தற்போதைய செய்திகள்

தலைவாசல் ஒருங்கிணைந்த கால்நடை பூங்காவில் உற்பத்தி பொருட்கள் விற்பனை நிலையங்கள் அமைப்பு – அமைச்சர் உடுமலை கே.ராதாகிருஷ்ணன் தகவல்

சென்னை

தலைவாசல் ஒருங்கிணைந்த கால்நடை பூங்காவில் உற்பத்தி பொருட்கள் விற்பனை நிலையங்கள் அமைக்கப்படும் என்று அமைச்சர் உடுமலை கே.ராதாகிருஷ்ணன் தெரிவித்தார்.

சட்டப்பேரவையில்  கால்நடைப் பராமரிப்பு துறை மானியக் கோரிக்கை மீதான விவாதத்திற்கு அமைச்சர் உடுமலை கே.ராதாகிருஷ்ணன் பதிலளித்து பேசியதாவது:-

உழவுக்கும் தொழிலுக்கும், உற்ற துணையாய் இருந்து உழவுத்தொழிலை பாதுகாத்து வருவது கால்நடைத்துறை தான். ஒருநாடும், மக்களும் செழிப்பாக இருக்க வேண்டுமென்றால் அங்கு விவசாயம் செழிக்க வேண்டும், அந்த விவசாயம் செழிக்க வேண்டும் என்றால் அங்கு கால்நடைகள் அதிகமாக இருக்க வேண்டும். இவ்வாறு நாட்டின் முன்னேற்றத்திற்கும், வளர்ச்சிக்கும் கால்நடைத்துறை மிகப்பெரிய பங்காற்றி வருகின்றது என்றால் மிகையாகாது.

கிராமப்புற வளர்ச்சியில் கால்நடைகளின் பங்கு மிக மிக முக்கியமானதாகும். விவசாயிகள் கால்நடைகளை நம்பியே தங்களது வாழ்வாதாரத்தை நடத்திக்கொண்டிருக்கிறார்கள். அந்த வகையில் தமிழகத்தில் கால்நடைத்துறை மிகச் சிறப்பான திட்டங்களை விவசாயிகளுக்கும், கிராமத்தில் வாழும் ஏழை எளிய மக்களுக்கும், தாய்மார்களுக்கும், இளைஞர்களுக்கும் கால்நடைத்துறையில் அறிமுகப்படுத்தி இந்தியாவிற்கே முன்மாதிரி மாநிலமாக திகழ்ந்து வருகின்றது.

தமிழக மக்கள் நலன் ஒன்றையே குறிக்கோளாகக் கொண்டு, “மக்களால் நான் மக்களுக்காகவே நான்” என்று மக்கள் நல்வாழ்விற்காக அர்ப்பணிப்பு வாழ்வு வாழ்ந்து தமிழக மக்களின் நெஞ்சங்களில் குடியிருந்து கொண்டிருக்கும் புரட்சித்தலைவி அம்மா அவர்களின் வழியில் செயல்பட்டுக் கொண்டிருக்கும் தமிழக அரசு மக்களின் நலனில் அக்கறை கொண்டு, வளம்! வளர்ச்சி! முன்னேற்றம்! என்ற உன்னத கோட்பாடுகளை செயல்படுத்தி வருகிறது.

தமிழகத்தின் கடைக்கோடியில் இருக்கும் அனைத்து கிராமங்களும் பொருளாதாரத்தில் மேம்பாடு அடையவேண்டும் என்பதற்காக கால்நடை துறையில் ஒரு புரட்சியையே ஏற்படுத்தியவர் அம்மா அவர்கள். கழனிக்கு வேலைக்கு சென்றவர்களையும் ஆடு வளர்ப்பு, மாடு வளர்ப்பு, கோழி வளர்ப்பு என விலையில்லா கால்நடைகளை அவர்களுக்கு வழங்கி அவற்றை பராமரிப்பதன் மூலம் வருவாய் ஈட்டச் செய்து அவர்களுக்கு சுய வேலை வாய்ப்புகளையும் உருவாக்கி தனித்துவம் தந்தது நமது அம்மா அவர்களின் அரசு.

