சிறப்பு செய்திகள்

கல்லூரி மாணவர்களுக்கு புதிதாக டேட்டா கார்டு வழங்க வேண்டும்-அரசுக்கு, எதிர்க்கட்சி தலைவர் வலியுறுத்தல்

சென்னை, ஜூலை 14-

கடந்த ஆண்டு கொரோனா தொற்று காரணமாக தமிழக கல்லூரிகளில் வகுப்புகள் நடத்த முடியாத சூழ்நிலையில் மாணவர்களின் நலனுக்காக இணையவழி வகுப்புகள் நடத்தப்பட்டன.

இதையடுத்து ஆன்லைன் வகுப்பில் கலந்து கொள்ள அம்மாவின் அரசு கலை மற்றும் அறிவியல் கல்லூரிகள், பாலிடெக்னிக் கல்லூரிகள், பொறியியல் கல்லூரிகள் மற்றும் கல்வி உதவித்தொகை பெறும் சுய உதவி கல்லூரிகளில் பயின்ற 9 லட்சத்து 70 ஆயிரம் மாணவர்களுக்கு கடந்த ஜனவரி முதல் ஏப்ரல் மாதம் வரை 4 மாதங்களுக்கு நாள் ஒன்றுக்கு 2 ஜிபி.யுடன் கூடிய டேட்டா கார்டுகளை கழக அரசு வழங்கியது.

தற்போது புதிதாக பொறுப்பேற்றுள்ள தி.மு.க. அரசு அம்மா அரசு வழங்கிய 2 ஜிபி டேட்டா கார்டுகளை புதுப்பிக்காததால் மாணவர்கள் ஆன்லைனில் பாடம் கற்க முடியாத நிலை ஏற்பட்டுள்ளது.

எனவே கல்லூரி மாணவர்களுக்கு 2 ஜிபி டேட்டா கார்டுகளை அரசு வழங்க வேண்டும் என்று கழக இணை ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி தலைவருமான எடப்பாடி கே.பழனிசாமி வலியுறுத்தி உள்ளார்.

இதுகுறித்து அவர் வெளியிட்டுள்ள அறிக்கையில் கூறியிருப்பதாவது:-

பொன்மனச்செம்மல் புரட்சித்தலைவர் எம்.ஜி.ஆர். சத்துணவு திட்டத்தினை கொண்டுவந்து கல்விப்புரட்சியை ஏற்படுத்தினார். தொடர்ந்து புரட்சித்தலைவி அம்மா அவர்களும், அம்மாவின் அரசும் எடுத்த நடவடிக்கைகளின் காரணமாக உயர்கல்வியில், தி.மு.க. ஆட்சியில் 2010-11-ம் ஆண்டில் 32.9 விழுக்காடாக இருந்த உயர்கல்வி மாணவர் சேர்க்கை விகிதம், தற்போது 51.40 விழுக்காடாக உயர்ந்து, இந்தியாவிலேயே தமிழ்நாடு தொடர்ந்து முதலிடத்தை தக்கவைத்து வருகிறது.

பெரிய மாநிலங்களுடன் குறிப்பாக, கேரளாவுடன் போட்டி போட்டு தமிழகம் உயர் கல்வியில் பெரும் வளர்ச்சியை பெற்று இந்தியாவிலேயே தொடர்ந்து முதலிடத்தில் இருப்பதற்கு, அனைத்திந்திய அண்ணா திராவிட முன்னேற்ற கழகத்தின் 30 ஆண்டு கால ஆட்சியின் மாட்சியே காரணம்.

கடந்த 10 ஆண்டுகளில் 40 கலை மற்றும் அறிவியல் கல்லூரிகள், 21 பல்வகை தொழில்நுட்ப கல்லூரிகள், 4 பொறியியல் கல்லூரிகள், 7 சட்டக்கல்லூரிகள் மற்றும் 17 புதிய அரசு மருத்துவக்கல்லூரி துவக்கப்பட்டன.

மேலும், பள்ளிக் கல்வித்துறையின் மூலம் மாணவர்களுக்கு விலையில்லா கல்வி உபகரணங்கள் வழங்குதல், மேல்நிலைப்பள்ளி மாணவர்களுக்கு விலையில்லா மடிக்கணினி வழங்குதல் போன்ற பல நல்ல திட்டங்களே காரணம். இதன் காரணமாக, சில ஆண்டுகளுக்கு முன்பு வரை கல்வியில் முதன்மை மாநிலமாக திகழ்ந்த கேரளாவை நாம் முந்தியுள்ளோம்.

2020–-21ம் ஆண்டுக்கான நிதிநிலை அறிக்கையில், கல்விக்காக அம்மாவின் அரசு 34,687.74 கோடி ரூபாய் நிதி ஒதுக்கீடு செய்தது வரலாற்று சாதனையாகும். வேறு எந்த மாநிலமும் கல்விக்கு இந்த அளவு நிதி ஒதுக்கீடு செய்தது இல்லை.

மேலும் அம்மாவும், அம்மாவின் அரசும் எடுத்த பல்வேறு சீரிய நடவடிக்கைகளின் காரணமாக கற்றல், கற்பித்தல் போன்றவை தமிழகத்தில் உயர்ந்தும், இடைநிற்றல் வெகுவாக குறைந்தும், ஆரம்பப்பள்ளி முதல் உயர்கல்வி வரை பல லட்சம் மாணவர்கள் பயின்று வருவதும் தமிழகத்தை தலைநிமிர்ந்து நிற்க வைத்துள்ளது.

