தற்போதைய செய்திகள்

மக்களுக்காக உழைக்கும் எடப்பாடியாரை மீண்டும் முதல்வராக்க பாடுபடுவோம் – கடலூரில் அமைச்சர் எம்.சி.சம்பத் பேச்சு

கடலூர்

மக்களை எந்த குறையும் இல்லாமல் வைத்திருக்க வேண்டும் என்று உழைத்துக் கொண்டிருக்கும் முதல்வர் எடப்பாடி கே.பழனிசாமியை மீண்டும் முதல்வராக்க பாடுபடுவோம் என்று கடலூரில் அமைச்சர் எம்.சி.சம்பத் பேசினார்.

கடலூர் மத்திய மாவட்ட கழகத்தின் சார்பில் மண்டல குழு ஆலோசனை கூட்டம் கடலூர் பாதிரிக்குப்பம் கழக அலுவலகத்தில் நடைபெற்றது. இந்த கூட்டத்திற்கு கடலூர் மத்திய மாவட்ட கழக செயலாளரும், மண்டல தேர்தல் பொறுப்பாளரும், தொழில்துறை அமைச்சருமான எம்.சி.சம்பத் தலைமை தாங்கினார். கடலூர் தெற்கு ஒன்றிய செயலாளர் ராம பழனிச்சாமி அனைவரையும் வரவேற்றார். மாநில மருத்துவர் அணி தலைவர் எஸ்.பி.கே.சீனுவாசராஜா, பண்ருட்டி ஒன்றிய செயலாளர் கமலக்கண்ணன், குறிஞ்சிப்பாடி கிழக்கு ஒன்றிய செயலாளர் கே.ஜி.பாஷ்யம்,, குறிஞ்சிப்பாடி நகர செயலாளர் ஆனந்த் பாஸ்கர், நெய்வேலி நகர செயலாளர் கோவிந்தராஜ் ஆகியோர் முன்னிலை வகித்தனர்.

இந்த கூட்டத்தில் அமைச்சர் எம்.சி.சம்பத் பேசியதாவது:-

தற்போது நாம் அம்மா இல்லாத தேர்தலை சந்திக்க இருக்கிறோம். இந்தத் தேர்தலில் நாம் வெற்றி பெற்றாக வேண்டும். இது காலத்தின் கட்டாயம். நாம் இந்த வெற்றியை பெற்று அம்மா அவர்கள் சட்டமன்றத்தில் எனக்கு பின்னும் கழகம் 100 ஆண்டுகளுக்கு மேல் இருக்கும் என்று கூறிய கூற்றை நிரூபிக்க வேண்டும். இதற்கு நாம் அனைவரும் இணைந்து பாடுபட வேண்டும்.

நிவர் மற்றும் புரெவி புயல் தாக்கத்தால் கடலூரில் கனமழை பெய்தது. முதல்வர் எடப்பாடி கே.பழனிசாமி இருமுறை கடலூர் மாவட்டத்தை பார்வையிட்டார். நமக்குக் கிடைத்திருக்கிற முதல்வர் மிகவும் எளிமையான முதல்வர். இதேபோன்ற ஒரு முதல்வர் கிடைப்பதற்காக நாம் பெருமைப்பட வேண்டும். கொரோனா காலத்தில் அவர் ஆற்றிய பணி அளவிட முடியாதது. அதிகாரிகள் எல்லாம் ஒரு கொரோனா காலத்தால் சுற்றுப்பயணம் செய்ய வேண்டாம் என்று கூறிய நேரத்திலும் மக்களை சந்திக்க வேண்டும். அதிகாரிகள் மாவட்டத்தில் என்ன வேலை செய்தார்கள் என்று ஆய்வு செய்ய வேண்டும் என்று தமிழகம் முழுவதும் சுற்றி வந்து ஆய்வு செய்தவர் முதல்வர் எடப்பாடியார்.

மக்கள் நலன் ஒன்றே எனது குறிக்கோள். மக்களை எந்த குறையும் இல்லாமல் வைத்திருக்க வேண்டும் என்று உழைத்துக் கொண்டிருக்கும் மக்கள் முதல்வர் எடப்பாடி கே.பழனிசாமியை நாம் மீண்டும் முதல்வராக்க வேண்டும். தற்போது நமது தேர்தல் களத்தில் புதிய வியூகமாக மகளிர் பூத் கமிட்டி அமைக்க வேண்டும். ஒரு பூத்திற்கு குறைந்த பட்சம் 25 பேர் முதல் 50பேர் வரை மகளிர் கொண்ட பூத் அமைக்க வேண்டும்.

கமிட்டியில் யார் அந்த ஊரில் நன்கு வேலை செய்வார்களோ, யாரிடம் மக்களுக்கு பெயர் இருக்கின்றது. யார் சிறப்பாக சமூக சேவை செய்கிறார்களோ அவர்களுக்கு முன்னுரிமை கொடுக்க வேண்டும். அதேபோன்று தகவல் தொழில்நுட்ப பிரிவு, இளைஞர் பாசறை என ஒரு வாக்குச்சாவடிக்கு 100 பேர் வரை நியமிக்க வேண்டும். இந்த தேர்தலில் நாம் எந்த மனக்கசப்புகள் இருந்தாலும் அதை மறந்துவிட்டு பணியாற்ற வேண்டும்.

இந்த ஆட்சியில் மக்களுக்கு எந்த குறையும் இல்லை. மக்களுக்கு தேவையான அனைத்தையும் கொடுக்கும் அம்மா வழியிலான ஆட்சியே தற்போது நடைபெற்றுக் கொண்டிருக்கிறது. மேட்டூர் அணை கட்டிய காலத்திலிருந்து 100 அடிக்கு மேல் 300 நாட்களுக்கு மேல் இருந்தது முதல்வர் எடப்பாடியார் ஆட்சி காலத்தில் மட்டும் தான். நாம் அனைவரும் இந்த தேர்தலில் சிறப்பாக பணியாற்றி கடலூர் மத்திய மாவட்ட கழகத்தில் உள்ள மூன்று தொகுதிகளிலும் வெற்றிபெற்று வெற்றிக்கனியை முதல்வரிடம் சமர்ப்பித்து, கடலூர் மத்திய மாவட்டம் கழகத்தின் இரும்பு கோட்டை என்பதை நிரூபிக்க வேண்டும்.

இவ்வாறு அமைச்சர் எம்.சி.சம்பத் பேசினார்.

முடிவில் கடலூர் நகர கழக செயலாளர் ஆர்.குமரன் நன்றி கூறினார்.