தற்போதைய செய்திகள்

வாக்குறுதிகளை நிறைவேற்றிய ஒரே அரசு கழக அரசு தான்-எதிர்க்கட்சி துணை கொறடா சு.ரவி பெருமிதம்

ராணிப்பேட்டை

வாக்குறுதிகளை நிறைவேற்றிய ஒரே அரசு கழக அரசு தான் என்று எதிர்க்கட்சி துணை கொறடா சு.ரவி பெருமிதத்துடன் கூறினார்.

ராணிப்பேட்டை மாவட்ட கழக வழக்கறிஞர் பிரிவு சார்பில் உள்ளாட்சித்தேர்தல் குறித்து நிர்வாகிகள் ஆலோசனை கூட்டம் ராணிப்பேட்டை நகரில் உள்ள மாவட்ட கழக அலுவலகத்தில் நடைபெற்றது. இக்கூட்டத்திற்கு மாவட்ட வழக்கறிஞர் பிரிவு செயலாளர் அ.கோ.அண்ணாமலை தலைமை தாங்கினார்.

கூட்டத்தில் எதிர்க்கட்சி துணை கொறடாவும், மாவட்ட கழக செயலாளருமான சு.ரவி எம்.எல்.ஏ. கலந்து கொண்டு ஆலோசனை வழங்கி பேசியதாவது:-

கழக வழக்கறிஞர் பிரிவு செயல்பாடுகள் எதிர்க்கட்சி நேரத்தில் மிக முக்கிய பங்கு வகிக்கும். கழகத் தொண்டர்கள், இளைஞர்கள், தகவல் தொழில்நுட்ப பிரிவு நிர்வாகிகள் மீது திமுகவினர் போடும் பொய் வழக்குகளை வழக்கறிஞர் பிரிவு முறியடிக்கும் வகையில் செயல்பட வேண்டும்.

1996 தேர்தலில் கழகம் தோற்றதற்கு காரணமாக விளங்கியவர் சசிகலா. 2011-2016 சட்டமன்ற தேர்தலில் அம்மா அவர்கள் 54 வாக்குறுதிகளை அறிவித்தார். அறிவித்த அனைத்து வாக்குறுதிகளையும் நிறைவேற்றினார்.

பிறகு 2016 தேர்தலில் அம்மா அவர்கள் 63 தேர்தல் வாக்குறுதிகளை அறிவித்தார். அனைத்து வாக்குறுதிகளையும் நிறைவேற்றினார். அறிவித்த வாக்குறுதிகள் அனைத்தையும் நிறைவேற்றிய அரசு கழக அரசு மட்டும் தான். தேர்தல் வாக்குறுதிகளை
திமுக நிறைவேற்றியதாக வரலாறே கிடையாது.

அம்மா மறைந்ததும் முன்னாள் முதலமைச்சர் எடப்பாடி கே.பழனிசாமி, அம்மா அறிவித்த அனைத்து வாக்குறுதிகளையும் ஒன்றுவிடாமல் நிறைவேற்றினார். 4 ஆண்டு காலம் தமிழகத்தில் சிறப்பான ஆட்சியை முன்னாள் முதல்வர் எடப்பாடி கே.பழனிசாமி வழங்கினார்.

நடந்து முடிந்த சட்டமன்ற தேர்தலில் முதலமைச்சர் ஸ்டாலின் 505 பொய்யான வாக்குறுதிகளை அளித்து மக்களை ஏமாற்றி ஆட்சிக்கு வந்தார். முதலமைச்சர் மு.க.ஸ்டாலின், அவரது மகன் உதயநிதி ஸ்டாலின் ஆகியோர் ஆட்சிக்கு வந்ததும் முதல் கையெழுத்து நீட் தேர்வை ரத்து செய்வது தான் என்று கூறினர். ஆனால் இதுநாள் வரை நீட் தேர்வை ரத்து செய்யாமல் மக்களை ஏமாற்றி வருகிறார்கள்.

நீட் தேர்வு விவகாரத்தில் திமுக இரட்டை வேடம் போடுகிறது. அறிவித்த ஒரு வாக்குறுதியையும் நிறைவேற்ற முடியாத கையாலாகாத அரசாக திமுக அரசு விளங்குகிறது. நீட் தேர்வை ரத்து செய்யாமல் மாணவர்கள், இளைஞர்களை ஏமாற்றி உள்ளனர்.

கழகத்தை அழித்துவிட வேண்டும். ஒடுக்கி விட வேண்டும். அடக்கி விட வேண்டும் என ஸ்டாலின் நினைக்கிறார். அவருடைய பகல் கனவு பலிக்காது.சசிகலாவிற்கு கழகத்தை பற்றி பேச அருகதை கிடையாது.

உச்சநீதிமன்றத்தால் தண்டிக்கப்பட்டு குற்றவாளி என அறிவிக்கப்பட்டவர் சசிகலா. எந்த இயக்கத்திற்கும் தலைவராக வருவதற்கு அவருக்கு தகுதி கிடையாது. ஒரு சசிகலா அல்ல ஓராயிரம் சசிகலா வந்தாலும் கழகத்தை அசைத்து கூட பார்க்க முடியாது.

இவ்வாறு எதிர்க்கட்சி துணை கொறடாவும், மாவட்ட கழக செயலாளருமான சு.ரவி எம்.எல்.ஏ பேசினார்.

இக்கூட்டத்தில் மாவட்ட கழக நிர்வாகிகள் ஆர்.ஜி.கே.நந்தகோபால், கீதா சுந்தர், ரமா பிரபா, எம்.ஏ.சம்பந்தம், ஆர்.ஷாபுதின், முன்னாள் மாவட்ட கழக செயலாளர் சுமைதாங்கி ஏழுமலை, முன்னாள் எம்.எல்.ஏ ஆர்.சீனிவாசன் மற்றும் பலர் கலந்து கொண்டனர்.