாக, பெற்றோர்களே நீங்கள் வளர்ப்பதற்கு பெண் குழந்தைகளை விரும்பவில்லை என்றால் என்னிடம் தந்துவிடுங்கள், நான் வளர்த்து கொள்கிறேன் என்று அம்மா அவர்கள் இத்திட்டத்தை அறிவித்து, கிட்டத்தட்ட 5000க்கும் மேற்பட்ட குழந்தைகள் தொட்டிலில் கிடத்தப்பட்டு இன்றைக்கு அவர்கள் சீராக்கி வளர்க்கப்பட்டு, அவர்கள் பல்வேறு நிலைகளில் சமூகத்தில் மற்றவர்கள் போல் வாழ்கின்ற நிலை, அவர்கள் பட்டதாரிகளாக, ஆசிரியர்களாக பல்வேறு துறைகளில் இன்றைக்கு சமமாக முன்னேற்றத்தில் வாழ்கின்ற ஒரு சூழ்நிலையை ஏற்படுத்தியிருகின்றார் அம்மா அவர்கள்.

அந்த பெண்குழந்தையை சிசுவிலேயே அழித்திருந்தால் அவர்களுடைய நிலை என்னவாகியிருக்கும் என்பதனை உணர்ந்து தான் அம்மா அவர்கள் இத்திட்டத்தை கொண்டு வந்தார். அதற்காக தான் அன்னை தெரசாாவே அம்மா அவர்களின் இல்லம் தேடி வந்து, அம்மா அவர்களுக்கு நன்றி சொல்லிவிட்டு சென்றார் என்பது தான் வரலாறு.

பெண் குழந்தை பிறந்தால், அந்த பெண் குழந்தை பாதுகாப்பிற்கு, பெண் குழந்தை பாதுகாப்பு நிதியாக, அம்மா அவர்கள் வங்கிகளில் வைப்பீடு செய்து 18 வயது நிறைவு பெற்றவுடன், அந்த பெண்குழந்தைக்கு வட்டியுடன் சேர்த்து தரும் திட்டம்,

அந்த பெண்குழந்தை வளர்ந்து திருமண வயதை எட்டுகிறபொழுது, ஏழ்மையின் காரணமாக திருமணம் தடைபட்டுவிடக்கூடாது அல்லது காலம்தாண்டி சென்றுவிடக்கூடாது என்பதற்காக தாலிக்கு தங்கம் வழங்கும் திட்டத்தை அம்மா அவர்கள் அறிமுகப்படுத்தினார்.

அந்த திட்டம் முதலில் தாலிக்கு 4 கிராம் தங்கம், அம்மா அவர்களே, மீண்டும் அதனை 8 கிராமாக உயர்த்தி தருவதற்கு ஆணையிட்டார். பெண் கல்வியை ஊக்குவிக்க வேண்டும், ஆணுக்கு நிகராக பெண்கள் சமூகத்தில் கல்வி கற்க வேண்டும் என்பதனை அம்மா அவர்கள் உணர்ந்த காரணத்தினால் அந்த மணப்பெண், பட்டதாரி பெண்ணாக இருந்தால், திருமண நிதி உதவி ரூ. 50,000 வரை அம்மா அவர்கள் உயர்த்தி தந்தார் என்பது தான் வரலாறாக இன்றைக்கு பதிவு செய்யப்பட்டிருகிறது என்பதனை நான் இங்கே பெருமையோடு சுட்டிக்காட்டுவதற்கு கடமைப்பட்டிருகிறேன்.

அந்த பெண் இல்லத்தரசியாக வாழ்க்கையை கடைபிடிக்கும் போது அனைத்து தமிழக குடும்பங்களிலும் தாய்மார்கள் தான் எல்லா வேலையும் செய்ய வேண்டும், காலையில் இருந்து இரவு வரை சமையல் செய்வது, வாசல் தெளிப்பது, பிள்ளைகளை குளிப்பாட்டுவது, பள்ளிக்கு அனுப்புவது, புத்தகங்களை சுமந்து எடுத்து செல்வது, மீண்டும் சுமந்து வீட்டிற்கு, எடுத்து வருவது எல்லா வேலையும் அவர்களே செய்ய வேண்டும் என்பதை அம்மா அவர்கள் பார்த்தார்.

