சிறப்பு செய்திகள்

தவறுகளை கண்டுபிடித்து தண்டிக்கும் அரசு அதிமுக அரசு : தி.மு.க. உறுப்பினருக்கு முதலமைச்சர் காட்டமான பதில்

சென்னை

தவறுகளை கண்டுபிடித்து தண்டிக்கும் அரசு அதிமுக அரசு என்று முதலமைச்சர் எடப்பாடி கே.பழனிசாமி பேசினார்.

சட்டப்பேரவையில் நேற்று மீன்வளத்துறை மானியக் கோரிக்கை மீது நடந்த விவாதத்தில் தி.மு.க. உறுப்பினர் அனிதா ராதாகிருஷ்ணன் மீனவர்களின் வாழ்வாதாரம் குறித்து பேசினார். இதற்கு அமைச்சர் டி.ஜெயக்குமார் மீனவர்களின் குடும்பத்திற்கு 19 ஆயிரம் ரூபாய் நேரடியாக போய் சேரும் வகையில் வழங்கும் அரசு அதிமுக அரசு தான். இந்தியாவிலேயே மீனவர்களுக்காக 19 ஆயிரம் ரூபாயை வழங்கும் ஒரே அரசு எங்களது அரசு தான் என்று பேசினார். தொடர்ந்து பேசிய தி.மு.க. உறுப்பினர் அனிதா ராதாகிருஷ்ணன் கடல் அரிப்பு குறித்து பேசினார்.

அப்போது குறுக்கிட்டு பேசிய முதலமைச்சர் எடப்பாடி கே.பழனிசாமி, கடல் அரிப்பு இப்போதுதான் வந்த மாதிரி கேட்கிறீர்கள். காலம் காலமாக கடல் அரிப்பு இருந்து கொண்டுதான் இருக்கிறது. அப்போது நீங்கள் நடவடிக்கை எடுக்கவில்லை. இப்போது நாங்கள் நடவடிக்கை எடுத்து வருகிறோம். கன்னியாகுமரி, நாகை, தூத்துக்குடி போன்ற மாவட்டங்களில் நிதி ஒதுக்கி கடல் அரிப்பை தடுக்க நடவடிக்கைகள் மேற்கொள்ளப்பட்டுள்ளன. தூண்டில் வளைவுகள் அமைக்கப்படுகின்றன. மீனவர்களின் பெரும்பாலான கோரிக்கையை நிறைவேற்றிய அரசு எங்கள் அரசு. கடல் அரிப்பு தொடர்பாக பிரச்சினைகளை கவனித்து நடவடிக்கை எடுத்து வருகிறேன் என்று பேசினார்.

தொடர்ந்து கைத்தறித்துறை அமைச்சர் ஓ.எஸ்.மணியன், மீனவர்கள் தொடர்ந்து இலங்கை கடற்படையால் உங்கள் ஆட்சியில் தாக்கப்பட்டார்கள். அவர்களது உடமைகள் பாதிக்கப்பட்டன. துப்பாக்கி சூடுகள் நடைபெற்றது. இவை எல்லாம் நடந்தது உங்கள் ஆட்சி என்பதை மறந்து விடாதீர்கள். எங்களது ஆட்சியில் கடந்த 7 ஆண்டுகளில் தமிழக மீனவர்கள் மீது ஒரு துப்பாக்கி சூடு கூட நடைபெறவில்லை என்பதை தெரிவித்துக் கொள்ள விரும்புகிறேன். கைது செய்யப்படும் மீனவர்களை உடனடியாக விடுவிக்க நடவடிக்கை மேற்கொள்கிறோம். கைது செய்யப்படும் மீனவர்கள் மரியாதையாக நடத்தப்படுகிறார்கள். உடனடியாகவும் விடுவிக்கப்படுகிறார்கள் என்றார்.

அதனைத் தொடர்ந்து எதிர்க்கட்சி தலைவர் மு.க.ஸ்டாலின், அனிதா ராதாகிருஷ்ணன் தெரிவித்த கருத்துகளுக்கு துறைசார்ந்த அமைச்சர், முதல்வர் பதில் அளித்ததில் தவறில்லை. எங்கள் உறுப்பினர் சாதனைகளைத் தான் தெரிவித்தார். குற்றச்சாட்டுகளை தவிர்க்க வேண்டும் என்றார்.

தொடர்ந்து அனிதா ராதாகிருஷ்ணன், டி.என்.பி.எஸ்.சி. தேர்வு குறித்து பேசினார். அதற்கு பதில் அளித்த முதலமைச்சர் எடப்பாடி கே.பழனிசாமி தி.மு.க. ஆட்சியில் என்ன நடந்தது என்பது எங்களுக்கு தெரியும். கடிதங்கள் கொடுத்து கைப்பற்றப்பட்டதை அறிவோம். எங்கள் அரசு தவறுகளை கண்டுபிடிக்கும் அரசாகும். வேலைவாய்ப்புக்காக நீங்கள் கடிதம் கொடுத்ததை நாங்கள் அறிவோம். எங்களுடைய அரசு தவறுகளை கண்டுபிடித்து தண்டிக்கும் அரசாகும். தவறு செய்தவர்களை சிறையில் அடைக்கும் அரசாகும் என்றார்.

இதற்கு அமைச்சர் டி.ஜெயக்குமார், டி.என்.பி.எஸ்.சி தேர்வு முறைகேடு தொடர்பாக சி.பி.சி.ஐ.டி. போலீசார் இதுவரை 50 பேரை கைது செய்திருக்கிறார்கள். எங்கேயோ ஒரு மையத்தில் தவறு நடந்துள்ளது. அது தொடர்பாக சி.பி.சி.ஐ.டி. போலீசார் விசாரணை நடத்தி கைது நடவடிக்கைகளை மேற்கொண்டுள்ளனர். தேர்தலின்போது ஏதோ ஒரு வாக்குச்சாவடியில் முறைகேடு நடந்தால் ஒட்டுமொத்த தேர்தலையுமே நிறுத்தி விட முடியுமா? தவறு நடந்த வாக்குச்சாவடியில் மட்டுமே கவனத்தில் கொள்ள முடியும். டி.என்.பி.எஸ்.சி. தேர்வு முறைகேடு தொடர்பாக நீதிமன்றத்திலும் வழக்கு உள்ளது. அது தொடர்பாக தீர்ப்பு வரட்டும் பார்த்துக் கொள்ளலாம். உங்களது ஆட்சியில் நடந்த ஸ்பெக்ட்ரம், பூச்சிமருந்து, சர்க்கரை பேரம் போன்றவை பற்றி எங்களுக்கு தெரியும் என்றார்.