தற்போதைய செய்திகள்

வளசரவாக்கம் மண்டலத்தில் மக்கள் அதிகளவில் வெளியில் நடமாடுவதை தடுக்க வேண்டும் – அதிகாரிகளுக்கு, அமைச்சர் எம்.ஆர்.விஜயபாஸ்கர் உத்தரவு

சென்னை

வளசரவாக்கம் மண்டலத்தில் மக்கள் அதிகளவில் வெளியில் நடமாடுவதை முழுமையாக தடுக்க வேண்டும் என்று அதிகாரிகளுக்கு அமைச்சர் எம்.ஆர்.விஜயபாஸ்கர் உத்தரவிட்டுள்ளார்.

போக்குவரத்துத்துறை அமைச்சர் எம்.ஆர்.விஜயபாஸ்கர் நேற்று வளசரவாக்கம் மண்டலத்தில், கொரோனா தொற்று நோயை கட்டுப்படுத்திட மேற்கொள்ளப்பட்டு வரும் முன்னெச்சரிக்கை நடவடிக்கைகள் குறித்து ஆய்வு மற்றும் செய்தியாளர்களிடம் கூறியதாவது:-

வளசரவாக்கம் மண்டல (11வது மண்டலம்) அலுவலக வளாகத்தில், கொரோனா தொற்று நோயினை கட்டுப்படுத்திட மேற்கொள்ளப்பட்டுவரும் முன்னெச்சரிக்கை நடவடிக்கைகள் குறித்து, போக்குவரத்துத்துறை அமைச்சர் எம்.ஆர்.விஜயபாஸ்கர் ஆய்வு மேற்கொண்டார். இந்நிகழ்வில், ஊரகத் தொழிற்துறை அமைச்சர் பா.பென்ஜமின் பங்கேற்றார்.

மேலும், கண்காணிப்பு அலுவலர் வெங்கடேசன் தலைமையில், ஊரக தொழிற்துறை அமைச்சர் பா.பென்ஜமின் ஏற்பாட்டின் பேரில் நடைபெற்றது. இந்த கூட்டத்தில், முன்னாள் அமைச்சர், துணை ஆணையர் முத்துசாமி, துணை ஆணையர் ஜெயராமன் லியாத் உதின் மற்றும் சுகாதரத்துறை, காவல்துறை, நகராட்சி நிர்வாகம் தொடர்புடைய அனைத்து அலுவலர்களும் கலந்து கொண்டனர்.

அதனைத் தொடர்நது, அம்மண்டலத்தில் அம்மா உணவகத்தில் பணியாற்றும் பணியாளர்களுக்கு அரிசி, பருப்பு மற்றும் சேலை உள்ளிட்ட அத்தியாவசியப் பொருட்களை அமைச்சர்கள் வழங்கினார். பின்னர், ஆலப்பாக்கம் மீனாட்சியம்மாள் பல் மருத்துவமனையில் கொரோனா தொற்று உள்ள 200 நபர்களை தங்க வைத்திட மேற்கொள்ளப்படும் நடவடிக்கைகளை பார்வையிட்டனர்.

மேலும், 147-வது வட்டம் தேவி கருமாரியம்மன் தெருவில் உள்ள மருத்துவ முகாமினை பார்வையிட்டு, 143-வது வட்டம் நொளம்பூர், மார்க் கிரிகோரியஸ் கல்லூரியில் நோய் தொற்று (A –Symptomatic) அறிகுறியுடன் தங்க வைக்கப்பட்டுள்ளவர்களை பார்வையிட்டு, அதே பகுதியில் 200க்கும் மேற்பட்ட தூய்மை பணியாளர்கள் மற்றும் ஆட்டோ ஓட்டுநர்களுக்கு தேவையான அத்தியாவசிய பொருட்களை வழங்கினார்.