தமிழர்களின் நல்வாழ்வு சிறக்கவும் தமிழ்நாட்டை இந்தியாவில் முன்னணி மாநிலமாகவும் மாற்றி தமிழர்களின் நல்வாழ்வுக்காக பல புதுமையான திட்டங்களை அளித்து தமிழகத்தில் எளிய முதல்வராக நமது முதல்வர் வலம் வந்து கொண்டிருக்கிறார். “பாருக்குள்ளே சிறந்த நாடு நம் பாரத நாடு அந்த பாரதநாட்டிலே சிறந்தது தமிழ்நாடு” என்று சொல்லத்தக்க வகையில் பல்வேறு துறைகளில் இந்தியாவின் முதன்மை மாநிலமாக தமிழ்நாடு விளங்கி வருகிறது.

இதயதெய்வம் புரட்சித்தலைவி அம்மா அவர்களின் வழியில் நல்லாட்சியை வழங்கிவரும் முதலமைச்சர் எடப்பாடியார் கால்நடை பராமரிப்புத் துறைக்கென முன் எப்பொழுதும் இல்லாத வரலாற்றுச் சாதனையாக 2020-21 ஆம் ஆண்டிற்கு ரூபாய் 1678 கோடியே 27 லட்சம் அளித்து, கால்நடைகள் மீதும், கால்நடை வளர்ப்போர் மீதும், கால்நடைகளை வாழ்வாதாரமாகக் கொண்ட ஏழை எளிய மக்களின் மீதும் அம்மா அவர்களின் அரசு, எந்த அளவுக்கு அக்கறை கொண்டு செயல்பட்டுவருகிறது என்பதை எடுத்துக்காட்டி உள்ளார்.

கிராமப்புற ஏழைப்பெண்களின் வாழ்வாதாரத்தை உயர்த்திடவும் அவர்களை அதிகாரமிக்கவர்களாக மாற்றிடவும், சுயசார்பு பொருளாதாரம் உடையவர்களாக உருவாக்கி அவர்களை தொழில் முனைவோர்களாக மாற்றிடவும், விலையில்லா கறவை மாடுகள் வழங்கப்பட்டது. அதனால் தான் தமிழகத்தில் இரண்டாவது வெண்மைப்புரட்சியை ஏற்படுத்திடும் வகையில் விலையில்லா கறவைப்பசுக்கள் வழங்கும் திட்டம் அம்மாவின் அரசு அனைத்து மாவட்டங்களிலும் செயல்படுத்தப்பட்டு வருகிறது.

“தன்னையே கொடுப்பதில் வாழைக்கு ஈடு
சம்சாரி வாழ்வுக்கு ஒரு பசுமாடு”
என்று பாடினார் புரட்சித்தலைவர் எம்.ஜி.ஆர் அவர்கள்.

இந்த வரிகளுக்கிணங்க அம்மா அவர்கள் விலையில்லா கறவை மாடுகள் வழங்கும் திட்டத்தை அறிமுகப்படுத்தினார். இத்திட்டமானது 2011-12 ஆம் ஆண்டு முதல் 2019-20 ஆம் ஆண்டு வரை 99 ஆயிரத்து 379 மகளிர்களுக்கு ரூபாய் 430 கோடியே 44 லட்சம் மதிப்பீட்டில் கறவை மாடுகள் வழங்கப்பட்டுள்ளது. இதன் மூலம் 2011-12ஆம் ஆண்டு 6968 மெட்ரிக் டன்களாக இருந்த பால் உற்பத்தி, 2018-19ஆம் ஆண்டு 8362 மெட்ரிக் டன் அளவாக உயர்ந்துள்ளது.

இத்திட்டத்தில் கொள்முதல் செய்யப்பட்ட கறவை பசுக்கள் மூலம் சுமார் ஒரு லட்சத்து 99 ஆயிரம் கன்றுகள் பிறந்துள்ளன என்பதையும், இதன் மதிப்பு ரூபாய் 99 கோடியே 50 லட்சம் என்பதையும் மனதில் கொண்டு, இத்திட்டத்தின் வெற்றியையும், மக்களுக்கு இத்திட்டம் எவ்வளவு பயனுடையது என்பதையும் உறுப்பினர்கள் எண்ணிப் பார்க்க வேண்டுகிறேன்.

