தற்போதைய செய்திகள்

முதலமைச்சரின் தொடர் நடவடிக்கையால் அணைகள் நிரம்பி பாசனத்திற்கு தண்ணீர் திறந்து விடப்படுவதால் விவசாயிகள் மகிழ்ச்சி – அமைச்சர்கள் பெருமிதம்

ஈரோடு

விவசாயிகளின் நலன் கருதி முதலமைச்சர் எடப்பாடி கே.பழனிசாமி மேற்கொண்டு வரும் தொடர் நடவடிக்கை மூலம் அணைகள் நிரம்பி, பாசனத்திற்கு தேவையான தண்ணீர் திறந்து விடப்படுவதால் விவசாயிகள் பெருமகிழ்ச்சி அடைந்துள்ளனர் என்று அமைச்சர்கள் கே.ஏ.செங்கோட்டையன், கே.சி.கருப்பணன் ஆகியோர் தெரிவித்துள்ளனர்.

ஈரோடு மாவட்டம், பவானிசாகர் அணையிலிருந்து மாவட்ட ஆட்சித்தலைவர் சி.கதிரவன் தலைமையில், சட்டமன்ற உறுப்பினர்கள் கே.வி.இராமலிங்கம் (ஈரோடு மேற்கு), கே.எஸ்.தென்னரசு (ஈரோடு கிழக்கு), வே.பொ.சிவசுப்பிரமணி (மொடக்குறிச்சி), சு.ஈஸ்வரன் (பவானிசாகர்), கே.ஆர்.ராஜாகிருஷ்ணன் (அந்தியூர்), உ.தனியரசு (காங்கேயம்) ஆகியோர் முன்னிலையில், பள்ளிக்கல்வி, இளைஞர் நலன் மற்றும் விளையாட்டு மேம்பாட்டுத்துறை அமைச்சர் கே.ஏ.செங்கோட்டையன், சுற்றுச்சூழல் துறை அமைச்சர் கே.சி.கருப்பணன் ஆகியோர் பாசனத்திற்கு தண்ணீரை திறந்து விட்டனர்.

இந்நிகழ்ச்சியில் அமைச்சர்கள் கே.ஏ.செங்கோட்டையன், கே.சி.கருப்பணன் ஆகியோர் செய்தியாளர்களிடம் தெரிவித்ததாவது:-

முதலமைச்சர் எடப்பாடி கே.பழனிசாமி விவசாயிகளின் நலன் கருதி தமிழ்நாட்டில் உள்ள நீர்நிலைகளை பராமரிக்கும் விதமாக குடிமராமத்து திட்டத்தினை செயல்படுத்தி வருகிறார். இதன் மூலம் நீர்நிலைகள் நிரம்பி வருவதால் விவசாயிகள் மகிழ்ச்சி அடைந்து வருகின்றனர். மேலும் விவசாய நிலங்களை பாதுகாக்கும் வகையில் விவசாயிகளின் கோரிக்கையினை ஏற்று தேவையான நேரங்களில் உடனடியாக மாவட்டங்களில் உள்ள முக்கிய அணைகளின் வாயிலாக பாசன நிலங்கள் பயன்பெறும் வகையில் தண்ணீர் திறந்து விட ஆணையிட்டு பிறப்பிக்கப்பட்டு வருகிறது.

விவசாயிகளின் நலன் காக்கும் அரசாக புரட்சித்தலைவி அம்மா அவர்களின் அரசு திகழ்ந்து வருகிறது. ஈரோடு மாவட்டம், பவானிசாகர் அணையானது தற்பொழுது 3வது முறையாக நிரம்பியுள்ளது. முதலமைச்சர் எடப்பாடி கே.பழனிசாமிக்கு ஈரோடு மாவட்டம், பவானிசாகர் அணையிலிருந்து கீழ்பவானி திட்ட கால்வாய்கள் மூலம் கீழ்பவானி திட்ட பிரதான கால்வாய் ஒற்றைப்படை மதகுகள் மற்றும் சென்னசமுத்திரம் பகிர்மான கால்வாய் இரட்டைப்படை மதகுகளின் முதல் போக பாசனத்திற்கு தண்ணீர் திறந்து விடுமாறு விவசாய பெருமக்கள் வேண்டுகோள் விடுத்திருந்தனர்.

முதலமைச்சர் எடப்பாடி கே.பழனிசாமி விவசாய பெருமக்களின் வேண்டுகோளினை ஏற்று, ஈரோடு மாவட்டம், பவானிசாகர் அணையிலிருந்து கீழ்பவானி திட்ட கால்வாய்கள் மூலம் கீழ்பவானி திட்ட பிரதான கால்வாய் ஒற்றைப்படை மதகுகள் மற்றும் சென்னசமுத்திரம் பகிர்மான கால்வாய் இரட்டைப்படை மதகுகளின் முதல் போக பாசனத்திற்கு 14.08.2020 முதல் 120 நாட்களுக்கு 23,846.40 மி.கன அடி தண்ணீர் திறந்து விட ஆணையிட்டதை தொடர்ந்து தண்ணீர் திறந்து வைக்கப்பட்டுள்ளது.

இதன் மூலம் ஈரோடு மாவட்டத்தில் கோபிசெட்டிபாளையம், பவானி, பெருந்துறை, ஈரோடு, மொடக்குறிச்சி மற்றும் கொடுமுடி வட்டங்கள், திருப்பூர் மாவட்டத்தில் காங்கேயம் வட்டம், கரூர் மாவட்டத்தில் அரவக்குறிச்சி ஆகிய பகுதிகளில் உள்ள 1,03,500 ஏக்கர் நிலங்கள் பாசன வசதி பெறும். ஈரோடு மாவட்டத்தில் விவசாயத்திற்கு தேவையான உரங்கள், விதைநெல் இருப்பில் வைக்கப்பட்டுள்ளது.

ஆகஸ்ட் மாதத்திற்கு தேவையான யூரியா, 4840 டன் டி.ஏ.பி, 3660 டன் பொட்டாஷ் 3410 டன், காம்ளக்ஸ் 8590 டன் என மொத்தம் 20,200 மெட்ரிக் டன் உரங்கள் தயார் நிலையில் வைக்கப்பட்டுள்ளது. பாசனத்திற்கு தேவையான தண்ணீரும் அணையில் நிரம்பி வழிகிறது. இதனால் விவசாயிகள் பெருமகிழ்ச்சி அடைந்துள்ளனர். அணையிலிருந்து உபரிநீர் வந்துகொண்டிருக்கின்றது. எனவே விவசாய பெருமக்கள் நீரை சிக்கனமாக பயன்படுத்தி, நீர்மேலாண்மை மேற்கொண்டு உயர் மகசூல் பெற வேண்டும்.

இவ்வாறு அமைச்சர்கள் கே.ஏ.செங்கோட்டையன், கே.சி.கருப்பணன் ஆகியோர் தெரிவித்தனர்.