கன்னியாகுமரி

அனைத்து நோயாளிகளுக்கும் தரமான உணவு – டெல்லி சிறப்பு பிரதிநிதி என்.தளவாய்சுந்தரம் தகவல்

கன்னியாகுமரி

கன்னியாகுமரி மாவட்டம், நாகர்கோவில், ஆசாரிப்பள்ளம் அரசு மருத்துவக்கல்லூரி, மருத்துவமனையில் அனைத்து நோயாளிகளுக்கும் தரமான உணவு மற்றும் பால், பழங்கள் தடையின்றி வழங்கப்பட்டு வருகிறது என்று தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம் தெரிவித்துள்ளார்.

தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம் தலைமையில், ஆசாரிப்பள்ளம் அரசு மருத்துவக்கல்லூரி, மருத்துவமனை முதல்வர் மற்றும் மருத்துவ அலுவலர்களுடன், மருத்துவகல்லூரி, மருத்துவமனையில் கொரோனா நோயாளிகளுக்கு, வழங்கப்பட்டு வரும் உணவுகள், சிகிச்சைகள் மற்றும் அடிப்படை வசதிகள் குறித்த ஆய்வுக் கூட்டம், நாகர்கோவில் அரசினர் விருந்தினர் மாளிகையில் நேற்று நடைபெற்றது.

ஆய்வுக்கூட்டத்திற்கு பின் தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் செய்தியாளர்களிடம் தெரிவித்ததாவது:-

முதலமைச்சர் எடப்பாடி கே.பழனிசாமி தலைமையிலான தமிழக அரசு பொதுமக்களின் நலனில் முழுமையான அக்கறை கொண்டுள்ளது. கன்னியாகுமரி மாவட்டத்தில், கொரோனா வைரஸ் நோயால் பாதிக்கப்பட்டவர்களை, மிகச் சிறந்த முறையில், ஆசாரிப்பள்ளம் அரசு மருத்துவக்கல்லூரி மருத்துவமனை முதல்வர் இரா.சுகந்தி இராஜகுமாரி, சக மருத்துவர்களுடன் இணைந்து சிறப்பாக செயல்பட்டு, பாதிக்கப்பட்டவர்களுக்கு தேவையான மருத்துவம், உணவு உள்ளிட்ட அடிப்படை வசதிகளை மிகச்சிறப்பாக செய்து வருகிறார்கள். இதனால், எந்தவொரு பாதிப்பும் இல்லாமல், நோயாளிகள் காப்பாற்றப்பட்டு வருகிறார்கள்.

பொதுமக்களின் நலன் கருதி, நோயாளிகளை காப்பதில், நமது மாவட்டம் மிகச் சிறப்பாக அனைத்து வசதிகளையும் ஏற்படுத்தி தந்துள்ளது. தமிழக அரசின் மக்கள் நல்வாழ்வுத்துறை சென்னையில், செய்து வரும் மருத்துவ வசதிகளுக்கு, ஈடு இணையாக நமது மாவட்ட மருத்துவர்கள் செயல்பட்டு வருகிறார்கள் என்பது பாராட்டுக்குரியது.

ஆசாரிப்பள்ளம் மருத்துவமனை மருத்துவர்கள், நமது மாவட்டத்தின் பிற பகுதிகளிலுள்ள மருத்துவத்துறை அலுவலர்களுடன் இணைந்து, கொரோனா வைரஸ் நோய் தடுப்பு பணியில் ஈடுபட்டு, இந்நோய் பரவாமல் இருப்பதற்கான அனைத்து முயற்சிகளையும் மேற்கொண்டு வருகிறார்கள். நாளுக்கு நாள் நோயாளிகளின் எண்ணிக்கை அதிகமாவதால், மருத்துவமனை முதல்வர் அதனை கணக்கிட்டு, அவர்களுக்கு தேவையான அடிப்படை உணவு கிடைத்திட ஏற்பாடு செய்து வருகிறார்.

