ஈரோடு

கழக நிர்வாகிகளுக்கு கொலை மிரட்டல்: தோப்பு வெங்கடாசலம் மீது எம்.எல்.ஏ புகார்

ஈரோடு

பெருந்துறை தொகுதியில் தி.மு.க.வுக்கு ஆள் பிடிக்கும் வேளையில் ஈடுபட்டுள்ள தோப்பு வெங்கடாசலம் கழக நிர்வாகிகளுக்கு கொலை மிரட்டல் விடுப்பதாக எம்.எல்.ஏ. புகார் அளித்துள்ளார்.

ஈரோடு மாவட்டம் பெருந்துறையில் உள்ள கழக அலுவலகத்தில் சட்டமன்ற உறுப்பினர் எஸ்.ஜெயக்குமார் தலைமையில் நிர்வாகிகள் ஆலோசனை கூட்டம் நேற்று நடைபெற்றது. இதில் கழகத்தினரை திமுகவில் சேர கட்டாயப்படுத்தி கொலை மிரட்டல் விடும் தோப்பு வெங்கடாசலம் மீது பெருந்துறை காவல்துறை துணை கண்காணிப்பாளர் செல்வராஜிடம் புகார் செய்ய வேண்டும் என்று கழக நிர்வாகிகள் கூறினர்.

இதையடுத்து சட்டமன்ற உறுப்பினர் எஸ்.ஜெயக்குமார் கழக நிர்வாகிகளுடன் பெருந்துறை துணை காவல் கண்காணிப்பாளரை சந்தித்து புகார் மனு அளித்துள்ளார். அந்த மனுவில் கூறப்பட்டிருப்பதாவது:-

நடைபெற்று முடிந்த சட்டமன்ற தேர்தலில் பெருந்துறை தொகுதியில் சுயேட்சையாக போட்டியிட்டு தோல்வியடைந்த தோப்பு வெங்கடாச்சலம் திமுகவில் இணைந்தார். அடுத்த நாள் காலை நாளிதழ் ஒன்றில் சென்னையில் உள்ள திமுக அலுவலகத்தில் அவருடன் கழகத்தை சேர்ந்த 852 நபர்களும் இணைந்ததாக விளம்பரத்தை கொடுத்து வெளியிட வைத்துள்ளார்.

ஆனால் தோப்பு வெங்கடாசலத்துடன் ஒரு சில உள்ளாட்சி பிரதிநிதிகள் மட்டுமே சென்று சேர்ந்துள்ளனர். மீதம் உள்ள கழகத்தினர் யாரும் திமுகவில் சேரவில்லை. மாறாக திமுக தலைமைக்கு பொய்யான தகவல் கொடுத்து உள்ளார்.

இந்த நிலையில் திமுகவில் இணைந்த தோப்பு வெங்கடாசலம் பெருந்துறை சட்டமன்ற தொகுதியில் உள்ள கழகத்தினரை தொலைபேசி மூலமாக தொடர்பு கொண்டு திமுகவில் இணைய வற்புறுத்தி வந்துள்ளார்.

மேலும் ஒரு சில கழக நிர்வாகிகள் தங்களின் பெயர்களை திமுக தலைமைக்கு கொடுத்ததற்கு எதிர்ப்பு தெரிவித்து உள்ளனர். அவர்களுக்கு தோப்பு வெங்கடாசலம் கொலை மிரட்டலும் விடுத்துள்ளார்.

நான் ஆளுங்கட்சியில் இருக்கிறேன். நீங்கள் திமுகவிற்கு வரவில்லை என்றால் உங்கள் மீது காவல் நிலையத்தில் பொய் வழக்குகள் பதிவு செய்யப்படும் என்றும் மிரட்டி உள்ளார். மேலும் கழக தகவல் தொழில்நுட்ப பிரிவு நிர்வாகிகள் தி.மு.க.வில் இணைந்ததாக பொய்யான தகவலை அவர் கூறி வருகிறார்.

கழகத்தை சேர்ந்த குன்னத்தூர் கருப்பட்டி சொசைட்டி துணைத்தலைவர் ராஜேந்திரன் தி.மு.க.வில் இணைந்ததாகவும் பொய்யான தகவலை கூறி வருகிறார். மேலும் அலைபேசி மூலமாக தோப்பு வெங்கடாசலம் பேசிய ஆடியோ சமூக வலைத்தளங்களில் வைரலாக பரவி வருகிறது. எனவே அவர் மீது உரிய நடவடிக்கை எடுக்க வேண்டும்.

இவ்வாறு புகார் மனுவில் எஸ்.ஜெயக்குமார் எம்.எல்.ஏ. ெதரிவித்துள்ளார்.

இதன் பின்னர் சட்டமன்ற உறுப்பினர் எஸ்.ஜெயக்குமார் செய்தியாளர்களிடம் கூறுகையில், கழகத்தினரை திமுகவில் சேர வற்புறுத்தி கொலை மிரட்டல் விடுத்த தோப்பு வெங்கடாசலம் மீது காவல்துறையினர் நடவடிக்கை எடுக்க வேண்டும். இல்லையென்றால் 5000 பேருடன் மாபெரும் போராட்டம் நடத்தப்படும் என்றார்