தற்போதைய செய்திகள்

தி.மு.க.வை அடியோடு விரட்டி அடிப்பதே அம்மாவுக்கு நாம் செய்யும் நன்றிக்கடன் – லால்குடியில் அமைச்சர் பி.தங்கமணி பேச்சு

திருச்சி

தி.மு.க.வை அடியோடு விரட்டி அடிப்பதே அம்மாவுக்கு நாம் செய்யும் நன்றிக்கடன் என்று அமைச்சர் பி.தங்கமணி தெரிவித்தார்.

திருச்சி புறநகர் தெற்கு மாவட்டம், மணப்பாறை, திருவெறும்பூர், லால்குடி சட்டமன்ற தொகுதிகளில் மாவட்டக் கழகச் செயலாளரும், கழக நாடாளுமன்ற முன்னாள் உறுப்பினருமான ப.குமார் தலைமையில் நடைபெற்ற கழக நிர்வாகிகள் ஆலோசனை கூட்டத்தில் மண்டல தேர்தல் பொறுப்பாளரும், நாமக்கல் மாவட்டக் கழகச் செயலாளரும், மின்சாரம், மதுவிலக்கு மற்றும் ஆயத்தீர்வை துறை அமைச்சருமான பி.தங்கமணி பேசியதாவது:-

ஒரு சாமானியனாக முதலமைச்சர் எடப்பாடி கே.பழனிசாமி கடந்த 4 ஆண்டுகாலமாக அம்மா வழியில் பொற்கால ஆட்சியை நடத்திக் கொண்டிருக்கின்றார். கடந்த 15 ஆண்டு காலமாக லால்குடி தொகுதி நம்மிடத்தில் இல்லை. இந்த நிலை 2021-ம் ஆண்டிலும் வந்துவிடக்கூடாது.

ஒரு சாதாரண டீ கடை வைத்திருந்த இந்த தொகுதியின் கழக முன்னாள் சட்டமன்ற உறுப்பினர் எஸ்.எம்.பாலன், தான் இந்த மாவட்டத்திற்கு தான் ஒரு பெரியவர் என்று காட்டிக் கொண்டிருக்கின்ற தி.மு.கவை சேர்ந்த கே.என்.நேருவை தோற்கடித்தார். எஸ்.எம்.பாலன் ஒரு சாதாரண தொண்டன். ஆனால், இந்த இயக்கத்தைப் பொறுத்தவரை வேட்பாளர் யார்? என்பதை அம்மா தான் அறிவிப்பார். அம்மா அப்படி அறிவித்து விட்டார் என்றால் அம்மாவே அந்த தொகுதியில் வேட்பாளராக நிற்கிறார் என்று எண்ணி உழைத்ததனால் தான் 2001-ம் ஆண்டு நாம் வெற்றிபெற்றோம். அதன்பிறகு நமக்குள் ஒரு தொய்வு ஏற்பட்டு விட்டது. அந்த தொய்வின் காரணமாகத்தான் நாம் 15 ஆண்டுகாலம் லால்குடி சட்டமன்ற தொகுதியை இழந்திருக்கிறோம்.

இன்னும் 3 மாத காலத்தில் தேர்தல் வர இருக்கின்றது. எனவே, இந்த லால்குடி தொகுதியை இன்னொருவன் பிறந்து வந்தாலும் இனி கழகத்தின் வேட்பாளரை வீழ்த்த முடியாது என்பதை இங்கே கூடி இருக்கின்ற கூட்டத்தைப் பார்க்கும் பொழுதே தெரிகிறது. இந்த 3 மாத காலம் நாம் இதே ஆரவாரத்தோடு கடுமையாக உழைத்தோம் என்று சொன்னால், கடந்த 10 ஆண்டு காலமாக ஆட்சியில் இல்லாமல் இருக்கின்ற தி.மு.கவை இந்த முறையும் நாம் தோற்கடித்து விடலாம். தி.மு.கவிற்கு கடைசி அத்தியாயம் எழுதும் தேர்தலாக வருகின்ற 2021-ம் ஆண்டு சட்டமன்ற பொதுத்தேர்தல் இருக்கும்.