மேலும், கொரோனா வைரஸ் தொற்று அறிகுறி இல்லாமல், கொரோனா தொற்றால் பாதிக்கப்பட்டு இருப்பவர்களுக்கும், மாவட்ட நிர்வாகத்தின் மூலம் தேவையான உணவுகள் வழங்கப்பட்டு வருகிறது. மாவட்ட ஆட்சித்தலைவர் பிரசாந்த் மு.வடநேரே ஏற்பாட்டில், பழங்கள் மற்றும் பழ ஜூஸ், பழகலவைகள், கபசுரக்குடிநீர் ஆகியவை வழக்கமாக வழங்கப்படும் உணவோடு வழங்கப்பட்டு வருகிறது.

நடு இரவில் மருத்துவகல்லூரி, மருத்துவமனைக்கு வரும் தொற்று நோயாளிகளுக்கு அவசர உணவாக பிரட் மற்றும் பழங்களும் வழங்கப்பட்டு வருகிறது. ஒரு நோயாளிக்கு கால் லிட்டர் வீதம் பாலும், முட்டைகளும் உணவுடன் வழங்கப்பட்டு வருகிறது. நோயாளிகளின் எண்ணிக்கையை கணக்கில் கொண்டு உணவு தயாரிப்பதோடு, அதிகமாக 100 நபர்களுக்கு மூன்று வேளைகளுக்கும் கூடுதலாக உணவுகள் தயார் செய்யப்பட்டு, ஆரோக்கியமான முறையில் உள்நோயாளிகளுக்கு வழங்கப்பட்டு வருகிறது. மேலும், மாலை நேரங்களில் நோயாளிகளுக்கு சுண்டல், பயிறு வகைகள் மற்றும் பால் வழங்கப்படுகிறது.

நமது மருத்துவமனையில், 500 படுக்கைகள் கொண்ட தனிமைப்படுத்தப்பட்ட வார்டுகளும், 100 தனி அறைகள் கொண்ட தனிபிரிவு வார்டும், 60 படுக்கைகள் கொண்ட சிறிய மருத்துவமனை அளவிலும், தற்போது தயார் நிலையில் உள்ளது. மேலும், கூடுதலாக சேர்த்து மொத்தம் 860 படுக்கைகளாக உயர்த்துவதற்கு தேவையான நடவடிக்கைகள் மேற்கொள்ளப்பட்டுள்ளது. ஆசாரிப்பள்ளம் மருத்துவமனையோடு சேர்த்து, கோட்டார், அரசு ஆயுர்வேத மருத்துவகல்லூரி, மருத்துவமனை, தக்கலை அரசு தலைமை மருத்துவமனை ஆகியவற்றில் தேவையான மருத்துவ வசதிகள், கொரோனா வைரஸ் தொற்றால் பாதிக்கப்பட்டவர்களுக்கு ஏற்படுத்தப்பட்டுள்ளது.

பிற இடங்களான கொரோனா பராமரிப்பு மையங்களில், தனிமைப்படுத்தி சிகிச்சை பெற்று வரும்; நோயாளிகளுக்கு, ஏதேனும், நோய் தொற்று அதிகரித்து, ஆபத்தான நிலை ஏற்பட்டால், அவர்களை ஆசாரிப்பள்ளம், அரசு மருத்துவமனைக்கு அழைத்து வந்து, தீவிர சிகிச்சை அளிக்க ஏற்பாடு செய்யப்பட்டுள்ளது. கொரோனா வைரஸ் தொற்றால் பாதிக்கப்பட்ட கர்ப்பிணி பெண்கள், இருதயநோயாளிகள், முதியோர் உள்ளிட்டோருக்கு செயற்கை சுவாசம் உள்ளிட்டவை தயாராக உள்ளது. மேலும், கொரோனா வைரஸ் பரிசோதனை முடிவுகள் தெரிய குறைந்தது 6 மணி நேரம் முதல், அதிகப்பட்சமாக 24 மணிநேரம் வரை ஆகும்.

ஈரான் நாட்டிற்கு மீன்பிடிக்க சென்ற குமரி மாவட்ட மீனவர்களில் எஞ்சியுள்ள மீனவர்களை சொந்த மாவட்டத்திற்கு அழைத்து வர முதலமைச்சர் எடப்பாடி கே.பழனிசாமியிடம் தெரிவித்துள்ளோம். முதலமைச்சர், பிரதமருக்கு இதுகுறித்து, கடிதம் அனுப்பியுள்ளார். ஈரானில் எஞ்சியுள்ள மீனவர்களை சொந்த மாவட்டத்திற்கு அழைத்துவர உரிய நடவடிக்கை மேற்கொண்டுள்ளார்கள்.