கிராமப்புறங்களில் வாழ்கின்ற பெண்கள், ஆடு வளர்ப்பை தங்களது தொழிலாக ஏற்று அவற்றைப் பெருக்கிட முடியும். அதே நேரம் குடும்பத்தில் பொருளாதாரத் தேவை ஏற்படும்போது எளிதாக அவற்றை விற்று தங்கள் பொருளாதாரத்தை சீர்படுத்திக் கொள்ள முடியும் என்பதால் தான் இதயதெய்வம் புரட்சித்தலைவி அம்மா அவர்கள் கிராமபுற ஏழைபெண்களுக்கு ஆடுகள் வழங்கும் திட்டத்தை கொண்டு வந்தார்.

கிராமப்புறங்களில் வசிக்கும் ஏழ்மையிலும் ஏழ்மை நிலையில் உள்ள நிலமற்ற மகளிர், பொருளாதாரத்தில் மேம்பாடு அடைய தமிழ்நாட்டிலுள்ள அனைத்து ஊராட்சிகளிலும் விலையில்லா வெள்ளாடுகள்/ செம்மறியாடுகள் வழங்கும் திட்டம் செயல்படுத்தப்பட்டு வருகிறது. இத்திட்டம் 2011-12 ஆம் ஆண்டு முதல் 2019-20 ஆம் ஆண்டு வரை 11 இலட்சத்து 67 ஆயிரத்து 674 மகளிருக்கு ரூபாய் 1656 கோடியே 50 லட்சம் மதிப்பில் 46 லட்சத்து 70 ஆயிரத்து 696 வெள்ளாடுகள் / செம்மறியாடுகள் வழங்கப்பட்டுள்ளன. இத்திட்டத்தில் வழங்கப்பட்ட ஆடுகள் மூலம் ரூபாய் 1953 கோடியே 25 லட்சம் மதிப்புள்ள 78 லட்சத்து 13 ஆயிரம் குட்டிகள் பிறந்துள்ளன.

கோழியின அபிவிருத்தி திட்டம்

2019-20 ஆம் ஆண்டில் பேரூராட்சிகள் மற்றும் கிராம ஊராட்சிகளில் உள்ள 2 லட்சத்து 40 ஆயிரம் பெண் பயனாளிகள் பயன்பெறும் வகையில் ரூபாய் 50 கோடி செலவில் செயல்படுத்தப்பட்டு வருகிறது. இதுவரை 58 ஆயிரத்து 255 பெண் பயனாளிகளுக்கு ஒரு பயனாளிக்கு 25 கோழி குஞ்சுகள் வீதம் 14 லட்சத்து 56 ஆயிரத்து 375 அசில் இன 4 வார வயதுடைய கோழி குஞ்சுகள் வழங்கப்பட்டுள்ளன.

தீவன அபிவிருத்தி

கால்நடைகளின் உற்பத்தித்திறனை அதிகரிப்பதில் பசுந்தீவனம் முக்கியமான பங்காற்றுகிறது. பசுந்தீவனத்திற்கு முக்கியத்துவம் கொடுத்து கால்நடைகளுக்கு அவற்றை வழங்கும் போது அவற்றின் உற்பத்தித் திறன் அதிகரிப்பதுடன், தேவையான உயிர் சத்துகளும் கிடைக்கின்றன. நல்ல தரமான பசுந்தீவனத்தை அடர் தீவனத்துடன் கலந்து கொடுப்பதால் பசுக்கள் மற்றும் எருமைகள் காலதாமதமாக கருத்தரிப்பது குறைகிறது. இதனால் கன்று பிறப்புகளுக்கு இடைப்பட்ட காலம் குறைவதால், பண்ணை வருமானம் அதிகரிக்கின்றது.