கடந்த ஆண்டு கோவிட்-19 பெரும் தொற்றின் காரணமாக, தமிழக கல்லூரிகளில் வகுப்புகளை நடத்த முடியாத சூழ்நிலையில், மாணவர்களின் நலனுக்காக கல்வி நிறுவனங்கள் இணையவழி (On line) வகுப்புகளை நடத்தின.

இந்த இணையவழி வகுப்புகளில் அனைத்து மாணவ, மாணவிகள் பங்கேற்க முடியவில்லை. முக்கியமாக, அனைத்து மாணவர்கள் அல்லது அவர்களது பெற்றோர்கள் ஆண்ட்ராய்டு கைப்பேசியோ அல்லது அரசு வழங்கிய மடிக்கணினியோ வைத்திருந்தாலும், ஆன்லைன் வகுப்பில் கலந்துகொள்ள அதற்குண்டான டேட்டா கார்டு வாங்க இயலாத நிலையில் இருந்தனர்.

எனவே தான் அம்மாவின் அரசு கலை மற்றும் அறிவியல் கல்லூரிகள், பாலிடெக்னிக் கல்லூரிகள், பொறியியல் கல்லூரிகள் மற்றும் கல்வி உதவித்தொகை பெறும் சுயநிதிக்கல்லூரிகளில் பயின்ற சுமார் 9 லட்சத்து 70 ஆயிரம் மாணவர்களுக்கு கடந்த ஜனவரி (2021) மாதம் முதல் ஏப்ரல் மாதம் வரை நான்கு மாதங்களுக்கு நாள் ஒன்றுக்கு 2 GB Data உடன் கூடிய தரவு அட்டைகளை வழங்க உத்தரவிட்டது.

தமிழக அரசின் ELCOT நிறுவனத்தின் மூலமாக விலையில்லா தரவு அட்டைகள் (Data cards) மாணவர்களுக்கு வழங்கப்பட்டு, அவர்களும் சிறந்த முறையில் online வகுப்பில் கல்வி பயின்றார்கள். கலை-அறிவியல், பொறியியல் மற்றும் பாலிடெக்னிக் கல்லூரிகளுக்கான முதலாம் ஆண்டு மாணவர் சேர்க்கை தற்போது நடைபெற்று வருகிறது.

ஏற்கனவே முதலாம் ஆண்டு படித்த மாணவர்கள் இரண்டாம் ஆண்டுக்கும், இரண்டாம் ஆண்டு படித்த மாணவர்கள் மூன்றாம் ஆண்டுக்கும், மூன்றாம் ஆண்டு படித்த மாணவர்கள் நான்காம் ஆண்டுக்கும் சென்றுள்ளனர்.

கோவிட் தொற்று இன்னும் முழுமையாக குறையாத காரணத்தால் இந்த ஆண்டும் கல்லூரிகள் திறக்கப்படுமா? நேரடி வகுப்புகள் நடைபெறுமா? அல்லது Online வாயிலாகத்தான் கல்வி கற்க வேண்டுமா? என்று புரியாமல் நமது மாணவ செல்வங்கள் குழப்பத்தில் ஆழ்ந்துள்ளனர்.

எனவே, கல்வி நிறுவனங்கள் தற்போது செயல்படவில்லை என்றாலும், மாணவர்களில் சிலர் இந்த ஆண்டுக்கான பாடங்களை இணையவழி, இணையவழி நூலகம், கூகுள் சர்ச் போன்ற முறைகளில் தரவிறக்கம் செய்து பயின்று வருகிறார்கள்.

அம்மாவின் அரசால் வழங்கப்பட்ட விலையில்லா தரவு அட்டைகள் இந்த ஆட்சி வந்த பிறகு புதுப்பிக்கப்படாததால், அனைத்து மாணவர்களும் இணைய வழியில் பாடம் படிக்க முடியாத நிலை ஏற்பட்டுள்ளதாக செய்திகள் வருகின்றன.

தமிழகத்தில் உள்ள பெரும்பாலான மாணவர்கள் ஏழ்மை மற்றும் மத்திய தர குடும்பங்களை சேர்ந்தவர்களாக இருக்கிறார்கள். அவர்களால் மாதம் ஒன்றுக்கு சுமார் 200 ரூபாய் முதல் அதிகபட்சம் 400 ரூபாய் வரை செலவு செய்து, அம்மாவின் அரசு வழங்கிய தரவு அட்டைகளை புதுப்பிக்க முடியாத நிலையில் உள்ளனர்.

எனவே, நமது மாணவர்கள் தொடர்ந்து சிறந்த முறையில் கல்வி கற்கவும், அவர்களுடைய கற்றல் திறனை மேம்படுத்தவும், தி.மு.க. அரசு ஏற்கனவே அம்மாவின் அரசால் வழங்கப்பட்ட விலையில்லா 2GB (Data cards) தரவு அட்டைகளை புதுப்பித்தும், இந்த ஆண்டு புதிதாக சேரும் மாணவர்களுக்கு புதிய அட்டைகளை வழங்க வேண்டும் என்றும் கேட்டுக் கொள்கிறேன்.

இவ்வாறு கழக இணை ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி தலைவருமான எடப்பாடி கே.பழனிசாமி கூறி உள்ளார்.