தற்போதைய செய்திகள்

சசிகலாவுக்கும் கழகத்துக்கும் எந்த தொடர்பும் கிடையாது-திண்டுக்கல் மேற்கு மாவட்ட நிர்வாகிகள் தீர்மானம்

திண்டுக்கல்

சசிகலாவுக்கும், கழகத்துக்கும் எந்த தொடர்பும் கிடையாது என்று திண்டுக்கல் மேற்கு மாவட்ட கழக நிர்வாகிகள் கூட்டத்தில் தீர்மானம் நிறைவேற்றப்பட்டது.

திண்டுக்கல் மேற்கு மாவட்ட கழக நிர்வாகிகள் ஆலோசனை கூட்டம் மாவட்ட அவைத்தலைவர் சங்கரநாராயணன் தலைமையில் மாவட்ட கழக அலுவலகத்தில் நடைபெற்றது. இக்கூட்டத்தில் மாவட்ட கழக செயலாளரும், முன்னாள் அமைச்சரும், திண்டுக்கல் தொகுதி சட்டமன்ற உறுப்பினருமான திண்டுக்கல் சி.சீனிவாசன் ஆலோசனை வழங்கி பேசினார்.

இக்கூட்டத்தில் நிறைவேற்றப்பட்ட தீர்மானங்களை மாவட்ட செயலாளரும், முன்னாள் அமைச்சருமான திண்டுக்கல் சி.சீனிவாசன் வாசித்தார். அதன் விபரம் வருமாறு:-

சசிகலா கழகத்தின் அடிப்படை உறுப்பினராக கூட இல்லை. கட்சித் தொண்டர்களிடம் அவர் தொலைபேசியில் பேசி ஒரு தாய் வயிற்று பிள்ளைகளாக கட்சி பணியாற்றி வரும் தொண்டர்களிடையே குழப்பத்தை ஏற்படுத்துவதை வன்மையாக கண்டிக்கிறோம்.

கழகத்திற்கும் சசிகலாவிற்கும் எவ்வித தொடர்பும் இல்லை என்பதை இந்த கூட்டத்தின் மூலம் உறுதிபட தெரிவித்துக் கொள்கிறோம். அவருடன் பேசும் அனைவரின் மீது கடும் நடவடிக்கை எடுக்க வேண்டும். ஏனென்றால் கட்சியில் அறுவை சிகிச்சை செய்ய வேண்டிய நேரம் இது. துரோகிகளுக்கு கட்சியில் என்றுமே இடமில்லை.

அம்மாவின் உதவியாளராகத்தான் சசிகலா இருந்தார். ஆனால் அவரது நடவடிக்கை பிடிக்காததால் சசிகலாவையும் அவரது குடும்பத்தினரையும் அம்மா நீக்கினார். மீண்டும் மன்னிப்பு கோரியதால் சசிகலாவை மட்டும் சேர்த்துக் கொண்டார். ஆனால், தற்போது திட்டமிட்டு கட்சியை உடைக்க சதி செய்கிறார். கட்சியை அழிக்க பார்க்கிறார். அது நடக்கவே நடக்காது.

நடந்து முடிந்த தேர்தலில் தினகரன் கோவில்பட்டி தொகுதியில் வாக்குகளுக்கு பணம் கொடுத்தும் 53 ஆயிரம் வாக்குகளை தான் பெற முடிந்தது. அவரை கடம்பூர் செ.ராஜூ வெற்றி கொண்டார். திண்டுக்கல் தொகுதியில் அக்கட்சியின் மாவட்ட செயலாளர் 2 ஆயிரம் வாக்குகளை மட்டுமே பெற முடிந்தது.

சசிகலா பெரிய சக்தி என்றால் கழகம் இம்மாபெரும் வெற்றியை பெற்றிருக்க முடியாது. இங்கு மக்கள் சக்தி வெற்றி பெற்றுள்ளது. கழகம் வெற்றிவாகை சூடியுள்ளது. சசிகலா மற்றும் அவரது குடும்பத்தினர் பின்னால் திண்டுக்கல் மாவட்டத்தில் கழக நிர்வாகிகள் யாருமே செல்லவில்லை.