விநியோக அடிப்படையிலும், தரத்தின் அடிப்படையிலும் பசுந்தீவன தேவைக்கும், உற்பத்திக்கும் மிகப்பெரிய இடைவெளி காணப்படுகிறது. உற்பத்தியை அதிகரித்தல் மற்றும் இருக்கும் வளங்களை திறமையாகப் பயன்படுத்திக் கொள்ளுதல் வாயிலாக, உலர் தீவனம் மற்றும் பசுந்தீவனத்தின் தேவைக்கும் உற்பத்திக்கும் உள்ள இடைவெளியைக் குறைப்பதற்காக, 2011-12 ஆம் ஆண்டு முதல் 2019-20 ஆம் ஆண்டு வரை மாநில தீவன அபிவிருத்தி திட்டம் ரூபாய் 215 கோடி செலவில் அம்மா அவர்களது அரசு செயல்படுத்தி வருகிறது. உற்பத்தியாகும் பசுந்தீவனத்தை சிறப்பாகப் பயன்படுத்திக்கொள்வதற்காக, இதுவரை 14 ஆயிரத்து 203 மின்சாரத்தில் இயங்கும் புல் நறுக்கும் கருவிகள், 75 விழுக்காடு அரசு மானியத்தில் விவசாயிகளுக்கு வழங்கப்பட்டுள்ளது.

கால்நடை மற்றும் விலங்கின அறிவியலுக்கான ஒருங்கிணைந்த உயர் ஆராய்ச்சி நிலையம்

சேலம் மாவட்டம், தலைவாசலில் அமைந்துள்ள கால்நடை பராமரிப்பு துறைக்கு சொந்தமாக உள்ள 1800 ஏக்கர் பரப்பிலான இடத்தில், கால்நடை பராமரிப்பு, பால்வளம் மற்றும் மீன்வள நடைமுறைகள் மற்றும் தொழில் நுட்பங்களை உள்ளடக்கிய உலகத் தரம் வாய்ந்த ஆசியாவிலேயே பெரிய ஒருங்கிணைந்த பல்துறை பல்நோக்குடன் கூடிய கால்நடை மற்றும் விலங்கின அறிவியலுக்கான ஒருங்கிணைந்த உயர் ஆராய்ச்சி நிலையம் முதலமைச்சர் எடப்பாடியார் 13.02.2019 அன்று சட்டமன்றப்பேரவையில் சட்டப்பேரவை விதி 110-ன் கீழ் அறிவித்தார்.

தமிழ்நாட்டில் கால்நடை பொருட்கள் உற்பத்தி, பதப்படுத்துதல் மற்றும் சந்தைப்படுத்துதல் உள்ளிட்ட கால்நடை பராமரிப்பு நடவடிக்கைகளுக்கு உற்சாகத்தை அளிக்கும் வகையில் உலகத்தரம் வாய்ந்த வசதிகளை உள்ளடக்கிய இவ்வாராய்ச்சி நிலையத்திற்கு சட்டப்பேரவையில் அறிவித்த ஓராண்டுக்குள் 09.02.2020 அன்று முதலமைச்சர் எடப்பாடியாரால் அடிக்கல் நாட்டப்பட்டது. எந்த திட்டத்தையும் வெறும் அறிவிப்போடு நிறுத்திவிடும் அரசு அல்ல அம்மாவின் அரசு. மக்களுக்கு கொடுத்த வாக்குறுதியை புனிதமாக எண்ணி விரைந்து செயலாக்கும் அரசு அம்மா அவர்களின் அரசு என்பதை இங்கே சுட்டிகாட்டுவது எனது கடமையாகும்.

ஆசியாவிலேயே மிகப்பெரிய கால்நடை மற்றும் விலங்கின அறிவியலுக்கான இந்த ஒருங்கிணைந்த ஆராய்ச்சி நிலையத்தில்

1. கால்நடை பண்ணை வளாகம்.
2. பால்பதனிடுதல் மற்றும் பால் பொருட்கள் தயாரிப்பு வளாகம்.
3. மீன்வள செயல்முறை வளாகம்.
4. பட்ட மேற்படிப்பிற்கான வளாகம்.
5. விரிவாக்கம் மற்றும் திறன் மேம்பாட்டு வளாகம்.
6. ஆராய்ச்சி வளாகம்.
7. தொழில் உருவாக்கம் மற்றும் ஒருங்கிணைப்பு வளாகம்.
8. இறைச்சிப் பொருட்கள் உற்பத்தி வளாகம்.
9. பசுந்தீவன ஆராய்ச்சி வளாகம்.
10. பொதுமக்களுக்கான விளக்க மையம்.
ஆகிய 10 பெரு வளாகங்கள் இடம் பெறவுள்ளன. இவ்வளாகங்களில் அதற்கேற்ப உரிய தனிச்சிறப்புகளுடன் பல்வேறு செயல்பாடுகளும் மற்றும் வெள்ளாடு, செம்மறியாடு, பன்றியினம் மற்றும் கோழியினங்களுக்கென தனித்தனியே இறைச்சிப் பொருட்கள் உற்பத்தி பிரிவுகளும் அமைக்கப்பட உள்ளன.

