சிறப்பு செய்திகள்

நடப்பாண்டில் 34 மாவட்டங்களில் ரூ.490.70 கோடியில் 1364 குடிமராமத்து பணிகள் – பேரவையில் முதலமைச்சர் தகவல்

சென்னை

நடப்பாண்டில் 34 மாவட்டங்களில் ரூ.490.70 கோடியில் 1364 குடிமராமத்து பணிகள் மேற்கொள்ளப்படும் என்று சட்டப்பேரவையில் முதலமைச்சர் எடப்பாடி கே.பழனிசாமி தெரிவித்தார்.

தமிழக சட்டப்பேரவையில் நெடுஞ்சாலைகள் மற்றும் சிறு துறைமுகங்கள் துறை, பொதுப்பணித்துறை மானிய கோரிக்கை மீதான விவாதத்தில் தி.மு.க சட்டமன்ற உறுப்பினர் தங்கம் தென்னரசு பேசினார். அப்போது அவர் குடிமராமத்து தொடர்பாக எங்களுக்கு எந்த தகவலும் வருவதில்லை என்று குறிப்பிட்டார்.

இதற்கு பதில் அளித்து முதலமைச்சர் எடப்பாடி கே.பழனிசாமி பேசியதாவது:-

அப்படி என்றால் தொகுதி பக்கம் போயிருக்க மாட்டார்கள் என்று தெரிகிறது. தொகுதி பக்கம் போயிருந்தால், ஏரியை பார்த்திருந்தால், தூர் வாருவது உங்களுக்கு தெரிந்திருக்கும். ஆகவே நீங்கள் தொகுதிப் பக்கம் போகவில்லை என்பது எங்களுக்கு தெரிகிறது. நாட்டு மக்களே பாராட்டிக் கொண்டு இருக்கிறார்கள். உங்களுக்கு பாராட்ட மனம் இல்லை என்றாலும், குறை சொல்லாமல் இருந்தால் கூட பரவாயில்லை. இது மிகப்பெரிய திட்டம். குடிமராமத்து என்பது நீண்ட காலமாக, இன்றைக்கு விவசாய பெருமக்கள் வைத்த கோரிக்கையை எங்களுடைய அரசு நிறைவேற்றி இருக்கிறது.

இன்றைக்கு சுமார் 14,000 ஏரிகள் பொதுப்பணித்துறையின் சார்பாக இருக்கிறது. இந்த 14,000 ஏரிகளும் படிப்படியாக குடிமராமத்து திட்டத்தின் மூலமாக சரி செய்து பருவகாலங்களில் பெய்கின்ற மழைநீர் முழுவதும் சேமிக்க வேண்டும் என்பதற்காகத் தான் இந்த திட்டத்தை கொண்டு வந்தோம். நீங்கள் ஏதுவுமே செய்யவில்லை, செய்யவில்லை என்றால். முதல் ஆண்டு, குடிமராமத்து திட்டத்தை 2016-17-ம் ஆண்டில் முதல் முதலாக இந்த திட்டத்தை கொண்டு வந்தோம். இந்த திட்டத்தை பரிட்சார்த்த முறையில் நாங்கள் எடுத்துக் கொண்டோம்.

100 கோடி ரூபாய் நிதி கொடுத்தோம். 100 கோடி ரூபாயில் 30 மாவட்டத்தில் 1513 ஏரிகளை எடுத்தோம். ஒரு ஏரிக்கு குறிப்பிட்ட அளவு தான் நிதி கொடுத்தோம். முதல் முதல் எடுக்கும் போது, இந்த திட்டம் சிறப்பான திட்டமா, பொதுமக்களிடம் வரவேற்பு கிடைக்குமா, விவசாயிகளிடம் வரவேற்பு கிடைக்குமா, அப்படி என்று பரிட்சாத்த முறையில் 100 கோடி ரூபாய் ஒதுக்கி, 1513 ஏரிகளை எடுத்தோம். இதற்கு விவசாய பெருங்குடி மக்களிடத்தில் நல்ல வரவேற்பு கிடைத்தது. பொதுமக்களிடத்திலும் நல்ல வரவேற்பு கிடைத்தது. அதை பொறுக்க முடியாமல் நீங்கள் கூட, தவறான கருத்தை பதிவு செய்திருக்கிறீர்கள்.