பின்னர் அமைச்சர் எம்.ஆர்.விஜயபாஸ்கர் செய்தியாளர்களிடம் தெரிவித்ததாவது:-

புரட்சித்தலைவி அம்மாவின் நல்லாசியுடனும், முதலமைச்சர் மற்றம் துணை முதலமைச்சர் ஆகியோரின் மேலான உத்தரவிற்கிணங்க, சென்னை மாநகரத்தில் வளசரவாக்கம் மண்டலத்தில் (மண்டலம் 11) கொரோனா தொற்று நோய் தடுப்பு குறித்த ஆய்வு கூட்டத்தில், இதுவரை எடுக்கப்பட்ட நடவடிக்கைகள், இனி எடுக்கவிருக்கும் நடவடிக்கைகள் குறித்து ஆய்வு செய்யப்பட்டது. வளசரவாக்கம் (மண்டலம் -11) மண்டலத்தில் நாளது வரையில், 4,327 நபர்களுக்கு கொரோனா பரிசோதனை செய்யப்பட்டுள்ளது. இதில் 1,385 நபர்களுக்கு வைரஸ் தொற்று உறுதி செய்யப்பட்டுள்ளது. இவர்களில் 827 நபர்கள் நோயிலிருந்து குணமடைந்து வீடு திரும்பியுள்ளனர்.

மேலும், 120 நபர்கள் தங்கள் வீடுகளிலேயே தனிமைப்படுத்தப்பட்டு கண்காணிக்கப்பட்டு வருகின்றனர். கொரோனா சிறப்பு மையங்களில் 248 நபர்களும், மருத்துவமனைகளில் 168 நபர்களும் சிகிச்சை பெற்று வருகின்றனர். இதுவரை, பாதுகாப்பு நடவடிக்கையாக ஏறத்தாழ 2 லட்சத்து 15 ஆயிரம் முகக்கவசங்கள் வழங்கப்பட்டுள்ளன. மேலும், கபசுர குடிநீர் 50 கிராம் அடங்கிய 54,200 பாககெட்டுகளும் வீடுகளுக்கு வழங்கப்பட்டுள்ளதோடு, நிகழ்விடத்திலேயே தயார் செய்யப்பட்டும் வழங்கப்பட்டுள்ளது.

அதே போன்று, முன்னெச்சரிக்கை நடவடிக்கையாக இரண்டு கல்லூரிகளில் 300 படுக்கைகள் தயார் நிலையில் வைக்கப்பட்டுள்ளது. மேலும், கொரோனா வைரஸ் பரவுவதை தடுப்பதற்காக வீடுகளில் தனிமைப்படுத்தப்பட்டுள்ளவர்களை கண்காணிப்பதற்கு 10 நபர்களுக்கு ஒருவர் என்ற விகிதத்தில் ஒப்பந்த அடிப்படையிலான பணியாளர்கள் மூலம் கண்காணிப்பு நடவடிக்கைகளை துரிதப்படுத்தியுள்ளோம். நாளது வரையில், 235 மருத்துவ முகாம்கள் நடத்தப்பட்டுள்ளன. இதனை மேலும் விரிவுப்படுத்திடும் பொறுட்டு, தினந்தோறும் இந்த வளசரவாக்கம் மண்டலத்தில் மட்டும் 31 மருத்துவ முகாம்கள் கடந்த 3 நாட்களாக தொடர்ந்து நடத்தப்பட்டு வருகிறது.

முதலமைச்சர் அறிவித்த 12 நாள் முழு ஊரடங்கினை முழுமையாக செயல்படுத்தி, கொரோனா பரவலை முழுமையாக தடுத்திட தொடர் நடவடிக்கைகள் எடுக்கப்பட்டுள்ளது. அந்தவகையில், காவல்துறையினர் குறைந்த அளவிலான தெருக்களை ஆய்வு அரண்கள் அமைத்து கண்காணித்திட வேண்டும். பொதுமக்கள் அதிக அளவில் வெளியில் நடமாடுவதை முழுமையாக தடுத்திடல் வேண்டும்.

