திருவள்ளூர்

உள்ளாட்சித் தேர்தலில் கழகத்தின் வெற்றி உறுதி-மாவட்ட செயலாளர் சிறுணியம் பி.பலராமன் பேச்சு

திருவள்ளூர்

தி.மு.க.வின் போலி முகத்திரையை கிழித்தெறிய மக்கள் தயாராக இருப்பதால் வரும் உள்ளாட்சித் தேர்தலில் கழகத்தின் வெற்றி உறுதி என்று திருவள்ளூர் வடக்கு மாவட்ட கழக செயலாளர் சிறுணியம் பி.பலராமன் கூறினார்.

திருவள்ளூர் வடக்கு மாவட்ட வழக்கறிஞர் பிரிவு மற்றும் தகவல் தொழில்நுட்ப பிரிவு சார்பில் கழக வளர்ச்சி பணிகள் குறித்த ஆலோசனை கூட்டம் மஞ்சங்கரனை ஜெ.என்.என்.பொறியியல் கல்லூரியில் கல்வி குழுமத்தின் தலைவரும், திருவள்ளூர் வடக்கு மாவட்ட கழக வழக்கறிஞர் பிரிவு செயலாளருமான எஸ்.ஜெயச்சந்திரன் ஏற்பாட்டில் நடைபெற்றது. மாவட்ட அம்மா பேரவை செயலாளரும், முன்னாள் சட்டமன்ற உறுப்பினருமான கே.எஸ்.விஜயகுமார் முன்னிலை வகித்தார்.

கூட்டத்துக்கு மாவட்ட கழக செயலாளரும், முன்னாள் சட்டமன்ற உறுப்பினருமான சிறுணியம் பி.பலராமன் தலைமை வகித்து ஆலோசனை வழங்கி பேசியதாவது:-

கழகத்தின் கேள்விகளுக்கு பதில் சொல்ல முடியாமல் திமுக அரசு கழக தகவல் தொழில்நுட்ப பிரிவினர் மீது பொய் வழக்குகள் பதிவு செய்து வருகின்றனர். திமுகவினரை கண்டு நீங்கள் யாரும் பயப்பட வேண்டாம். அவர்கள் செய்யும் முறைகேடுகளையும், அட்டூழியங்களையும், அராஜகங்களையும் கழக தகவல் தொழில்நுட்ப பிரிவினர் மக்களிடம் கொண்டு சேர்க்க வேண்டும்.

கழக ஆட்சியில் நாம் ஏழை, எளிய அடித்தட்டு மக்களை சென்றடையும் வகையில் எண்ணற்ற திட்டங்களை நிறைவேற்றியுள்ளோம். ஆனால் கழக அரசு கொண்டு வந்த மக்கள் நலத்திட்டங்களை தி.மு.க. அரசு ரத்து செய்கிறது.

கொரோனா தொற்று காலத்திலும் அரிசி பருப்பு உள்ளிட்ட அத்தியாவசிய தேவைகளை மாதம்தோறும் வழங்கி மக்களுக்கு வழங்கி உதவிகரமாக இருந்துள்ளோம். ஆனால் தி.மு.க.வினர் மக்களிடமிருந்து எடுத்து பழக்கப்பட்டவர்கள். அவர்கள் மக்களுக்கு கொடுத்ததாக சரித்திரமே கிடையாது. அதுவும் திமுக வரலாற்றிலேயே கிடையாது.

புரட்சித்தலைவர் எம்.ஜி.ஆர். தொடங்கிய அனைத்திந்திய அண்ணா திராவிட முன்னேற்ற கழகம் என்ற பேரியக்கத்தை ஒரு ஸ்டாலின் அல்ல ஓராயிரம் ஸ்டாலின் வந்தாலும் தொட்டு கூட பார்க்க முடியாது.

புரட்சித்தலைவர் எம்.ஜி.ஆர். மற்றும் புரட்சித்தலைவி அம்மா அவர்களின் வழியில் கழக ஒருங்கிணைப்பாளர் ஓ.பன்னீர்செல்வம், கழக இணை ஒருங்கிணைப்பாளர் எடப்பாடி கே.பழனிசாமி ஆகியோர் கட்சியை சிறப்பாக வழிநடத்தி செல்கிறார்கள்.

வருகின்ற உள்ளாட்சித் தேர்தலில் தி.மு.க.வினரின் போலி முகத்திரையை கிழித்தெறிய தமிழக மக்கள் ஆயத்தமாக உள்ளனர். ஆகவே கழக தகவல் தொழில்நுட்ப பிரிவினர் வீடு வீடாக சென்று திருவள்ளூர் வடக்கு மாவட்டத்தில் உள்ள ஐந்து பேரூராட்சிகளையும் கழகம் வென்றிட ஒன்றிணைந்து பாடுபட வேண்டும்.

இவ்வாறு திருவள்ளூர் வடக்கு மாவட்ட கழக செயலாளரும், முன்னாள் சட்டமன்ற உறுப்பினருமான சிறுணியம் பி.பலராமன் பேசினார்.

முடிவில் வடக்கு மாவட்ட தகவல் தொழில்நுட்ப பிரிவு செயலாளர் எஸ்.மனோஜ் கூறினார்.