இல்லத்தரசிகளின் பணிசுமையை குறைக்க வேண்டும் என்று அம்மா அவர்கள், விலையில்லாத மிக்சி, கிரைண்டர், மின்விசிறி, தமிழகத்தில் இருக்கின்ற அனைத்து குடும்பங்களுக்கும் வழங்கப்படும் 5 ஆண்டுகளில் என்று சொல்லி, 5 ஆண்டுகளில் நிறைவாக அம்மா அவர்கள் வழங்கினார் என்பது தான் இன்றைக்கு வரலாறு. ஆக தேசிய அளவில் அதிக பெண் சுய உதவி முனைவோர் உள்ள மாநிலமாக தமிழகத்தில் மகளிர் சுயஉதவி குழுவை அம்மா அவர்கள் உருவாக்கினார்.

எனக்கு முன்னாள் டாக்டர் கல்பனா பேசிய போது ஒன்று சொன்னார். இந்த மகளிர் சுயஉதவி குழு ஒரு களமாக, ஒரு தளமாக உருவாக வேண்டுமென்று அவர் பேசியதில் சாரம் இருந்தது. நான் ஒரு படி மேலே போய் இந்த மகளிர் சுயஉதவி குழுக்கள் அல்லது அந்தந்த பகுதிகளிலே பெண்கள், பெண் குழந்தைகளுக்கு எதிராக நடைபெறுகின்ற வன்முறைகளுக்கு நீதி வழங்குகின்ற நீதிமன்றமாக செயல்பட வேண்டும் என்பதை நாம் உறுதி செய்ய வேண்டும் என்பதனை நான் இங்கு சுட்டிக்காட்ட கடமைப்பட்டிருகின்றேன்.

அம்மா அவர்களின் இந்த திட்டங்கள் எல்லாம், பெண்களுடைய முன்னேற்றத்திற்கு, பெண்களுடைய வாழ்வாதாரத்திற்கு பெண் கல்வியை ஊக்குவிக்க வேண்டும் என்றும், சர்வகாலமாக அம்மா அவர்களின் எண்ணமும் செயலும் முழுமையாக இருந்தது. எனக்கு முன்னால் பேசிய சமூக நலத்துறை செயலாளர் சொன்னார், சமூக நலத்துறையில் இருக்கின்ற அத்துணை பேருமே பெண்கள் தான், எங்களுடைய நிர்வாகத்தில் சிறப்பான முறையில் நாங்கள் செயலாற்றி கொண்டிருக்கின்றோம் என்று சொன்னார்.

நான் சிந்தித்து பார்க்கின்றேன், அரசின் 5 ஆண்டு பதவிகாலம் இருக்கின்ற நிலையில், ஏன் ஆண்கள் இரண்டரை வருடம், ஏன் பெண்கள் இரண்டரை வருடம் இந்நாட்டை ஆளக்கூடாது என்ற நிலையை இந்திய அரசியல் சட்டத்தின் மூலமாக அவர்களுக்கு வழங்கினால், ஆணுக்கு நிகர் சமம் என்ற நிலையை சமுதாயத்தில் அத்துணை, நிலைகளிலும் கொண்டு வருகின்ற பொழுது பெண்களுக்கு எதிரான வன்முறைகள், கூடுதல் காவல்துறை தலைவர் சீமாஅகர்வால் இங்கு எடுத்து கூறினார். புள்ளி விவரங்கள், எவ்வளவு பெரிய குற்றங்கள் பெண்களுக்கு எதிராக நடைபெற்று கொண்டிருக்கிறது

என்பதனையும், படிப்படியாக அரசின் மூலமாக களைந்து வருகிறது என்ற புள்ளி விவரங்களை சொன்னார். இப்படி ஆணுக்கு பெண் சமம் என்கிற நிலை அனைத்து நிலைகளிலும் கொண்டு வருகிற பொழுது, மிக பெரிய சமுதாய மாற்றம், மனித குலத்தில் உருவாக்கப்படுகிற ஆணாக இருந்தாலும் சரி, பெண்ணாக இருந்தாலும் சரி, ஆணுக்கு பெண் சமம் என்ற நிலையை உருவாக்க முடியும் என்ற ஒரு அடித்தளம் அமைகின்ற பொழுது, அது இயல்பாகவே ஒரு நல்ல வாய்ப்பு உருவாகும் என்பதனை என்னுடைய கருத்தாக இங்கு பதியவைக்க கடமைப்பட்டிருகிறேன்.