பொதுமக்கள் அத்தியாவசிய மற்றும் மருத்துவத் தேவைகளுக்காக மட்டுமே வெளியில் வர வேண்டும் என்பதை காவல்துறையினர் வாயிலாக அறிவுறுத்தப்பட்டுள்ளது. மேலம், இந்த மண்டலத்தில் 2,885 நபர்கள் பராமரிப்பு பணியில் ஈடுபடுத்தப்பட்டுள்ளனர். தேவைக்கு ஏற்ப புதிய ஆட்களை தேர்வு செய்து கொரோனா தடுப்பு நடவடிக்கையில் ஈடுபடுத்துவதற்கு தேவையான நடவடிக்கைகள் தொடர்ந்து எடுக்கப்பட்டு வருகின்றன.

சுகாதாரத் துறை மூலமாக தேவையான கிருமி நாசினிகள், சானிடைசர், தெளிப்பான் வாகனங்கள், முகக்கவசங்கள் மற்றும் கையுறைகள் போன்றவை தேவைக்கு ஏற்ப வழங்கப்பட்டுள்ளன. மேலும், கூடுதலாக தேவைப்பட்டால், அதனை முதலமைச்சரின் கவனத்திற்கு எடுத்துச் சென்று வழங்கிட ஆவன செய்யப்படும். இந்த மண்டலத்தில் நோய் பரவலை முழுமையாக கட்டுக்குள் கொண்டு வர தேவையான அனைத்து முன்னெச்சரிக்கை நடவடிக்கைகளும் தொடர்ந்து எடுக்கப்பட்டு வருகிறது.

கொரோனா நோய் தொற்றானது, தமிழகத்தில் சென்னையை தவிர மற்ற பகுதிகளில் கட்டுக்குள் உள்ளது. சென்னை அதிக மக்கள் தொகை கொண்டுள்ள, மிகவும் நெருக்கமாக மக்கள் வசிக்கக்கூடிய நகரம் என்பதால் அதிகமாக பரவி வருகிறது. இப்பரவலை கட்டுப்படுத்திட, மீண்டும் 12 நாட்களுக்கு முழு ஊரடங்கு உத்தரவு பிறப்பிக்கப்பட்டுள்ளது. முகக்கவசம் அணிதல், தனிநபர் இடைவெளியினை கடைபிடித்தல் போன்ற விழிப்புணர்வினை மக்களிடம் ஏற்படுத்தினால் மட்டுமே இந்நோய் தாக்கத்தினை கட்டுக்குள் கொண்டுவர இயலும்.

இதற்காக, பிரச்சார வாகனங்கள் வாயிலாக கல விளம்பரப் பணியும் தொடர்ந்து மேற்கொள்ளப்பட்டு வருகிறது. இளைஞர்கள் இருசக்கர வாகனங்களில் சுற்றுவதை குறைக்க வேண்டுமென ஊரக தொழில்துறை அமைச்சர் வலியுறுத்தியுள்ளார். இந்த 12 நாட்கள் முழு ஊரடங்கினை பொதுமக்கள் முழுமையாக கடைபிடித்து சென்னையில் நோய் தொற்று பரவுதலை குறைத்திட தங்களின் ஒத்துழைப்பினை நல்க வேண்டும்.

இவ்வாறு அமைச்சர் எம்.ஆர்.விஜயபாஸ்கர் தெரிவித்தார்.

பின்னர் செய்தியாளர்களின் கேள்விகளுக்கு அமைச்சர் அளித்த பதில் வருமாறு:-

கேள்வி: போக்குவரத்துக் கழக ஊழியர்களுக்கு கொரோனா தொற்று பரவி வருவது குறித்தும், செய்யாறு பணிமனை மூடப்பட்டுள்ளது குறித்தும்?