2017-18-ம் ஆண்டில் சிறப்பான திட்டம் என்று மக்களிடத்திலே வரவேற்பு கிடைத்த காரணத்தினாலே, விவசாயிகளிடம் வரவேற்பு கிடைத்த காரணத்தினாலே 30 மாவட்டங்களில் 331.07 கோடி ரூபாய் மதிப்பீட்டிலே 1523 பணிகள் அறிவிக்கப்பட்டு, 1463 பணிகள் நிறைவடைந்துள்ளன. 15 பணிகள் முன்னேற்றத்தில் உள்ளன. 45 பணிகள் பல்வேறு காரணங்களினால் கைவிடப்பட்டு இருக்கின்றன.

2019-2020-ம் ஆண்டில் 499.69 கோடி ரூபாய் மதிப்பீட்டில் 1829 பணிகள் மேற்கொள்ளப்பட்டு, 1094 பணிகள் முடிவடைந்துள்ளன, 718 பணிகள் முன்னேற்றத்தில் உள்ளன, பல்வேறு காரணங்களுக்காக கைவிடப்பட்டுள்ள 17 பணிகளுக்கு மாற்றாக கன்னியாகுமரி மாவட்டத்தில் 3.83 கோடி ரூபாய் மதிப்பீட்டில் 20 குடிமராமத்து பணிகளை செயல்படுத்த உத்தேசிக்கப்பட்டுள்ளது. இவ்வாறாக 3 ஆண்டுகளில் பொதுப்பணித் துறையின் மூலமாக பராமரிக்கப்படுகின்ற ஏரிகளில் 4865 பணிகள் 930.76 கோடி ரூபாய் மதிப்பீட்டில் செயல்படுத்தப்பட்டுள்ளன.

மேலும், வருகின்ற 2020-2021-ம் ஆண்டில் 34 மாவட்டங்களில் 1364 குடிமராமத்து பணிகள் 490.70 கோடி ரூபாய் மதிப்பீட்டில் செயல்படுத்தப்படும். முழுக்க முழுக்க விவசாயிகளை வைத்து தான் இந்தப் பணிகள் மேற்கொள்ளப்படும். டென்டர் விடுவதே கிடையாது. நீர்பாசன சபை, விவசாய சங்கங்கள், ஏரி பாசனம் பெறுகின்ற அந்த விவசாயிகளை உள்ளடக்கி இந்தப் பணிகளை மேற்கொள்கின்றோம்.

இந்தப் பணிகளை பொறுத்தவரைக்கும் அற்புதமான திட்டம், குடிமராமத்து திட்டம். இந்த திட்டம் நிறைவேறுகின்ற போது முழுமையாக 14,000 ஏரிகளும் தூர் வாரப்படுகின்ற போது, இன்றைக்கு பெய்கின்ற மழைநீர் முழுவதும் சேமிக்கப்பட்டு விவசாயிகளுக்கு தேவையான நீர் கிடைக்கும். பொதுமக்களுக்கு தேவையான குடிநீர் கிடைக்கும் என்ற அடிப்படையிலே இந்த திட்டத்தை கொண்டு வந்திருக்கின்றோம்.

அதுவும் ஒரு ஏரிக்கு எவ்வளவு செலவாகுமோ, அவ்வளவு செலவையும் இப்பொழுதே அதிலே குறிப்பிடுகின்றோம். முன் எல்லாம் பரிட்சார்த்த முறையிலே ஒரு ஏரிக்கு 10 லட்சம் ரூபாய் தான் கொடுப்போம். இப்போது அதை மாற்றி ஒரு ஏரிக்கு எவ்வளவு செலவாகும், கரையை பலப்படுத்துவது, வரத்து வாய்க்கால், மதகுகளை சரி செய்தல், இப்படி எல்லா வகையிலும் பொதுப்பணித் துறை மூலமாக எஸ்டிமேட் போட்டு அதனை விவசாயிகளிடத்தே கொடுத்து, இப்பணிகளை விவசாயிகளே மேற்கொள்வார்கள்.

