சிறப்பு செய்திகள்

தமிழக மீனவர்களின் பாதுகாப்புக்கு அரசு உத்தரவாதம் அளிக்க வேண்டும்-கழக ஒருங்கிணைப்பாளர் வலியுறுத்தல்

சென்னை

இலங்கை கடற்படையால் அடிக்கடி தாக்கப்படுவதால் தமிழக மீனவர்களின் பாதுகாப்புக்கு அரசு உத்தரவாதம் அளிக்க வேண்டும் என்று கழக ஒருங்கிணைப்பாளர் ஓ.பன்னீர்செல்வம் வலியுறுத்தி உள்ளார்.

கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் வெளியிட்டுள்ள அறிக்கையில் கூறியிருப்பதாவது:-

அந்நிய செலாவணியை ஈட்டுவதிலும், புரத சத்துள்ள உணவை பெருக்குவதிலும், வேலைவாய்ப்புகளை உருவாக்குவதிலும் முக்கியப்பங்கு வகிக்கும் தொழில் மீன்பிடித்தொழில் என்றாலும், அந்த தொழிலை மேற்கொண்டு வரும் தமிழக மீனவர்கள் பல்வேறு இன்னல்களை, குறிப்பாக இலங்கை கடற்படையினரால், சந்தித்து வருகிறார்கள். எனவே, மீன் உற்பத்தியினை பெருக்குவது, மீனவர்களின் வருவாயினை பெருக்குவது என்பதோடு மட்டுமல்லாமல், அவர்களின் பாதுகாப்பினை உறுதி செய்வதும் தமிழ்நாடு அரசின் கடமையாகும்.

மீன்பிடி தடைக்காலம் முடிந்து, கடந்த மாதம் 30-ந்தேதி அன்று தான் மீனவர்கள் மீன்பிடிக்க கடலுக்கு சென்றுள்ளனர். அப்போதிருந்தே, தமிழ்நாட்டு மீனவர்கள் இலங்கை கடற்படையால் தாக்கப்படும் சம்பவங்களும், அவர்களுடைய வலைகள் அறுத்து கடலில் வீசியெறியப்படும் சம்பவங்களும் தொடர்ச்சியாக நடைபெற்று வருவதாக தகவல்கள்
வருகின்றன.

இந்த நிலையில், ராமேஸ்வரத்தில் இருந்து 17-07-2021 அன்று 400-க்கும் மேற்பட்ட விசைப்படகுகளில் இரண்டாயிரத்திற்கும் மேற்பட்ட மீனவர்கள் மீன் பிடிக்க கடலுக்கு சென்றதாகவும், அவர்கள் கச்சத்தீவு அருகே, தமிழ்நாட்டிற்கு உட்பட்ட பகுதியில், நடுக்கடலில் மீன் பிடித்து கொண்டிருந்தபோது மூன்று கப்பல்களில் வந்த இலங்கை கடற்படையினர் தமிழக மீனவர்களை மீன்பிடி தொழில் செய்யவிடாமல் விரட்டி, விரட்டி அடித்ததாகவும்,

மீன் பிடிப்பதற்காக படகுகளிலிருந்து மீனவர்கள் கடலில் விரித்திருந்த வலைகளை இலங்கை கடற்படையினர் அறுத்து கடலில் தூக்கிப்போட்டதாகவும், இதன் காரணமாக குறைந்த அளவு மீன்களுடன் கரை திரும்பக்கூடிய சூழ்நிலை ஏற்பட்டதாகவும் மீனவ மக்கள் தெரிவிக்கின்றனர். இலங்கை கடற்படையின் இதுபோன்ற அத்துமீறல் காரணமாக, ராமேஸ்வரம் பகுதியில் 700-க்கும் மேற்பட்ட படகுகள் உள்ள நிலையில், பாதிக்கும் குறைவான படகுகளே மீன்பிடிக்க சென்று வருவதாக செய்திகள் வருகின்றன.

இலங்கை கடற்படையினரின் இதுபோன்ற செயல் மீனவ மக்களிடையே அச்சத்தை ஏற்படுத்தி உள்ளதோடு மட்டுமல்லாமல், அவர்களின் வருமானமும் குறைந்து வருகிறது. இலங்கைக் கடற்படையினரின் தொந்தரவு இல்லாமல் மீன்பிடித் தொழிலை மேற்கொள்ளத் தேவையான நடவடிக்கைகளை அரசாங்கம் எடுக்க வேண்டும் என்பதே அப்பகுதி மீனவ மக்களின் எதிர்பார்ப்பாக இருக்கிறது.

எனவே தமிழ்நாடு முதலமைச்சர் இதில் உரிய கவனம் செலுத்தி, இலங்கை கடற்படையினரின் தொல்லை இல்லாமல் மீனவ மக்கள் மீன்பிடி தொழிலை மேற்கொள்ள நடவடிக்கை எடுக்க வேண்டும் என்றும், தேவைப்படின் மத்திய வெளியுறவுத்துறை அமைச்சகத்தின் உதவியை பெற்று, மீனவர்களின் வாழ்வாதாரத்திற்கும், பாதுகாப்பிற்கும் உத்தரவாதம் வழங்க வேண்டும் என்றும் கேட்டுக் கொள்கிறேன்.

இவ்வாறு கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் தெரிவித்துள்ளார்.