தற்போதைய செய்திகள்

தாம்பரத்தில் புதைவட தளம் அமைக்கும் பணியை விரைந்து முடிக்க நடவடிக்கை – அமைச்சர் பி.தங்கமணி உறுதி

சென்னை

தாம்பரத்தில் புதைவட தளம் அமைக்கும் பணியை விரைந்து முடிக்க நடவடிக்கை எடுக்கப்பட்டு வருவதாக அமைச்சர் பி.தங்கமணி உறுதி அளித்தார்.

சட்டப்பேரவையில்  மின்சாரம், மதுவிலக்கு மற்றும் ஆயத்தீர்வைத்துறை அமைச்சர் பி.தங்கமணி அளித்த பதிலுரை வருமாறு:-

தி.மு.க. உறுப்பினர் எஸ்.ஆர்.ராஜா: தாம்பரம் தொகுதி, சிட்லப்பாக்கம் பேரூராட்சி, 15-வது வார்டு, சுந்தரம் காலனியில் உள்ள மின்மாற்றியைத் தரம் உயர்த்த அரசு ஆவன செய்யுமா ?

அமைச்சர் பி.தங்கமணி: உறுப்பினருடைய தொகுதி, சிட்லப்பாக்கம் பேருராட்சி 15-வது வார்டு சுந்தரம் காலனிக்கு ஏற்கனவே, 500 கே.வி.ஏ. ஸ்டேசன் பார்டர் ரோடு-ல் மின்மாற்றி வழியாக மின்விநியோகம் செய்யப்பட்டு வந்து கொண்டிருக்கிறது. உறுப்பினர் கேட்டுள்ளவாறு, சுந்தரம் காலனியில் மேலும் ஒரு புதிய 100 கே.வி.ஏ. மின்மாற்றி 15.11.2018 அன்று நிறுவப்பட்டு அதன்மூலம் மின்விநியோகம் செய்யப்பட்டு வருகிறது. தற்போது அந்தப் பகுதியில் நிலவிடும் மின் தேவையை பூர்த்தி செய்ய போதுமானதாக உள்ளது.

எஸ்.ஆர்.ராஜா: இன்னும் அந்தப் பகுதியிலே மின்துறை சார்பாக பல மின்மாற்றிகள் வேகமாக பணி நடைபெற்றுக் கொண்டிருக்கிறது. பழைய பெரும்பத்தூர் பகுதியிலே 33/11 கே.வி. துணை மின்நிலையம் அமைக்கும் பணிக்கு நிலமெல்லாம் எடுக்கப்பட்டது. அந்தப் பணி இன்னும் தொடங்கப்படாத ஒரு நிலை இருக்கிறது.ஆகவே, இந்த தாம்பரம், பல்லாவரம் செயற்பொறியாளர் அலுவலகத்தைப் பிரித்து, தனியாக பல்லாவரத்திற்கு ஒரு செயற்பொறியாளர் அலுவலகம் தொடங்கிவிட்டால், தாம்பரத்திற்கு போதுமான அலுவலர்கள், போதுமான அதிகாரிகள் இருப்பதால் பணி சிறப்பாக நடைபெறுவதற்கு வாய்ப்பாக இருக்கும்.

அமைச்சர் பி.தங்கமணி: உறுப்பினர் சொன்னதைப் போல சென்னை மாநகரம் முழுவதுமே, அதிகமான மின்தடங்களில் உள்ள மின்மாற்றிகளை மாற்றிக் கொண்டிருக்கிறோம். தாம்பரம் பகுதியில் மட்டும் கிட்டத்தட்ட, 100 மின்மாற்றிகள் மாற்றப்பட்டுள்ளது. உறுப்பினர் இரண்டு கேள்விகளை வைத்திருக்கிறார். 33/11 துணை மின்நிலையம் அமைப்பதை வேகப்படுத்த வேண்டுமென்று கேட்டிருக்கிறார்.

அதை நாங்கள் உடனடியாக ஆய்வு செய்து அந்தப் பணிகளை வேகப்படுத்துகிறோம். முதலமைச்சர் அறிவித்த பல்லாவரம் தாம்பரம் செயற்பொறியாளர் அலுவலகத்தைப் பிரிக்க வேண்டுமென்று உறுப்பினர் சொல்லியிருக்கிறார். அந்தப் பணியையும் நாங்கள் உடனே தொடங்கவிருக்கிறோம் என்பதை தெரிவித்துக் கொள்கிறேன்.

