மற்றவை

ஓட்டுக்காக ஸ்டாலின், உதயநிதி கபடநாடகம் – அமைச்சர் திண்டுக்கல் சி.சீனிவாசன் குற்றச்சாட்டு

திண்டுக்கல்

ஆட்சி கவிழ்ப்பு முயற்சி தவிடு பொடியாகி விட்டதால் ஓட்டுக்காக ஸ்டாலின், உதயநிதி ஸ்டாலின் கபட நாடகம் ஆடுகின்றனர் என்று அமைச்சர் திண்டுக்கல் சி.சீனிவாசன் குற்றம் சாட்டியுள்ளார்.

திண்டுக்கல் நகர் தெற்கு, கிழக்கு பகுதி கழகத்தின் சார்பில் ஆலோசனை கூட்டம் மோகன், முரளி ஆகியோர் தலைமையில் நடைபெற்றது. அபிராமி கூட்டுறவு பண்டகசாலை தலைவர் பாரதி முருகன் வரவேற்றார். மாவட்ட கூட்டுறவு ஒன்றிய தலைவர் சி.எஸ்.ராஜ்மோகன், சுப்பிரமணி, சேசு ஆகியோர் முன்னிலை வகித்தனர். கழக அமைப்பு செயலாளர் வி.மருதராஜ் ஆலோசனை வழங்கி பேசினார்.

இக்கூட்டத்தில் மேற்கு மாவட்ட கழக செயலாளரும், வனத்துறை அமைச்சருமான திண்டுக்கல் சி.சீனிவாசன் கலந்து கொண்டு பேசியதாவது:-

புரட்சித்தலைவர் எம்.ஜி.ஆர். 1972-ல் கழகத்தை ஆரம்பித்தபோது திண்டுக்கல் நாகல் நகரை தலைமையிடமாக கொண்டு உருவாக்கப்பட்டது. இப்பகுதியில் சவுராஷ்டிரா மக்கள் அதிகமாக உள்ளனர். சவுராஷ்டிரா மக்களின் அமோக ஆதரவைப் பெற்ற இயக்கம் கழகம். புரட்சித்தலைவர் எம்.ஜி.ஆர்., புரட்சித்தலைவி அம்மா ஆகியோர் சவுராஷ்டிரா இன மக்களின் மேல் பேரன்பு கொண்டவர்கள். நெசவு தொழிலில் ஈடுபடும் சவுராஷ்டிரா இன மக்களுக்காக இலவச மின்சாரம், கடன் வசதி உள்ளிட்ட ஏராளமான திட்டங்களை கழக அரசு வழங்கி உள்ளது. நெசவாளர்களுக்கு மட்டுமல்லாது விவசாயிகள் மற்றும் அனைத்து தரப்பினருக்கும் எண்ணற்ற நலத்திட்டங்களை வழங்கி வருகிறது. இதனால் தமிழக மக்களின் மகத்தான ஆதரவை பெற்ற ஒரே இயக்கம் கழகம் தான்.

மத்திய அரசு விவசாயிகளுக்காக வேளாண் திருத்த மசோதா திட்டத்தை கொண்டு வந்துள்ளது. அதில் விவசாயிகளின் நலனுக்காக பல அம்சங்கள் உள்ளதால் கழக அரசு ஆதரிக்கிறது. ஆனால் தி.மு.க.வோ கருப்புக்கொடி போராட்டம் நடத்தி வருகின்றனர். நாங்களும் இருக்கிறோம் என்பதை காட்டிக் கொள்வதற்காகவே திமுக போராட்டம் நடத்தியுள்ளது. அவர்கள் எதிர்ப்பு தெரிவிக்க வேண்டிய இடம் நாடாளுமன்றத்தில் தான். 39 எம்.பி.க்களை வைத்துள்ள திமுக இச்சட்டத்திற்கு எதிராக அங்கு பேச வேண்டியதுதானே? தமிழ்நாட்டில் ஏன் கருப்புக்கொடி காட்டுகிறார்கள். கடந்த 2016-ம் ஆண்டு தி.மு.க.வின் தேர்தல் அறிக்கையில் வேளாண் சட்டம் கொண்டு வருவோம் என குறிப்பிடப்பட்டுள்ளதை ஊடகங்கள் வெட்ட வெளிச்சமாக்கி உள்ளன. ஆனால், தற்போது பாரதப் பிரதமர் மோடி கொண்டு வந்துள்ள வேளாண் சட்டத்திருத்தை தி.மு.க. எதிர்ப்பது வேடிக்கையாக உள்ளது.