அனைத்து ஏரிகளும் எடுத்துக் கொள்ள வில்லை. நாம் 14,000 ஏரிகளில் இதுவரை 4865 ஏரிகளை தான் நாங்கள் எடுத்து இப்பணிகளை மேற்கொண்டு இருக்கிறோம் என்பதை தெரிவித்துக் கொள்கிறேன். நேற்றைய முன்தினம் கூட, உள்ளாட்சித்துறை அமைச்சர் ஊராட்சி ஒன்றியங்களின் கட்டுப்பாட்டில் இருக்கின்ற ஏரிகளும் இதேபோல குடிமராமத்து திட்டத்தின் கீழ் செய்ய வேண்டும் என்று மக்களிடத்திருந்தும், விவசாயிகளிடத்திருந்தும் கோரிக்கை வந்ததன் அடிப்படையில் 1250 கோடி ரூபாய் மதிப்பீட்டில் அந்தப் பணிகளையும் நாங்கள் மேற்கொண்டு வருகிறோம் என்பதையும் உறுப்பினருக்கு தெரிவித்துக் கொள்கிறேன்.

உங்களின் வல்லமை பேச்சால் எதையும் வீழ்த்த முடியாது. உண்மை நாட்டு மக்களுக்கு தெரியும். இது முழுக்க முழுக்க விவசாயிகளே செய்கின்ற பணி. உங்களுடைய ஆட்சிக் காலத்தில் ஒருவருக்கே டெண்டர் கொடுத்து பாக்ஸில் போடுகின்ற டெண்டர் எல்லாம் கிடையாது. இது முழுக்க முழுக்க விவசாயிகளுக்கு தான் இந்த காசோலையே போகின்றது.

அதுவுமே அந்த விவசாயிகள் எல்லாம் எப்படி பணிகளை மேற்கொள்ள வேண்டும் என்று கையேடும் கொடுக்கப்பட்டு இருக்கிறது. நீங்கள் உங்கள் பகுதியில் இருக்கின்ற விவசாய குடிமக்களை சந்தித்து கேளுங்கள். இந்த குடிமராமத்து திட்டம் சரியான திட்டமா, இல்லையா என்று கேட்டுவிட்டு பேசினால் சரியாக இருக்கும் என்று உறுப்பினருக்கு தெரிவித்துக் கொள்கிறேன்.

நீங்கள் சொல்வதற்கு தான் நான் அந்த பதிலை சொன்னேன். உங்களுடைய தொகுதியில் இந்த குடிமராமத்து திட்டப் பணி நடைபெற்று கொண்டு இருக்கிறது. நீங்கள் எதுவுமே இல்லை என்கிறீர்களே. அதனால் தான் நான் சொல்கின்றேன். குடிமராமத்துப் பணி உங்களுடைய தொகுதியில் நடைபெற்று கொண்டு இருக்கிறது.

அந்த விவரத்தை தான் நான் சொல்கின்றேன். அதனால் தான் நீங்கள் பார்த்தீர்களா இல்லையா என்று கேள்வி கேட்டேன். ஆகவே, நீங்கள் எதுவும் நடக்கவில்லை, ஒன்றுமே மக்களுக்கு நடக்கவில்லை என்ற தவறான செய்தியை சொல்லுகின்ற போது, அதற்கு பதில் சொல்ல வேண்டிய கடமை எனக்கு இருக்கிறது. அதற்காகத் தானே நீங்கள் கேள்வி கேட்கிறீர்கள்.

இவ்வாறு முதலமைச்சர் எடப்பாடி கே.பழனிசாமி பேசினார்.