எஸ்.ஆர்.ராஜா: அன்டர்கிரவுண்ட் கேபிள் என்பது நீண்டகாலமாக நாங்கள் கோரிக்கையாக வைத்துக் கொண்டிருக்கிறோம். இப்போது தாம்பரம் தொகுதியில், தாம்பரம் நகராட்சிப் பகுதி, செம்பாக்கம் நகராட்சிப் பகுதி, சிட்லப்பாக்கம் நகராட்சிப் பகுதிகளிலே அந்தப் பணிகள் நடைபெற்றுக் கொண்டிருக்கின்றன. இவற்றைவிட வேகமாக வளர்ந்து வருகிற பகுதி பெருங்களத்தூர் பகுதியும் பீர்க்கன்கரணை பகுதிகளாகும். அந்த இரண்டு பகுதிகளும் விடுபட்டிருக்கின்றன. அவற்றை உடனடியாக சேர்த்துக் கொடுக்க வேண்டுமென்று கேட்டுக்கொள்கிறேன்.

அமைச்சர் பி.தங்கமணி: உறுப்பினர் சார்ந்த, தாம்பரம் பகுதியில் மட்டும் 1,230 கிலோ மீட்டர் அளவுக்கு புதைவடத் தளமாக மாற்றுவதற்குண்டான பணிகள் நடைபெற்றுக் கொண்டிருக்கின்றன. கிட்டத்தட்ட 353 கோடி ரூபாய் எஸ்டிமேட்டில் பணிகள் நடைபெற்றுக் கொண்டிருக்கின்றன. விரைந்து அந்தப் பணிகளை முடிப்பதற்கான நடவடிக்கைகளை எடுக்கிறோம். உறுப்பினர் கோரிய பெருங்களத்தூர் பகுதியிலும், வரும் காலத்திலே, ஏனென்று சொன்னால், இப்பொழுது சென்னை மாநகரம் முழுவதுமே நாங்கள் அதை அமைக்க வேண்டுமென்பதற்காக பெரம்பூர் கோட்டமும், தாம்பரம் கோட்டமும் எடுத்திருக்கின்றோம். அடுத்த கட்டமாக அந்தப் பணிகளை மேற்கொள்ள விருக்கிறோம்.

உறுப்பினர், கம்பங்கள் சேதமடைந்திருக்கின்றன, மின் கம்பிகள் தாழ்வாகச் செல்கிறதென்று சொன்னார். நான் மானியக் கோரிக்கையிலேயே சொன்னேன். கிட்டத்தட்ட 6,500 கிலோ மீட்டர் அளவுக்கு புதிய மின் கம்பிகள் மாற்றப்பட்டிருக்கின்றன. கிட்டத்தட்ட 35,000 மின் கம்பங்கள் மாற்றப்பட்டிருக்கின்றன. உறுப்பினர் சொல்லுகின்ற அந்தப் பகுதியில் தாழ்வழுத்தக் கம்பிகள் இருந்தனவென்று சொன்னால், உடனடியாக ஆய்வு செய்து நடவடிக்கை எடுக்கப்படும்.

தி.மு.க. உறுப்பினர் பி.கே. சேகர் பாபு: முதலமைச்சர் 110 விதியின் கீழ் அறிவித்த அறிக்கையிலேயே ஒட்டுமொத்தமாக சென்னையிலே இருக்கின்ற பில்லர்கள் பொருத்தப்பட்ட உயர் மின்னழுத்த மாற்றிகளை மாற்றி, ஆர்.எம்.யூ. அமைக்கப்படும் என்று அறிவித்திருந்தீர்கள். துறைமுகம் தொகுதியில் 300 மின்மாற்றிகள் இருக்கின்றன. அந்த மின்மாற்றிகளை மாற்றி, ஆர்.எம்.யூ. என்கின்ற அந்த லேட்டஸ்ட் டிக்னலாஜி கொண்ட அந்த மின்மாற்றிகளை அமைத்துத் தர கேட்டுக்கொள்கிறேன்.

அமைச்சர் பி.தங்கமணி: உறுப்பினர் கூறியது உண்மை. 2017-ல் ஒப்பந்தம் கோரப்பட்டு, சிலர் நீதிமன்றம் சென்ற காரணத்தினால் அது இப்பொழுதுதான் முடிந்து, ஒப்பந்தப்புள்ளிகள் திறக்கப்பட்டிருக்கின்றன. இன்னும் ஒரு மாத காலத்திற்குள் ஒப்பந்தப் பணிகள் முடிந்து, பணிகள் துவங்கும். விரைந்து அந்தப் பணிகளை முடிப்பதற்கான நடவடிக்கைகள் எடுக்கப்படும் என்பதை தெரிவித்துக் கொள்கிறேன்.

இவ்வாறு அமைச்சர் பி.தங்கமணி பதிலளித்தார்.