அதேபோல் பால் பதனிடுதல் மற்றும் பால் பொருட்கள் தயாரிப்பு வளாகத்தில் கலப்பின கறவை மாட்டுப்பண்ணை, பால் பதனிடுதல் மற்றும் பால் பொருட்கள் தயாரிப்பு, மாட்டுத்தீவனம் மற்றும் தாது உப்புக்கலவை தயாரிப்பு அலகுகள் அமைக்கப்படும். நவீன ஆவின் பாலகம், குழந்தைகள் பூங்கா மற்றும் கால்நடை உற்பத்திப் பொருட்கள் விற்பனை நிலையங்கள் ஆகியவை பொதுமக்களுக்கான வளாக மையத்தில் இடம்பெறும்.

குறிப்பாக கால்நடை பண்ணை வளாகத்தில் நவீன பண்ணை முறைகளை விவசாயிகளுக்கு எடுத்துக் காட்டும் வகையில் கறவை மாட்டுப்பண்ணை, உள்நாட்டு மாட்டினங்களான காங்கேயம், உம்பளாச்சேரி, ஆலம்பாடி, புலிக்குளம் மற்றும் பர்கூர் ஆகியவற்றின் பாதுகாப்பு மற்றும் இனப்பெருக்கப் பண்ணை, செம்மறி மற்றும் வெள்ளாட்டினப் பண்ணைகள், வெண்பன்றிகள், கோழியினப் பிரிவுகள் மற்றும் நாட்டின நாய் இனங்களான ராஜபாளையம், சிப்பிப்பாறை, கோம்பை, கன்னி ஆகியவற்றுக்கான இனப்பெருக்கப் பிரிவுகள் இடம்பெறும்.உலகத்தரம் வாய்ந்த கால்நடை மற்றும் விலங்கின அறிவியலுக்கான ஒருங்கிணைந்த உயர் ஆராய்ச்சி நிலையத்தின் மூலம் தமிழக அரசின் கால்நடை பராமரிப்புத்துறை இந்த உலகுக்கு வழிகாட்டும் முன்னோடி துறையாகவும் அமைந்திடும்.

இந்த வளாகத்தில்
1. கால்நடை மருத்துவ அறிவியல், பால்வளம், கோழியினங்கள் மற்றும் உணவுத் தொழில்நுட்பங்கள் ஆகியவற்றில் முதுகலை மற்றும் முனைவர் பட்ட மேற்படிப்பிற்கான வசதிகள் உருவாக்கப்படும்.

2. இந்த ஆராய்ச்சி நிலையமானது மாணவர்கள் மற்றும் ஆராய்ச்சியாளர்கள் களத்தில் உள்ள விவசாயிகளின் தேவைகளை அறிந்து அதற்குத் தகுந்த தீர்வுகளைக் கண்டறியும் ஆராய்ச்சிகளை மேற்கொள்ளவும் வாய்ப்பினை உருவாக்கும்.

3. விவசாயிகள், கால்நடை வளர்ப்போர் மற்றும் தொழில் முனைவோருக்கு தேவைப்படும் பல்துறை சார்ந்த அறிவுரைகள் வழங்குவதற்கும், கால்நடை உற்பத்தி பொருட்களை முறையாக சந்தைப்படுத்தவும் வாய்ப்பாக அமையும்.

அனைத்து வசதிகளும், வாய்ப்புகளும் கொண்ட இத்தகைய சிறப்புமிக்க ஆராய்ச்சி மையம் அமைத்தமைக்கு முதலமைச்சர் எடப்பாடியாருக்கு தமிழக விவசாய பெருமக்கள் நன்றி கூறிகொண்டிருக்கிறார்கள் என்று பெருமையோடு தெரிவித்துக்கொள்கிறேன்.

இவ்வாறு அமைச்சர் உடுமலை கே.ராதாகிருஷ்ணன் பதிலளித்தார்.