அந்த கருத்தின் அடிப்படையில் தான் இங்க பேசிய ஆஸ்திரேலிய நாட்டின் சூசன் பெர்குசன் ஒரு நல்ல கருத்தை இங்கு பதிய வைத்தார். பெண்களுக்கு எதிரான வன்முறையை ஒழிக்கும் செயல்கள் அனைத்துமே இன்றியமையாத செயல் என்று மாநில அரசுகள் அறிவிக்க வேண்டும் என்று ஒரு கருத்தை இங்கே பதிய வைத்தார். இந்த கருத்தின் அடிப்படையில் முதலமைச்சருடன் கலந்து பேசி அதற்குரிய வழிவகைகளை சட்டத்தின் மூலம் கொண்டு வருவதற்கு, என்னுடைய முயற்சியை நான் ஆற்றுவேன் என்பதனை இந்தகூட்டத்தில் தெரிவித்துக் கொள்ளக் கடமைப்பட்டிருக்கிறேன்.

ஆகவே நீதித்துறை, காவல் துறையில், பணிபுரிபவர்களுக்கு இதுகுறித்த ஆழ்ந்த அறிவு உருவாக்குவதற்கு தேவையான திறன் மேம்பாட்டு பயிற்சிகள் பெண்கள் சட்ட உதவிகளை நாடுவதற்கு வழிவகை செய்ய நிலையான வழிகாட்டு நெறிமுறைகள் ஆகியவைகளை மாநில அரசு வகுக்கவேண்டும் என்ற கருத்தை இங்கே பதிவு செய்திருக்கிறார்கள். அதனையும் முதலமைச்சரிடம் கலந்து பேசி, உரிய சட்ட உதவியினை பெண்கள் நாடுவதற்கு, வழிவகை செய்வதற்கு, எங்களுடைய முயற்சியும் இருக்கும் என்ற நல்ல செய்தியை நான் சுட்டிக்காட்ட கடமைபட்டிருகிறேன்.

நாகரீக உலகில் பெண்களுக்கு எதிரான வன்முறையானது ஒரு மனித உரிமை மீறலேயாகும். இதில் மாற்றுக்கருத்துக்கு இடமேயில்லை. வன்முறையால் பாதிக்கப்பட்ட பெண்கள் மற்றும் குழந்தைகளின் துயர் நீக்க நாம் மேற்கொள்ள வேண்டிய நடவடிக்கைகளை மேலும் அதிகரிக்க வேண்டிய நிலை இன்றைக்கு உள்ளது என்பதை நாம் அனைவரும் அறிவோம்.

பெண்களுக்கு எதிரான வன்முறைகள் மற்றும் அவர்கள் எதிர்கொள்ளும் மனித உரிமை மீறல்கள் ஆகியவை மேலும் தொடராத வகையில், தண்டனையை அதிகப்படுத்துதல் முதல் சமூக மனநிலையில் மாற்றம் ஏற்படுத்துவது வரை, முனைப்பான பல நடவடிக்கைகளை நாம் உடனடியாக மேற்கொள்ள வேண்டியுள்ளது. பெண்களுக்கு எதிரான வன்முறைகளைத் தடுத்து, பெண்களின் பாதுகாப்பை உறுதி செய்திடும் வகையில், விரைந்து காவல் உதவியை பெற்றிட ஏதுவாக,

பெண்கள் அவசர காலத்தில் தொடர்பு கொள்ள “காவலன் 100” என்ற காவல்துறை செயலி அம்மாவின் அரசால் அறிமுகப்படுத்தப்பட்டுள்ளதையும். இச்செயலி இளம்பெண்களிடையே மிகுந்த வரவேற்பை பெற்றுள்ளதையும் நாம் அனைவரும் நன்றாகவே அறிவோம். எனவே, வன்முறையை முற்றிலும் ஒழிப்பதே அம்மா அவர்களது அரசின் முன்னுரிமை செயல்பாடுகளில் ஒன்றாக இன்றைக்கு உள்ளது. இதுகுறித்து அலுவலர்களிடையே, கீழ் மட்டம் முதல் உயர்மட்டம் வரை போதிய அளவில் விழிப்புணர்வை உருவாக்குவது மிக, மிக, அவசியம்.