பதில்: போக்குவரத்துக் கழக பணியாளர்களுக்கு தேவையான முகக்கவசங்கள், சானிடைசர்கள் மற்றும் கையுறைகள் வழங்கப்பட்டுள்ளன. தற்போது, இந்த ஆய்வு கூட்டத்தில் கலந்து கொண்ட காவல்துறை அதிகாரிகளான உதவி ஆணையர் மற்றும் துணை ஆணையர் ஆகியோருக்கு கொரோனா நோய் தொற்று உறுதி செய்யப்பட்டு, மருத்துவமனையில் உரிய சிகிச்சை பெற்று மீண்டும் பணிக்கு திரும்பியுள்ளனர். நோய்த்தொற்று ஏற்பட்டுள்ள போக்குவரத்துக் கழக ஓட்டுநர், நடத்துநர்களுக்கு உரிய முறையில் சிகிச்சை அளிக்கப்பட்டு வருகிறது.

கேள்வி: நோய் தொற்று ஏற்பட்டுள்ள பணியாளர்களுக்கு நிவாரண உதவித் தொகை வழங்குவது குறித்து?

பதில்: முதலமைச்சர் அறிவித்துள்ளவாறு, முழு ஊரடங்கு அறிவித்துள்ள பகுதிகளில் உள்ள அனைவருக்கும் நிவாரணத் தொகை வழங்கப்படும்.

கேள்வி: கட்டுப்படுத்தப்பட்டுள்ள பகுதியாக அறிவிக்கப்பட்டுள்ள இடங்களை கண்காணித்திட உரிய நபர்கள் நியமிக்கப்பட்டுள்ளனரா?

பதில்: ஒரு பகுதியில் ஒரு பால் கடை, மளிகை கடை மற்றும் மருந்தகம் இருந்தால் அந்த பகுதியை மட்டும் முடக்கம் செய்யுமாறு அறிவுறுத்தப்பட்டுள்ளது. ஏனெனில், அவர்களுக்கு தேவையானதை அந்தந்த பகுதிகளிலேயே வாங்கிக் கொள்ளலாம். இவற்றை தவிர்த்து வேறு இடத்திற்கு சென்றால் நடமாட்டம் அதிகாரித்து நோய் தொற்று அதிகரிக்கும். இதனை தவிர்த்திட வேண்டும்.

கேள்வி: அம்பத்தூர் போன்ற தொழிற்பேட்டை பகுதிகளில் எடுக்கப்பட்டு முன்னெச்சரிக்கை நடவடிக்கைகள் குறித்து?

பதில்: அம்பத்தூர் பகுதிகளில் வெளி மாநிலத்திலிருந்து வந்து பணிபுரிந்தவர்கள் அனைவரும் ரயில் மற்றும் பேருந்து வசதிகள் செய்யப்பட்டு அவர்களது சொந்த ஊர்களுக்கு அனுப்பி வைக்கப்பட்டுள்ளனர்.

கேள்வி: தலைமைச் செயலகத்திற்கு இயக்கப்படும் பேருந்துகளில் சமூக இடைவெளி முழுமையாக கடைபிடிக்கப்படுகிறதா?

பதில்: தேவையான அளவு பேருந்துகள் இயக்கப்பட்டு வருகிறது. அவசரத்திற்காக ஒரு சில நேரங்களில் ஒரே பேருந்துகளில் எண்ணிக்கைக்கு அதிகமாக பயணம் செய்கின்றனர். இதுகுறித்து, போக்குவரத்துக் கழக நடத்துநர் மற்றும் ஓட்டுநர்களுக்கு தகுந்த அறிவுரைகள் வழங்கப்பட்டு, எண்ணிக்கைக்கு ஏற்றார் போல் பயணிகளை ஏற்றியவுடன் பேருந்து கதவுகளை மூடிவிடுமாறு அறிவுறுத்தப்பட்டுள்ளது.

இவ்வாறு அமைச்சர் எம்.ஆர்.விஜயபாஸ்கர் தெரிவித்தார்.