நடந்து முடிந்த சட்டமன்ற தேர்தலில் கழகத்திற்கு தோல்வியே கிடையாது. நமது கூட்டணிக்கு 75 இடங்கள் கிடைத்துள்ளது. வெற்றி பெற்றவர்களை காட்டிலும் 3 சதவீத ஓட்டுக்கள் தான் நமக்கு குறைவாக கிடைத்துள்ளது.

சில சதிகாரர்களின் குள்ள நரித்தன செயலால் ஓட்டு பிரிக்கப்பட்டு விட்டது. இதனாலேயே கழகம் வெற்றி வாய்ப்பை இழந்தது. இது தற்காலிக சரிவு தான். அதர்மத்தை தோற்கடித்து தர்மம் மீண்டும் வெல்லும் என்பதை போல் கழகம் மீண்டும் மக்கள் ஆதரவுடன் ஆட்சியை பிடிக்கும்.

புரட்சித்தலைவர் எம்.ஜி.ஆரும், புரட்சித்தலைவி அம்மா அவர்களும் இல்லாமலேயே சாதாரண எளிய தொண்டர்களான எடப்பாடி கே.பழனிசாமி, ஓ.பன்னீர்செல்வம் ஆகியோர் தலைமையில் கழகம் மகத்தான வெற்றியை பெற்றுள்ளது.

அனைத்து சாலைகளும் ரோமாபுரியை நோக்கியே செல்லும் என்பார்கள். புரட்சித்தலைவரும், புரட்சித்தலைவியும் உருவாக்கிய தலைமை கழகமான ராயப்பேட்டை அலுவலகத்தை நோக்கி தற்போது கழக ஒருங்கிணைப்பாளரும், இணை ஒருங்கிணைப்பாளரும் தலைமை தாங்கி உள்ள கட்சி தலைமை அலுவலகத்தை நோக்கி கழக நிர்வாகிகள் சென்று கொண்டிருக்கின்றனர்.

இந்த தொண்டர் படையையும், கழகத்தையும் சசிகலா மூலம் சிலர் சதி செய்து உடைக்க நினைக்கிறார்கள். அவர்கள் யார் என்று மக்களுக்கு தெரியும். மறைந்த முதல்வர் புரட்சித்தலைவி அம்மா வழியில் கழகத்தை ஒருங்கிணைப்பாளர் ஓ.பன்னீர்செல்வமும், இணை ஒருங்கிணைப்பாளர் எடப்பாடி கே.பழனிசாமியும் நடத்தி வருகிறார்கள். எனவே, கழகத்தை எந்த சதி திட்டத்தாலும் உடைக்க முடியாது.

நாங்கள் ஆட்சிக்கு வந்ததும் நீட் தேர்வை ரத்து செய்வோம். கல்விக்கடனை ரத்து செய்வோம் என்று முதலமைச்சர் மு.க.ஸ்டாலின் அறிவித்தார். ஆனால், பிரதமர் மோடியை அவர் சந்தித்த போது நீட் தேர்வு ரத்து குறித்து பேசவில்லை.

மேலும், தற்போது தமிழகத்தில் ஊரடங்கு என்பது பெயரளவிலேயே உள்ளது. எங்கு பார்த்தாலும் மக்கள் கூட்டமாகத்தான் இருக்கிறது. ஆனால், கழக ஆட்சியில் முழு ஊரடங்கு முழுமையாக அமல்படுத்தப்பட்டது. விலைவாசி தாறுமாறாக ஏறி உள்ளது. தேர்தல் வாக்குறுதிகள் எதையும் திமுக நிறைவேற்றவில்லை.

இவ்வாறு தீர்மானங்கள் நிறைவேற்றப்பட்டன.