பாஜகவுடன் கழகம் கூட்டணி வைத்துள்ளதை மதவாத அரசியல் என்கிறார் ஸ்டாலின். பாஜகவுடன் கூட்டணி வைத்துள்ளதால் கழகம் கிறிஸ்தவர்களுக்கு எதிரி, இஸ்லாமியர்களுக்கு எதிரி என பொய்யான பிரச்சாரத்தை திமுக பரப்பி வருகிறது. பாஜகவுடன் திமுக கூட்டணி அமைத்து வாஜ்பாய் மந்திரி சபையில் பங்கேற்றபோது திமுகவினருக்கு இனித்ததா? மத்திய அரசு நல்லது செய்கிறது என்றால் கழகம் அதனை பாராட்டும். மத்திய அரசோடு இணக்கமாக இருந்ததால் தான் தமிழகத்திற்கு 11 மருத்துவ கல்லூரிகள் உட்பட ஏராளமான திட்டங்கள் வரப் பெற்றுள்ளன.

கடவுள் நம்பிக்கை உள்ளவர்கள் கழகத்தினர். பசும்பொன் முத்துராமலிங்கத் தேவர் குருபூஜைக்கு சென்ற ஸ்டாலின் தனது கையிலிருந்த விபூதியை கீழே தட்டி விடுகிறார். ஆனால் அவரது மனைவி துர்கா கோயில் கோயிலாக செல்கிறார். அவரது மகன் உதயநிதி ஆதீனத்தை பார்த்து ஆசீர்வாதம் பெறுகிறார். எனவே, கிறிஸ்தவர்கள், இஸ்லாமியர்கள் திமுகவின் பொய் பிரச்சாரத்தை நம்ப மாட்டார்கள். திமுகவின் இரட்டை வேடத்தையும் நம்ப மாட்டார்கள்.

தினகரனும், ஸ்டாலினும் கூட்டு சேர்ந்து 18 எம்.எல்.ஏ.க்கள் உதவியுடன் கழக ஆட்சியை கவிழ்க்க முயன்றனர். ஆனால், அவர்களின் சதித் திட்டம் நிறைவேறாமல் போனது. கட்சியை காட்டிக் கொடுத்த 18 எம்.எல்.ஏ.க்கள் பதவியை இழந்து இன்று தெருவில் நிற்கின்றனர். இதனையடுத்து ஆட்சியை கவிழ்க்க பல திட்டங்கள் போட்டாலும் அத்தனை சதி திட்டங்களும் தவிடுப்பொடியாக போனது.

2ஜி ஊழல் மூலம் ஒரு லட்சத்து 76 ஆயிரம் கோடி ஊழல் செய்துள்ளதாக சி.பி.ஐ. வழக்கு தொடுத்து விசாரணை தினசரி நடைபெற்று வருகிறது. ராசா தலைக்கு மேல் கத்தி தொங்கிக் கொண்டிருக்கிறது. இவர் எங்கள் தெய்வம் புரட்சித்தலைவி அம்மாவை தரக்குறைவாக பேசுகிறார். அம்மாவை கடுமையான வார்த்தைகளால் பேசினால் எந்த ஒரு கழக தொண்டனும் பொறுத்துக் கொள்ள மாட்டான். கழக வழக்கறிஞர் ஜோதியுடன் ராசா வாதாட தயாரா என்று கேட்டதற்கு ஸ்டாலினோ ராசாவோ இன்றுவரை பதில் கூறவில்லை.

ஸ்டாலின் உடல்நலக்குறைவால் தனது மகன் உதயநிதியை பிரச்சாரத்தில் ஈடுபட வைத்துள்ளார். உதயநிதியை தமிழகத்தில் எத்தனை பேருக்கு தெரியும். ஊழலில் கொள்ளை அடித்த பணத்தை வைத்து ஸ்டாலினின் மகன் உதயநிதியை முன்னணி நடிகைகளுடன் நடிக்க வைத்துள்ளனர். கதை இருந்தால் தானே படம் ஓடுவதற்கு. எல்லோரும் புரட்சித்தலைவராக, புரட்சித்தலைவி அம்மாவாக ஆக முடியுமா? அவர் தனது பிரச்சாரத்தில் காவல்துறையினரை மிரட்டுகிறார். திமுகவினர் அரசு அதிகாரிகளை மிரட்டி வருகின்றனர். திமுகவில் வாரிசு அரசியல் நடைபெற்று வருகிறது. இதுபோன்று கழகத்தில் வாரிசு அரசியல் உண்டா? புரட்சித்தலைவருக்கு வாரிசு கிடையாது புரட்சித்தலைவி அம்மாவுக்கும் வாரிசு கிடையாது.