புரட்சித்தலைவி அம்மா சொன்னதைப்போல 100 ஆண்டு காலம் இந்த இயக்கமும் இருக்கும். இந்த ஆட்சியும் இருக்கும். ஆனால், அதற்கு ஏற்றார்போல் நீங்கள் பணியாற்ற வேண்டும். அம்மாவின் திட்டங்களை, சாதனைகளை எடுத்து சொல்லி வாக்குகள் சேகரித்தோம் என்றால் நாம் அதிகப்படியான வாக்குகளை பெற முடியும். மீண்டும் கழகம் 2021-ம் ஆண்டில் ஆட்சிக்கும் வரும் என்பதில் எந்த சந்தேகமும் இல்லை.

ஒரு சாமானியன் இந்த நாட்டை ஆள கூடாதா? ஒரு விவசாயி இந்த நாட்டை ஆள கூடாதா? ஒரு தொண்டன் இந்த இயக்கத்தை வழி நடத்தக் கூடாதா? தி.மு.கவைப் போல கருணாநிதி, கருணாநிதிக்குப் பிறகு அவர் மகன் ஸ்டாலின், ஸ்டாலினுக்குப் பிறகு அவர் மகன் உதயநிதி. இதுபோலத் தான் வரவேண்டுமா? ஒரு சாமானியன் 5 ஆண்டுகாலம் ஆட்சியை சிறப்பாக நிறைவு செய்து விட்டார் என்கிற பொறாமையில் இந்த ஆட்சி போக வேண்டும் என்று சொல்கிறார்கள். இந்த ஆட்சி மீது ஒரு குற்றச்சாட்டு சொல்லுங்கள் பார்க்கலாம்.

அம்மாவுக்கென்று குடும்பம் இருந்ததா? தமிழக மக்கள் தான் தன் குடும்பம் என்று தவ வாழ்ந்து மறைந்த புரட்சித்தலைவி அம்மாவை இந்த மாவட்டத்திற்கு அருகிலுள்ள மாவட்டத்தைச் சேர்ந்த ஆ.ராசா எந்த அளவுக்கு பேசிக் கொண்டிருக்கிறார் என்பதை எண்ணி கழகத்தின் தொண்டர்கள் ரத்தம் கொதித்துக் கொண்டிருக்கிறது.

அம்மா இருந்திருந்தால் இதுபோல் ஆ.ராசா பேசி இருப்பாரா? அம்மா இருந்திருந்தால் ஆ.ராசா இன்று எங்கே இருந்திருப்பார் என்று உங்களுக்கு நன்றாகவே தெரியும். எனவே, அம்மாவைப்பற்றி எந்த அளவுக்கு இழிவாக பேசி இருக்கிறார் என்று சொன்னால், ஒவ்வொரு தொண்டனின் ரத்தத்திலும் கழக ரத்தம் ஓடிக் கொண்டு இருக்கிறது என்று சொன்னால், அந்த உணர்வும், அந்த உணர்ச்சியும், அந்த கோபமும் 2021-ம் ஆண்டு நடைபெறவுள்ள சட்டமன்ற பொதுத்தேர்தலில் அவர்களுக்குத் தக்க பாடம் புகட்டும் வகையில் இருக்க வேண்டும். இதை அனைவரும் மனதில் நிலை நிறுத்திக்கொள்ள வேண்டும்.

புரட்சித்தலைவி அம்மா இருக்கும் வரை தி.மு.கவை ஆட்சிக்கட்டிலில் ஏற விடாமல் செய்து விட்டார். இன்று நாமும் அதே பணியை செய்வதுதான் இந்த இயக்கத்திற்கு, அம்மாவிற்கு நாம் செய்யும் நன்றிக்கடன் என்பதை ஒவ்வொரு தொண்டனும் நினைத்துப் பார்த்து செயலாற்ற வேண்டும்.

எனவே, இனி வரப்போகின்ற அனைத்துத் தேர்தலில் தி.மு.கவிற்கு வாய்ப்பே இல்லை என்கின்ற நிலையை நாம் உருவாக்கிக் காட்ட வேண்டும். நாம் அனைவரும் ஒற்றுமையோடு ஒன்றிணைந்து செயல்பட்டால் மாபெரும் வெற்றி நமக்கு நிச்சயம் உண்டு. குறிப்பாக லால்குடி சட்டமன்ற தொகுதியில் கழக வேட்பாளர் வெற்றிபெற்ற செய்தி முதல் செய்தியாக எனக்கு வர வேண்டும் என்று உங்கள் இடத்திலேயே வேண்டி விரும்பி கேட்டுக்கொள்கிறேன்.

இவ்வாறு அமைச்சர் பி.தங்கமணி பேசினார்.