நமது குழந்தைகளிடையே ஆண், பெண் சமத்துவம் மற்றும் பெண்கள் வன்முறைகள் குறித்து ஆரம்ப கால பள்ளிப் பருவம் முதலே சரியான புரிதலை ஏற்படுத்த வேண்டியது இன்றைய கால கட்டத்தின் முக்கிய தேவையாக உள்ளது
இதன்மூலம் இப்பிரச்சினைகள் அடுத்த தலைமுறைகளுக்கு செல்லாமல் குறைத்திட முடியும் என்பதும், முற்றிலுமாக தடுப்பதற்கும் வழி வகுக்கும் என்பதும் என் உறுதியான கருத்தாகவே நான் பதிவு செய்ய கடமைப்பட்டிருகிறேன்.

சுய உதவி குழு சகோதரிகளுக்கு இது குறித்து தக்க விழிப்புணர்வு ஏற்படுத்துவதுடன், இப்பிரச்சனைகளை எதிர்கொண்டு வெற்றி கொள்ள போதிய பயிற்சிகளும் அவர்களுக்கு நிச்சயமாக வழங்க வேண்டும். வீட்டுக்குள் நடக்கும் குடும்ப வன்முறை மற்றும் பெண்களுக்கு எதிரான அனைத்து விதமான வன்முறைகளையும் குறித்து வாய் திறவாமல் இருக்கும் நிலை மாறி, இது வெட்கப்பட வேண்டிய செயல் என்று சமூகத்தினை உணரச் செய்து, அனைவரையும் ஒன்றிணைத்து, வலுவான ஒரு இயக்கமாக இதை செயல்படுத்த வேண்டிய கட்டாயத்தில் இன்றைக்கு நாம் இருக்கின்றோம்.
குறிப்பாக, சம்பந்தப்பட்ட துறைகளான காவல், சமூகநலம், ஊரக வளர்ச்சி மற்றும் உள்ளாட்சித்துறை, நகர்ப்புற மேம்பாட்டுத் துறை, கல்வி ஆகிய அனைத்து துறைகளும் ஒருங்கிணைந்து செயல்பட வேண்டும்.

ஒன்றுபட்டால் உண்டு வாழ்வு என்பதற்கு ஏற்ப, அனைவரும் ஒன்றிணைந்து செயல்பட்டால் நாம் உலகுக்கே முன்னோடியாக திகழலாம். பெண்கள் பாதுகாப்பில், புரட்சித்தலைவி அம்மாவின் அரசு எப்பொழுதும் முன்னிற்கும் என்று கூறிக்கொண்டு சிறப்பான முறையில், இக்கருத்தரங்குத் தொடரை ஏற்பாடு செய்து நடத்திய, திட்டம் மற்றும் வளர்ச்சித்துறை கூடுதல் தலைமைச் செயலர்,
தொடர்புடைய துறை அலுவலர்கள் மற்றும் பணியாளர்களுக்கு எனது இதயபூர்வமான பாராட்டுதலைத் தெரிவித்து கொள்கிறேன்.

இவ்வாறு துணை முதலமைச்சர் ஓ.பன்னீர்செல்வம் பேசினார்.

இந்நிகழ்ச்சியில் சமூகநலத்துறை அமைச்சர் டாக்டர் வி.சரோஜா, ஊரக வளர்ச்சி மற்றும் உள்ளாட்சித்துறை அரசு கூடுதல் தலைமைச் செயலாளர் ஹன்ஸ்ராஜ் வர்மா, திட்டம் மற்றும் வளர்ச்சித்துறை அரசு கூடுதல் தலைமைச் செயலாளர் ஜெயஸ்ரீ ரகுநந்தன், கூடுதல் காவல்துறை தலைவர் சீமா அகர்வால், சமூகநலம் மற்றும் சத்துணவு திட்டத்துறை செயலாளர் மதுமதி, பொருளியல் மற்றும் புள்ளியல் துறை ஆணையர் டாக்டர் அதுல் ஆனந்த், மாநில திட்ட வளர்ச்சி குழுமத்தின் துறைத்தலைவர் ஆர்.வி. சஜீவனா, காஞ்சிபுரம் மாவட்ட சமூக நலத்துறை அலுவலர் சாந்தி சரஸ்வதி, ஆவடி அனைத்து மகளிர் காவல்நிலைய, காவல் ஆய்வாளர் லதா, டிஐஐஎஸ் நிறுவன தலைமைப் பேராசிரியர் டாக்டர். பி.எம்.நாயர், சென்னை ஐஐடி இணைப் பேராசிரியர் கே.கல்பனா ஆகியோர் கலந்து கொண்டனர்.