அம்மா மறைவுக்குப்பின் முதல்வரும், துணை முதல்வரும் சிறப்பாக ஆட்சி புரிந்து வருகின்றனர். நல்லவர்கள் ஆட்சி பெறுவதால் தற்போது நல்ல மழை பொழிந்து வருகிறது. கழக ஆட்சியில் விலைவாசி உயரவில்லை. கொரோனா காலத்தில் குடும்ப அட்டைதாரர்கள் அனைவருக்கும் ரூ.1000 மற்றும் அரிசி, மளிகை பொருட்களை கழக அரசு வழங்கியது. அம்மாவின் வழியில் பெண்களுக்கு தாலிக்கு தங்கம், மானிய விலையில் ஸ்கூட்டர், கர்ப்பிணி பெண்களுக்கு உதவி தொகை என எண்ணற்ற திட்டங்கள் வழங்கப்பட்டு வருகிறது.

பள்ளி குழந்தைகளுக்கு இலவச கல்வி, ஊக்கத் தொகை, கல்வி உபகரணங்கள் அனைத்தும் இலவசமாக வழங்கப்பட்டு வருகிறது. நீட் தேர்வு திமுக காங்கிரஸ் ஆட்சியில் கொண்டு வரப்பட்டது. இதனால் ஏழை பெற்றோர்களின் பிள்ளைகள் மருத்துவ படிப்பு படிக்க முடியாமல் போனது. அரசு பள்ளியில் படிக்க கூடிய மாணவ மாணவிகளுக்கு கழக அரசு 7.5 சதவீதம் இடஒதுக்கீடு செய்ததின் பேரில் 396 மாணவ மாணவிகள் மருத்துவ படிப்பை மேற்கொண்டு வருகின்றனர். அவர்களுக்கான மருத்துவ படிப்பு செலவை கழக அரசே ஏற்றுக் கொண்டுள்ளது. கல்வியில் புரட்சியை உருவாக்கியவர் முதல்வர் எடப்பாடி கே.பழனிசாமி.

புயல் பாதித்த பகுதிகளுக்கு முதல்வர் நேரில் சென்று பொதுமக்களை சந்தித்து அவர்களுக்கு வேண்டிய நிவாரண பொருட்களை வழங்கி உள்ளார். எளிய மனிதர் என்பதாலும், மக்களின் முதல்வர் என்பதாலும் மக்கள் எளிதாக அவரை அணுக முடிகிறது. புரட்சித்தலைவி அம்மா எட்டடி பாய்ந்தால் முதல்வர் எடப்பாடி கே.பழனிசாமி பதினாறு அடி பாய்கிறார். அம்மாவின் வழியில் சிறந்ததோர் ஆட்சி நடத்திவரும் முதல்வருக்கும் துணை முதல்வருக்கும் தமிழக மக்கள் என்றென்றும் உறுதுணையாக இருக்க வேண்டும்.

இவ்வாறு அமைச்சர் திண்டுக்கல் சி.சீனிவாசன் பேசினார்.

இக்கூட்டத்தில் மாவட்ட பொருளாளர் எஸ்.ஏ.பழனிவேல், மாவட்ட துணை செயலாளர்கள் பிரேம்குமார், நாகராணி, இணை செயலாளர் திராவிட ராணி, மாவட்ட எம்.ஜி.ஆர். மன்ற செயலாளர் தென்னம்பட்டி பழனிசாமி, இளைஞரணி செயலாளர் வி.டி.ராஜன், மகளிரணி செயலாளர் ஜெயலட்சுமி, வழக்கறிஞர் பிரிவு செயலாளர் ஜெயபால், இலக்கிய பிரிவு செயலாளர் பி.கே.டி. நடராஜன், வர்த்தக அணி செயலாளர் மீனாட்சி சுந்தரம், மாணவரணி செயலாளர் ராஜேஷ், சிறுபான்மை பிரிவு செயலாளர் அப்துல் ரஹீம், ஓட்டுனரணி செயலாளர் பிரபுராம், மருத்துவரணி செயலாளர் ராஜசேகர் உள்பட ஏராளமானோர் கலந்து கொண்டனர்.