மற்ற மாவட்டங்களை காட்டிலும், நமது மாவட்டத்தில் தான் கொரோனா பாதிக்கப்பட்டவர்கள் நோய் குணமானபின் முதல் பரிசோதனை முடிந்து, ஏழு நாட்கள் கழித்து 2-வது பரிசோதனை செய்து, அதிலும் நோய் தொற்று அறிகுறி இல்லை என்றாலும், 10 நாட்களுக்கு மேல் கொரோனா வைரஸ் தொற்று அறிகுறி இல்லை என்று தெரிந்தபின்னரே, அவர்களை வீட்டிற்கு அனுப்பி வைக்கிறோம். 2-வது பரிசோதனை முடிந்து, அவர்கள் வீட்டிற்கு செல்லும் வரை அவர்களுக்கு தேவையான சத்தான உணவு, பால், பழவகைகள் உள்ளிட்டவைகள் வழங்கப்பட்டு வருகிறது.

பொதுமக்கள் கண்டிப்பாக முககவசங்கள் அணிந்து, சமூக இடைவெளியை கடைபிடிக்க வேண்டும். கூடுமானவரை தேவையில்லாமல் வெளியிடங்களுக்கு செல்லவோ, விடுமுறை நாட்களில் உற்றார், உறவினர் வீடுகளுக்கு செல்வதை தவிர்க்க வேண்டும். கடைகளுக்கு காய்கறிகள், மளிகைப்பொருட்கள் உள்ளிட்ட பொருட்களை வாங்க வெளியே செல்லும் போது, முககவசங்கள், கையுறைகள் அணிந்து சமூக இடைவெளியை கண்டிப்பாக கடைபிடிக்க வேண்டும்.

மருத்துவர்களால் நோய்களை குணப்படுத்துவதற்கான சிகிச்சைகளை மட்டுமே மேற்கொள்ள முடியும், பொதுமக்களாகிய நீங்கள் தான் சமூக பொறுப்புடன் தமிழக அரசின் நெறிமுறைகளை கடைபிடித்து, உங்களையும், உங்கள் குடும்பத்தினரையும், உற்றார் உறவினர்களையும் பாதுகாக்க முடியும். எனவே, பொதுமக்களாகிய நீங்கள் அனைவரும், கொரோனா நோயை முற்றிலுமாக தடுப்பதற்கு, மாவட்ட நிர்வாகத்திற்கு முழு ஒத்துழைப்பு தர வேண்டும் என அன்புடன் கேட்டுக்கொள்கிறேன்.

இவ்வாறு தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் தெரிவித்தார்.

நடைபெற்ற செய்தியாளர்கள் சந்திப்பில், மாவட்ட ஆவின்பெருந்தலைவர் எஸ்.ஏ.அசோகன், மாவட்ட அரசு ரப்பர் வளர்ப்போர் கூட்டுறவு விற்பனை சங்கத்தலைவர் டி.ஜாண்தங்கம், ஆசாரிப்பள்ளம் அரசு மருத்துவக்கல்லூரி, மருத்துவமனை முதல்வர் மரு. இரா.சுகந்தி இராஜகுமாரி, ஆசாரிப்பள்ளம் அரசு மருத்துவக்கல்லூரி, மருத்துவமனை கண்காணிப்பாளர் மரு. ஓய்.அருள்பிரகாஷ், உறைவிட மருத்துவர் மரு.எஸ்.ஆறுமுகவேலன், உதவி உறைவிட மருத்துவர்கள் மரு.விஜயலெட்சுமி, மரு.ரெனிமோள், அறங்காவலர் குழு உறுப்பினர் ஜெயசந்திரன் (எ) சந்துரு, மாவட்ட கூட்டுறவு நூற்பாலைத் தலைவர் ஏ.சகாயராஜ், புத்தேரி வேளாண்மை தொடக்க கூட்டுறவு கடன் சங்கத்தலைவர் எஸ்.சாம்ராஜ் மற்றும் பலர் கலந்து கொண்டார்கள்.